သိုၵ်းမၢၼ်ႈ ၸႂ်ႉၶိူင်ႈမိၼ် ၶိူင်ႈၵွင်ႈလူင် ပိုတ်းယိုဝ်းလႄႈ ၼႂ်းလိူၼ်မၢတ်ႊၶျ် ၶၢဝ်းတၢင်း 2 ဝူင်ႈၼႆႉၵူၺ်း ၵူၼ်းမိူင်းလူႉတၢႆ 92 ၵေႃႉ မၢတ်ႇၸဵပ်း 169 ၵေႃႉ ၼႂ်းၼၼ်ႉ တိူင်းဝဵင်းလိူဝ်ႇ ပဵၼ်ၼမ်လိူဝ်ပိူၼ်ႈသုတ်း လူႉတၢႆ 42 ၵေႃႉ မၢတ်ႇၸဵပ်း 53 ၵေႃႉ။

လိူဝ်ၼၼ်ႉ မိူၼ်ၼင်ႇ ၼႂ်းတိူင်းမၵူၺ်း ၊ တိူင်းၸႄႈၵႅင်း ၊ တိူင်းပႃႇၵိူဝ် ၊ တိူင်းတၼၢဝ်းသီ ၊ ၸႄႈမိူင်းၶၢင် ၊ မိူင်းယၢင်းလႅင် ၊ မိူင်းတႆး ၊ မိူင်းယၢင်းၽိူၵ်ႇလႄႈ မိူင်းရၶႅင်ႇ ၸိူဝ်းၼႆႉထႅင်ႈ ဝႃႈၼႆ။

သိုၵ်းမၢၼ်ႈ ပွႆႇမၢၵ်ႇပိုတ်းယိုဝ်းတိုၵ်းတေႃး ၼႂ်းလိူၼ်မၢတ်ႊၶျ်ၼႆႉ ၵူၼ်းဝၢၼ်ႈလႅတ်ႉပၢၼ်ႇလႃႉ (လက်ပံ လှရွာ) ၊ ၸႄႈဝဵင်းၸၢင်ႉၵိုဝ် (စဉ့်ကူးမြို့နယ်) တိူင်းဝဵင်းလိူဝ်ႇ(မၼ်းတလေး) တုမ်ႉတိူဝ်ႉမၢတ်ႇၸဵပ်း ၼမ် လိူဝ်ပိူၼ်ႈ။ ၵူၼ်းမိူင်းလူႉတၢႆ ပဵၼ်မူႇပဵၼ်ၸုမ်း ၵမ်းလဵဝ်  27 ၵေႃႉ ၊ မၢတ်ႇၸဵပ်းထႅင်ႈ 32 ၵေႃႉ။

သိုၵ်းမၢၼ်ႈ ယိုတ်းမိူင်းၼႆႉ ဢမ်ႇမီးပၢင်တိုၵ်းသင်သေ ပွႆႇမၢၵ်ႇပိုတ်းယိုဝ်း ဢွင်ႈတီႈၵူၼ်းမိူင်းယူႇသဝ်း။

ၼႂ်းဝၼ်းတီႈ 16 လိူၼ်မၢတ်ႊၶျ်ၼၼ်ႉၵေႃႈ သိုၵ်းမၢၼ်ႈ ပွႆႇမၢၵ်ႇပိုတ်းယိုဝ်း ၼႂ်းၸႄႈဝဵင်းၼွင်ၶဵဝ် မိူင်းတႆးပွတ်းႁွင်ႇလႄႈ ၼႂ်းၸႄႈဝဵင်းဝႅတ်ႉလႅတ်ႉ (ဝက်လက်မြို့နယ်) တိူင်းၸႄႈၵႅင်း။ တင်းသွင်ဢွင်ႈတီႈ ႁူမ်ႈၵၼ် မီးၵူၼ်းလူႉတၢႆ 18 ၵေႃႉ ပႃးသင်ၶၸဝ်ႈလၢႆလၢႆတူၼ်။

တႄႇဢဝ် သိုၵ်းမၢၼ်ႈ ယိုတ်းဢႃႇၼႃႇမႃး ၼႂ်းလိူၼ်ၾႅပ်ႊပိဝ်ႊရီႊ ပီ 2021 တေႃႇထိုင်လိူၼ်မၢတ်ႊၶျ် ပီ 2025 ၼႆႉ ၵူၼ်းမိူင်းၸိူဝ်းလူႉတၢႆ ယွၼ်ႉၶိူင်ႈမိၼ်၊ ၶိူင်ႈၵွင်ႈလူင် သိုၵ်းမၢၼ်ႈ ပိုတ်းယိုဝ်း မီး 3,505 ၵေႃႉ၊ မၢတ်ႇၸဵပ်းႁိမ်း 4,997 ၵေႃႉၼႆ – သိုဝ်ႇၶၢဝ်ႇ RFA ၵဵပ်းသဵၼ်ႈမၢႆသေ ႁၢႆးငၢၼ်းဝႆႉၼင်ႇၼႆ။