သင်ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ တေၸတ်းပၢင်လိူၵ်ႈတင်ႈတႄႉၸိုင် ၽူႈတႅၼ်း ၸိူဝ်းတေလူင်းလိူၵ်ႈတင်ႈၼၼ်ႉ တေဢမ်ႇမီးလွင်ႈလွတ်ႈၽေးၼႆ – ၽူႈထတ်းသၢင်ၵၢၼ်မိူင်း ၵေႃႉၼိုင်ႈလၢတ်ႈၼင်ႇၼႆ။

ဝၼ်းတီႈ 16/03/2025 ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ပိုၼ်ၽၢဝ်ႇၵႂႃႇ ၼႂ်းပၢင်ယုၵ်ႉယွင်ႈပၼ်ၸုမ်ႈသူး (ဂုဏ်ထူးဆောင်ဘွဲ့) ၼၼ်ႉဝႃႈ ပေႃးထိုင်မႃးႁၢင်ပီ 2025 ၸိုင် တေ ဢၢၼ်းၸတ်းပၢင်လိူၵ်ႈတင်ႈ ႁႂ်ႈလႆႈၼႆလႄႈ ႁႂ်ႈပႃႇတီႇၵၢၼ်မိူင်း ၸိူဝ်းတေလူင်းလိူၵ်ႈတင်ႈၼၼ်ႉ ႁႂ်ႈႁၢင်ႈႁႅၼ်းဝႆႉတူဝ်ႈတၼ်း ဝႃႈၼႆ။

ၼင်ႇႁိုဝ် တေပဵၼ်မႃးပၢင်လိူၵ်ႈတင်ႈၼၼ်ႉၵေႃႈ လူင်ပွင်ၸိုင်ႈတင်း ၵူၼ်းမိူင်း တေလႆႈႁူမ်ႈႁွမ်းၵၼ်သေ ႁဵတ်းသၢင်ႈၼႃႈၵၢၼ်တႃငၢၼ်းၵႂႃႇ ၼႆယဝ်ႉ။

သင်ဝႃႈ ပၢင်လိူၵ်ႈတင်ႈ ပဵၼ်ၸတ်းႁဵတ်းၵႂႃႇ ၸွမ်းၼင်ႇ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ပိုၼ်ၽၢဝ်ႇဝႆႉတႄႉၸိုင် ယွၼ်ႉၼႂ်းမိူင်းတိုၵ်ႉမီးပၢင်တိုၵ်းသိုၵ်းသိူဝ်ယူႇလႄႈ ၽူႈတႅၼ်း ၸိူဝ်းတေၶဝ်ႈလိူၵ်ႈတင်ႈၼႆႉ ၸၢင်ႈမီးၽေးတေႃႇတူဝ်ၶဝ်ၼႆ ၽူႈထတ်းသၢင်ၵၢၼ်မိူင်းလႄႈ ၵၢၼ်သိုၵ်း ၵေႃႉၼိုင်ႈ ထတ်းသၢင်ၼႄဝႆႉ တီႈၽူႈတွႆႇႁွၵ်ႈၼင်ႇၼႆ။  

“တွၼ်ႈတႃႇ တေၸတ်းလႆႈပၢင်လိူၵ်ႈတင်ႈၼႆႉ ၸွမ်းၼႂ်းပိုၼ်ႉတီႈၸိူဝ်းၼၼ်ႉ တေလႆႈမီးလွင်ႈႁူမ်ႇလူမ်ႈ ၵွၼ်ႇ။ ယွၼ်ႉၼၼ် ၾၢႆႇသိုၵ်းမၢၼ်ႈၼႆႉ ၸၢင်ႈဢဝ်ႁႅင်းသိုၵ်းသေ ၵႂၢတ်ႇလၢင်ႉၸွမ်းပိုၼ်ႉတီႈ။ လိူဝ်ၼၼ်ႉ ၾၢႆႇၸုမ်းယိပ်းၵွင်ႈၵၢင်ႇၵေႃႈ ၼင်ႇႁိုဝ် သိုၵ်းမၢၼ်ႈ တေဢမ်ႇၸၢင်ႈၸတ်းပၢင်လိူၵ်ႈတင်ႈလႆႈၼၼ်ႉ လႆႈလၢႆးလႂ်ၵေႃႈ တေဢဝ်လၢႆးၼၼ်ႉ ၸွမ်းၵဝ်းယူႇလႄႈ ပေႃးပဵၼ်ၼၼ်မႃး ၸၢင်ႈမႃးတုမ်ႉတိူဝ်ႉၵၼ်တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၵမ်းသိုဝ်ႈသေ ၵိူတ်ႇပဵၼ်ပၢင်တိုၵ်းထႅင်ႈ”- ဝႃႈၼႆ။  

သိုပ်ႇလၢတ်ႈဝႃႈ – “ၾၢႆႇၼိုင်ႈၵေႃႈ တူဝ်တႅၼ်းၸိူဝ်း တေၶဝ်ႈၶေႉ တွၼ်ႈတႃႇဢွင်ႇပေႉ ၼႂ်းပၢင်လိူၵ်ႈတင်ႈ ၼၼ်ႉၵေႃႈ ၼင်ႇႁိုဝ် မၼ်းတေပေႉၼႂ်းၶဵတ်ႇသဵင်မၼ်းၼၼ်ႉ တေလႆႈႁူမ်ႈမိုဝ်းၵၼ်တင်း သိုၵ်းမၢၼ်ႈသေ ႁဵတ်းသၢင်ႈၵႂႃႇ။ ဢိင်ၼိူဝ်လွင်ႈၼႆႉ ၸၢင်ႈတေမီးပၼ်ႁႃၵၼ်တင်း ၸုမ်းသိုၵ်းၸၢဝ်းၶိူဝ်းမႃး” – ဝႃႈၼႆ။

ပၢင်လိူၵ်ႈတင်ႈ မိူင်းႁူမ်ႈတုမ်ၼႆႉ ၾၢႆႇသိုၵ်းမၢၼ်ႈ တေဢၢၼ်းၶႂ်ႈၸတ်းႁဵတ်းၵႂႃႇၼႂ်းႁၢင်ပီ 2025 လိူၼ်တီႊသႅမ်ႊပိူဝ်ႊလႄႈ လိူၼ်ၵျႅၼ်ႊၼိဝ်ႊရီႊ ပီ 2026 ၼႆ ၾၢႆႇသိုၵ်းမၢၼ်ႈ ပိုၼ် ၽၢဝ်ႇပဵၼ်တၢင်းၵၢၼ်မႃး ဝၢႆးလင် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ပွၵ်ႈၶိုၼ်း မိူင်းရတ်ႉသျႃးမႃး ၼႆယဝ်ႉ။

လႆႈႁူႉဝႃႈ တႃႇၶဝ်ႈလိူၵ်ႈတင်ႈၼႆႉ မီးပႃႇတီႇၵၢၼ်မိူင်း ပၼ်သဵၼ်ႈၸိုဝ်ႈဝႆႉ 53 ပႃႇတီႇသေ ပၢင်လိူၵ်ႈတင်ႈ ဢၼ်သိုၵ်းမၢၼ်ႈ တေၸတ်းႁဵတ်းၵႂႃႇ ဝၢႆးလင် ယိုတ်းဢႃႇၼႃႇ ၸိုင်ႈမိူင်းမႃးၼႆႉ တေပဵၼ်ပၢင်လိူၵ်ႈတင်ႈ ဢၼ်ဢမ်ႇမီးလွင်ႈၽဵင်ႇပဵင်းၵူၺ်းၼႆ ၽူႈလဵပ်ႈႁဵၼ်းၶူၼ်ႉၶႂႃႉ ၵၢၼ်မိူင်းၵေႃႉၼိုင်ႈ လၢတ်ႈၼႄဝႆႉ တီႈၽူႈတွႆႇႁွၵ်ႈၼင်ႇၼႆ။

“မိူဝ်ႈပၢင်လိူၵ်ႈတင်ႈ ပီ 2020 ၼၼ်ႉၵေႃႈ မိၼ်းဢွင်ႇလၢႆႇ ဢဝ်ၶေႃႈဢၢင်ႈဝႃႈ ပၢင်ၼႄၵၢင်ၸႂ်ၼႆႉ ဢမ်ႇမီး လွင်ႈၽဵင်ႇပဵင်းၼႆသေ ယိုတ်းဢႃႇၼႃႇ ဢဝ်ၸိုင်ႈမိူင်းပႅတ်ႈ။ ယၢမ်းလဵဝ်သမ်ႉဝႃႈ ပဵၼ်ႁိုဝ်ၵေႃႈ တေဢၢၼ်း ႁဵတ်းၶိုၼ်း ပၢင်လိူၵ်ႈတင်ႈ ႁႂ်ႈမၼ်းပဵၼ်ၼႆလႄႈ ၵိုင်ႉၵၢင်ႉမႃးပိုၼ်ၽၢဝ်ႇၵႂႃႇၸိူင်ႉၼႆ။ သင်မၼ်း ၸတ်းလႆႈမႃးတႄႉၵေႃႈ တေပဵၼ်ပၢင်လိူၵ်ႈတင်ႈ ၸပ်းၽၢၵ်ႇၵူၺ်း။ လွင်ႈၼႆႉ တေပဵၼ်မႃးၸိူင်ႉႁိုဝ်တႄႉတႄႉၼႆ ယၢမ်းလဵဝ်တႄႉ ပႆႇၸၢင်ႈလၢတ်ႈ”- ဝႃႈၼႆ။

ၼင်ႇႁိုဝ် ပၢင်လိူၵ်ႈတင်ႈ တေပဵၼ်မႃးလႆႈ ၸွမ်းၼင်ႇၵၢင်ၸႂ် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၶႂ်ႈပဵၼ် ၼၼ်ႉတႄႉ ၾၢႆႇသိုၵ်းမၢၼ်ႈ ၸၢင်ႈၸႂ်ႉတိုဝ်း လၢႆးတၢင်းၵူႈၾၢႆႇၾၢႆႇသေ ၶီႇၼဵၵ်းတဵၵ်းတဵင် ၵူၼ်းၼႂ်းပိုၼ်ႉ တီႈ ဢၼ်ၶဝ်ပေႉၵိၼ်လႆႈၼၼ်ႉလႄႈ ၸၢင်ႈမီးလိူင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းမႃး ၼႆယဝ်ႉ။

တႅမ်ႈ – ၽူၺ်းၼုမ်ႇ