မိူဝ်ႈဝႃး ဝၼ်းတီႈ 17/03/2025 လူင်ပွင်ၸိုင်ႈမိူင်းႁူမ်ႈတုမ် ၸူဝ်ႈၶၢဝ်း NUG ဢွၵ်ႇလိၵ်ႈတိုၵ်းသူၼ်းထိုင် ၸုမ်းၸိူဝ်း ႁဵတ်းၵၢၼ်သုၼ်ႇလႆႈသုၼ်ႇပဵၼ်ၵူၼ်းလႄႈ လုၵ်ႈဢွၼ်ႇ ၸၢတ်ႈၸိုင်ႈလုမ်ႈၾႃႉ – ႁႂ်ႈဢဝ်လိူင်ႈ တၢင်းၽိတ်းတီႈသိုၵ်းမၢၼ်ႈ ဢၼ်ႁဵတ်းပူၼ်ႉပႅၼ်ၼိူဝ် သုၼ်ႇလႆႈၵူၼ်း​လႄႈ လုၵ်ႈဢွၼ်ႇ ၼႆယဝ်ႉ။

သိုၵ်းမၢၼ်ႈၼႆႉ တင်ႈၸႂ်ယိူင်းၸူးတေႃႇ ဢွင်ႈတီႈမီးၵူၼ်းမိူင်းယူႇသဝ်းၼၼ်ႉသေ ဢဝ်ၶိူင်ႈမိၼ်တိုၵ်း ပွႆႇမၢၵ်ႇသႂ်ႇလႄႈ ႁဵတ်းႁႂ်ႈႁိူၼ်းယေး ၵူၼ်းမိူင်းဢိၵ်ႇ လုၵ်ႈဢွၼ်ႇ လူႉႁၢႆတၢႆၵႂႃႇ တင်းၼမ်။ ယွၼ်ႉၼၼ် ယူႇတီႈ ၾၢႆႇလူင်ပွင်ၸိုင်ႈ မိူင်းႁူမ်ႈတုမ်ၸူဝ်ႈၶၢဝ်းသေ ဢမ်ႇႁၼ်လီ သၢၼ်ၶတ်းၸွမ်းတႄႉတႄႉဝႃႈဝႃႈ ၼႆယဝ်ႉ။

မိူဝ်ႈပူၼ်ႉမႃး ဝၼ်းတီႈ 16/03/2024 ယၢမ်းႁူဝ်ၶမ်ႈ 5 မူင်း သိုၵ်းမၢၼ်ႈ ပွႆႇမၢၵ်ႇသႂ်ႇ ဝတ်ႉပရိယတ်ႉတိ ၵၢင်ဝဵင်းၼွင်ၶဵဝ် တူၵ်းတႅၵ်ႇသႂ်ႇ သင်ၶၸဝ်ႈလူႉလွၼ်ႇ 9 တူၼ် ၵူၼ်းမိူင်းတၢႆထင်တီႈ 5 ၵေႃႉ တင်းမူတ်း လူႉတၢႆ 14 ၵေႃႉ။ ၵျွင်းမုၼ်ၸဝ်ႈလႄႈ ႁိူၼ်းၵူၼ်းပိုၼ်ႉတီႈ လူႉၵွႆၸွမ်းတင်းၼမ် ၼႆယဝ်ႉ။

ၵဵဝ်ႇလူၺ်ႈ ဢၼ်သိုၵ်းမၢၼ်ႈ ဢဝ်မၢၵ်ႇမိူဝ်းပွႆႇၸွမ်းဝဵင်း ၸိူဝ်းသိုၵ်းၸၢဝ်းၶိူဝ်းၵုမ်းၵမ်ဝႆႉၼၼ်ႉ ဢမ်ႇထၢတ်ႇဢမ်ႇဝၢႆးလႄႈ ပဵၼ်ၵၢၼ်တႃႇမႅပ်ႇဢီး ႁႂ်ႈသိုၵ်းၸၢဝ်းၶိူဝ်း ဢမ်ႇၵုမ်းၵမ်ဝဵင်းလႆႈလီလီၼႆ ၽူႈထတ်းသၢင်ၵၢၼ်မိူင်း ၵေႃႉၼိုင်ႈ လၢတ်ႈၼႄၼင်ႇၼႆ။

“ၾၢႆႇၼိုင်ႈၵေႃႈ ၸမ်မႃးဝၼ်းဢၼ်ၶဝ် တေလႆႈဢုပ်ႇဢူဝ်းၵၼ်ၼႂ်းမိူင်းၶႄႇၵေႃႈ ပိူင်ၼိုင်ႈ။ ဢၼ်ၶဝ်ပွႆႇ မၢၵ်ႇသႂ်ႇယူႇတိၵ်းတိၵ်းၼႆႉ ယွၼ်ႉဢမ်ႇၶႂ်ႈႁႂ်ႈသိုၵ်းၸၢဝ်းၶိူဝ်း ၵုမ်းၵမ် ႁဵတ်းၵၢၼ်ႁုၼ်ႈမုၼ်း ဝဵင်းလႆႈလီလီၼၼ်ႉၼႃႇ”- ဝႃႈၼႆ။

ၼႂ်းၶေႃႈပိုၼ်ၽၢဝ်ႇ ၾၢႆႇလူင်ပွင်ၸိုင်ႈမိူင်းႁူမ်ႈတုမ် ၸူဝ်ႈၶၢဝ်း NUG ပိုၼ်ၽၢဝ်ႇၼၼ်ႉ ပႃးဝႆႉဝႃႈ ဝၢႆးလင်မႃးၼႆႉ သိုၵ်းမၢၼ်ႈ ပွႆႇမၢၵ်ႇသႂ်ႇ ၼႂ်းဢွင်ႈတီႈၵူၼ်းမိူင်းယူႇၼႆႉ ပဵၼ်မႁႃႇပိဝ်ႇႁႃႇလူင်ၶဝ် ဢၼ်ၼိုင်ႈသေ ႁဵတ်းႁႂ်ႈတုမ်ႉတိူဝ်ႉပႃးလုၵ်ႈဢွၼ်ႇ လူႉတၢႆၸွမ်းတင်းၼမ် ၼႆယဝ်ႉ။

တႄႇပီ 2023 တေႃႇထိုင် ဝၼ်းတီႈ 16/03/2025 ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈတီႈ သိုၵ်းၸၢဝ်းၶိူဝ်း ၵုမ်းၵမ်ၼႆႉ မီးယူႇ 2,190 ပွၵ်ႈ။ ယွၼ်ႉၶိူင်ႈမိၼ်တိုၵ်း ၼၼ်ႉသေ လုၵ်ႈဢွၼ်ႇၼႂ်းမိူင်းႁူမ်ႈတုမ် လူႉတၢႆ 372 ၵေႃႉ ၼႆယဝ်ႉ။

တႄႇႁူဝ်ပီ 2025 မႃးၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းသေ ပွႆႇမၢၵ်ႇသႂ်ႇၼႂ်းမိူင်းတႆးပွတ်းႁွင်ႇ ၵူၺ်းဢမ်ႇၵႃး တိူင်းၸႄႈၵႅင်း၊ တိူင်းဝဵင်းလိူဝ်ႇ (မၼ်းတလေး)၊ တိူင်းမၵူၺ်း ၸိူဝ်းၼႆႉ ၵေႃႈ ၺႃးၶိူင်ႈမိၼ်တိုၵ်း သိုၵ်းမၢၼ်ႈ ပွႆႇမၢၵ်ႇသႂ်ႇပႃးထႅင်ႈ။ လိူဝ်ၼၼ်ႉ ယင်းထႅမ်ႁႅင်းသိုၵ်း၊ ၸတ်းသိုၵ်းၶဝ်ႈၸွမ်းဝၢၼ်ႈၵူၼ်းသေ ၸုတ်ႇၽဝ်ႁိူၼ်းယေးၵူၼ်းမိူင်းလႄႈ ၶႃႈႁႅမ်တၢႆ ၵူၼ်းမိူင်း ၸိူဝ်းဢမ်ႇမီးတၢင်းၽိတ်းတင်းၼမ်လၢႆ ၼႆယဝ်ႉ။

လႆႈႁူႉဝႃႈ ၼႂ်းလိူၼ်မၢတ်ႊၶျ် တႄႇဝူင်ႈထီႉၼိုင်ႈမႃး ၶၢဝ်းတၢင် 15 ဝၼ်းၼႆႉၵူၺ်း သိုၵ်းမၢၼ်ႈ ၶႃႈႁႅမ်တၢႆ ၵူၼ်းမိူင်း မီးၵႂႃႇ 50 ၵေႃႉယဝ်ႉ ဝႃႈၼႆ။

တႅမ်ႈ – ၽူၺ်းၼုမ်ႇ