မိူဝ်ႈဝၼ်းတီႈ 15/03/2025 ယၢမ်းၵၢင်ၼႂ်မွၵ်ႈ 11 မူင်း ၾႆးမႆႈႁိူၼ်းၵူၼ်းဝၢၼ်ႈ လင်ၼိုင်ႈ တီႈပွၵ်ႉၵၢတ်ႇ လူင် ဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ ၼႂ်းၼႃႈလိၼ်တပ်ႉသိုၵ်းၽွမ်ႉႁူမ်ႈၸၢဝ်းၶိူဝ်းဝႃႉ UWSA ၵုမ်းၵမ် ဝႆႉၼၼ်ႉ ႁိုင်ၶိုင်ႈၸူဝ်ႈမူင်းပၢႆ။
ၽွင်းၾႆးမႆႈၼၼ်ႉ ၼၢင်းယိင်း ဢႃယု 40 ပၢႆၵေႃႉၼိုင်ႈလႄႈ ၵူၼ်းႁိမ်းႁိူၼ်းၼၼ်ႉ ၵေႃႉၼိုင်ႈ ပဵၼ်လူမ်း ၵႂႃႇသေ ထိုင်တီႈလႆႈႁွင်ႉၵႂႃႇႁူင်းယႃလူင်ၵူၼ်းမိူင်း ဝဵင်းႁူဝ်ပၢင်ႇၼႆ – ၵူၼ်းပိုၼ်ႉတီႈ ၼႂ်းပွၵ်ႉၵၢတ်ႇလူင် လၢတ်ႈတီႈၽူႈတွႆႇႁွၵ်ႈၼင်ႇၼႆ။
“ၾႆးမႆႈၼႆႉ ငိၼ်းဝႃႈ ပဵၼ်ယွၼ်ႉၶဝ်တင်ႈမေႃႈၶဝ်ႈဝႆႉ ၼႂ်းသိုင်ႇၾႆးသေ ဢွၵ်ႇၵႂႃႇလႄႇၼၼ်ႉၼႃႇ။ ၵတ်ႉၵႃႈ ရူတ်ႉၶႄၾႆးၶဝ် တၼ်းမႃးၶိုတ်းၵွၼ်ႇဢိူဝ်ႈ။ ဢမ်ႇတၼ်းလၢမ်းထႅင်ႈတၢင်ႇႁိူၼ်း”- ဝႃႈၼႆ။
လႆႈႁူႉဝႃႈ ရူတ်ႉၶႄႇၾႆး တႃႇသၢမ်လမ်း မႃးႁူတ်းၾႆးပၼ်သေ ၾႆးတၼ်းမႆႈၵႂႃႇႁိုင်မွၵ်ႈၶိုင်ႈၸူဝ်ႈမူင်းသေ ၸင်ႇလႆႈမွတ်ႇၵႂႃႇ။ ၵဵဝ်ႇလူၺ်ႈလွင်ႈၼႆႉသေ လွင်ႈလူႉသုမ်းတေမီးၵႃႈႁိုဝ်တႄႉ ယင်းပႆႇႁူႉ ဝႃႈၼႆ။
မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 15/03/2025 ယၢမ်းၵၢင်ဝၼ်း ၾႆးမႆႈႁိူၼ်းယေးၵူၼ်းဝၢၼ်ႈ လင်ၼိုင်ႈ တီႈပွၵ်ႉရတၼႃႇသီႇရိ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၼၼ်ႉၵေႃႈ ယွၼ်ႉၾႆးၾႃႉသျွတ်ႉ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ