ၵူၼ်းမိူင်းၼႂ်းထုင်ႉမိူင်းပႃး သွင်ၵေႃႉ ၼႂ်းၸႄႈဝဵင်းသႅၼ်ဝီ ၺႃးၸုမ်းယိပ်းၵွင်ႈၵၢင်ႇဢမ်ႇႁူႉၾၢႆႇ ယိုဝ်းတၢႆထင်တီႈ။
မိူဝ်ႈဝႃး ဝၼ်းတီႈ 13/03/2025 ယၢမ်းၵၢင်ၶမ်ႈ ၽူႈၵွၼ်းဢိူင်ႇဝၢၼ်ႈမွၵ်ႇၸလီႇလႄႈ လၢၼ်ၸၢႆးမၼ်း ၼႂ်းထုင်ႉမိူင်းပႃး ၺႃးၸုမ်းယိပ်းၵွင်ႈၵၢင်ႇ ဢဝ်ၵွင်ႈယိုဝ်းတၢႆ တီႈႁိမ်းဝၢၼ်ႈပၢင်ၽၢတ်ႇ လႅၼ်ၶႅၼ်ဝဵင်းသႅၼ်ဝီ – လႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။
ၵေႃႉၺႃးယိုဝ်းတၢႆၼႆႉ ၸိုဝ်ႈႁွင်ႉ လုင်းသႃႇၺုၼ်ႉ ပဵၼ်ၽူႈၵွၼ်းဢိူင်ႇ (ဢုၵ်ႉၵထ) ဝၢၼ်ႈမွၵ်ႇၸီႇလီႇ ဢႃယု 60 ပၢႆ လၢၼ်ၸၢႆးမၼ်းဢႃယုမွၵ်ႈ 17 ပီ ၺႃးၵူၼ်းယိပ်းၵွင်ႈၵၢင်ႇ ယိုဝ်းတၢႆၵႂႃႇ ၽွင်းၵႂႃႇၼွၼ်းပႂ်ႉၵႃးၶႃပူႇလၢၼ် ၼႆယဝ်ႉ။
ၵူၼ်းမိူင်းၼႂ်းဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၶႃပူႇလၢၼ်ၵႂႃႇၼွၼ်းပႂ်ႉၵႃးသေ ၺႃးပိူၼ်ႈယိုဝ်းတၢႆဢိူဝ်ႈ။ မိူဝ်ႈလဵဝ် ပိူၼ်ႈဢဝ်ၵႂႃႇၽဝ်တီႈၼႂ်းဝဵင်းယဝ်ႉ။ လုင်းသႃႇၺုၼ်ႉၼႆႉ ပဵၼ်ၵူၼ်းၸႃႇတိ ဝၢၼ်ႈၵုင်းၺွင်ႇ”- ဝႃႈၼႆ။
မိူဝ်ႈဝၼ်းတီႈ 12 ယၢမ်းၵၢင်ၶမ်ႈၼၼ်ႉၵေႃႈ မီးၼၢင်းယိင်းဢႃယု မွၵ်ႈ 50 ပၢႆၵေႃႉၼိုင်ႈ ၺႃးၶႃႈတၢႆၵႂႃႇတီႈ ၼႂ်းၵၢတ်ႇလူင် ဝဵင်းသႅၼ်ဝီလႄႈ ယၢမ်းလဵဝ် ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈယဝ်ႉၼႆ ၵူၼ်းမိူင်းဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈ ၼင်ႇၼႆ။
“မိူဝ်ႈလဵဝ် တီႈဝဵင်းႁဝ်းၼႆႉ ငဝ်းလၢႆးႁၢင်ႈႁၢႆႉမႃးလိူဝ်ၵဝ်ႇယဝ်ႉ။ ပၢင်တေႃႇလွင်းၵေႃႈ ဢမ်ႇဢိုတ်းသေပွၵ်ႈ။ ၵၢင်ၶမ်ႈၵၢင်ၶိုၼ်းၼႆႉ ဢမ်ႇႁတ်းၵႂႃႇတၢင်းလႂ်ယဝ်ႉ။ ၵူၼ်းယိပ်းၵွင်ႈၵၢင်ႇၵေႃႈၼမ်ၼႃႇ။ ပၵ်းပိူင်ၵေႃႈ ဢမ်ႇမီး။ ပေႃးပဵၼ်ပၼ်ႁႃမႃး တေလႆႈၵႂႃႇတိူင်ႇၽႂ် တေလႆႈၸႂ်ယႂ်ႇၽႂ်ၵေႃႈ ဢမ်ႇၸၢင်ႈ”- ဝႃႈၼႆ။
ၼႂ်းဝဵင်းသႅၼ်ဝီၼႆႉ ယၢမ်းလဵဝ် မီးသိုၵ်းၵဝ်ႈၵၢင်ႉ၊ သိုၵ်းၶၢင်၊ သိုၵ်းတဢၢင်း ၸိူဝ်းၼႆႉ ယူႇသဝ်း တူင်ႉၼိုင် ၵႂႃႇမႃးဝႆႉသေ သိုၵ်းၵဝ်ႈၵၢင်ႉ ပၼ်ၶႂၢင်ႉပိုတ်ႇပၢင်တေႃႇလွင်းဝႆႉ ပဵၼ်တၢင်းၵၢၼ်လႄႈ ႁဵတ်းႁႂ်ႈၵူၼ်းမိူင်းမႆႈၸႂ် လွင်ႈၽူႈလၵ်ႉၸၵ်ႉၶုတ်ႈ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ