တင်ႈတႄႇ ၼႂ်းႁူဝ်ပီ 2025 မႃး ၸဝ်ႈၵၢၼ်ပၢႆးမၢၵ်ႈမီးလႄႈ ၵူၼ်းမိူင်းၸိူဝ်းဢွၵ်ႇၶၢဝ်းတၢင်းၵႂႃႇမႃး ၼႂ်းမိူင်းတႆးပွတ်းႁွင်ႇ လႆႈပၼ်ၶွၼ်ႇ တီႈၸုမ်းယိပ်းၵွင်ႈၵၢင်ႇၼမ်လိူဝ်ၵဝ်ႇသေ ႁဵတ်းႁႂ်ႈတုမ်ႉတိူဝ်ႉပၢႆးမၢၵ်ႈမီး ၵၢၼ်ယူႇသဝ်းၵိၼ်သၢင်ႈၵူၼ်းမိူင်း ၼႆယဝ်ႉ။

မိူဝ်ႈပၢၼ်သိုၵ်းမၢၼ်ႈဢုပ်ႉပိူင်ႇမိူင်းၼၼ်ႉ ၼႂ်းမိူင်းတႆးပွတ်းႁွင်ႇ မီးၵဵတ်ႉ/ လၢၼ်ႇသိုၵ်းမၢၼ်ႈ ပႂ်ႉၵဵပ်း ယွၼ်းၵိၼ်ငိုၼ်းတီႈၸဝ်ႈၵႃးၸိူဝ်းတေႃႉၵုၼ်ႇလႄႈ ၵူၼ်းမိူင်းၸိူဝ်းဢွၵ်ႇၶၢဝ်းတၢင်းၼၼ်ႉၼမ်သေတႃႉ ယွၼ်ႉမီးပၵ်းပိူင်မၢႆမီႈ လွင်ႈၶွၼ်ႇဝႆႉၵမ်းသိုဝ်ႈလႄႈ ဢမ်ႇပေႃးလႆႈႁဵတ်းႁႃၵိၼ်ယၢပ်ႇ။

ဝႃႈၼၼ်သေတႃႉ ယွၼ်ႉသိုၵ်းမၢၼ်ႈ ဢမ်ႇၸွမ်းပၵ်းပိူင်မၢႆမီႈဢၼ်တမ်းဝၢင်းဝႆႉၼၼ်ႉသေ တင်ႈၵဵတ်ႉ/ လၢၼ်ႇ ပႂ်ႉယွၼ်းၵႃႈၼမ်ႉၼဵင်ႈ/ ၵႃႈၶဝ်ႈမုၼ်းတီႈ ၸဝ်ႈရူတ်ႉၸဝ်ႈၵႃး ၸိူဝ်း ဢွၵ်ႇၶၢဝ်းတၢင်းၼၼ်ႉလႄႈ ႁဵတ်းႁႂ်ႈၵူၼ်းမိူင်း ဢမ်ႇလႆႈဢွၵ်ႇၶၢဝ်းတၢင်းငၢႆႈလူမ်ၼင်ႇၵဝ်ႇ။

ယၢမ်းလဵဝ် ဝၢႆးလင် ၽႅၼ်ယၼ်ႇသိုၵ်း 1027 မႃး ၼႂ်းမိူင်းတႆးပွတ်းႁွင်ႇ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း ၵုမ်းၵမ်ဝႆႉသေ ၵူၼ်းမိူင်းထၢင်ႇတေလႆႈယူႇသႃႇ ၵႂႃႇမႃးငၢႆႈလူမ်လိူဝ်ၵဝ်ႇယူႇၼႆ ၵမ်ႈၼမ် ဢွၼ် ၵၼ်မုင်ႈမွင်းဝႆႉ ႁင်းၽႂ်မၼ်းသေတႃႉ ႁိုဝ်တေမိူၼ်ၼင်ႇ ဢၼ်မုင်ႈမွင်းဝႆႉ ၼႆယဝ်ႉ။

လိူဝ်သေ ဢမ်ႇမီးငိုၼ်းၶဝ်ႈ ဢမ်ႇမီးၵၢၼ်လႄႈ ၸင်ႇႁႃႁဵတ်းၵၢၼ်ၵႃႉၶူဝ်းၵုၼ်ႇ မႃးၶၢႆၼႆၵေႃႈ ၸွမ်းတၢင်းသမ်ႉၺႃး သိုၵ်းပႂ်ႉယွၼ်းၵိၼ်ၼမ်ၼႃႇၼႆ ၵူၼ်းမိူင်း ၵေႃႉၵႂႃႇတေႃႉၼမ်ႉမၼ်းၸၢၵ်ႈ တၢင်းဝဵင်းလၢႆးၶႃႈ မိူင်းတႆးပွတ်းၸၢၼ်း မႃးၶၢႆၶိုၼ်း ၼႂ်းမိူင်းတႆးပွတ်းႁွင်ႇ လၢတ်ႈၼႄၼင်ႇၼႆ။

“ပေႃးႁဝ်းၵႂႃႇဢဝ်ၼမ်ႉမၼ်းၼိုင်ႈပွၵ်ႈၼႆႉ ႁိုင်ယူႇ မွၵ်ႈၼိုင်ႈဝူင်ႈၼႆႉယဝ်ႉ။ ပႃးၵႃႈၵိၼ်၊ ၵႃႈၼွၼ်း၊ ၵႃႈၼမ်ႉမၼ်းၵႃး ႁဝ်းႁႄၼႆ ၼိုင်ႈပွၵ်ႈၼႆႉႁဝ်းၵူၺ်းလိူဝ်ငိုၼ်းယူႇ ႁႃႈသႅၼ်ၸိူဝ်းၼႆႉၵူၺ်း။ ႁိူဝ်..ၸွမ်းတၢင်းသမ်ႉ လႆႈပၼ်ငိုၼ်းတီႈသိုၵ်းၸိူဝ်းၼၼ်ႉႁႄၼႆ ၸၢင်ႈတေလိူဝ်သင်ယဝ်ႉ။ ၸွမ်းတၢင်းၼႆႉ ၶႃႈၼပ်ႉတူၺ်းၵဵတ်ႉၼႆႉ မီးယူႇ 10 တီႈပၢႆ ၸိူဝ်းၼႆႉၼေႈ။ မၢင်ပွၵ်ႈမႃးၵေႃႈ ဝူၼ်ႉယူႇဢိူဝ်ႈ… ဝႃႈႁဵတ်းတႃႇၸဝ်ႈၵဝ်ႇႁႃႉ ႁဵတ်းတႃႇပၼ်သိုၵ်း ၸိူဝ်းၼႆႉႁႃႉၵေႃႈ ပေႃးဢမ်ႇႁူႉယဝ်ႉၼေႈ” – ဝႃႈၼႆ။

ဝၢႆးလင် ပၢင်တိုၵ်းၼႂ်းမိူင်းတႆးပွတ်းႁွင်ႇယဝ်ႉ သဵၼ်ႈတၢင်း ဝဵင်းလိူဝ်ႇ- မူႇၸေႊ လူႉၵွႆလၢႆလၢႆတီႈလႄႈ ယၢမ်း ဢွၵ်ႇၶၢဝ်းတၢင်း ႁဵတ်းႁႂ်ႈၵူၼ်းမိူင်း လႆႈလၢႆႈသဵၼ်ႈတၢင်းပႆ။ ပေႃးၶႂ်ႈလုၵ်ႉဝဵင်းလိူဝ်ႇ ၵႂႃႇမူႇၸေႊၸိုင် ယၢမ်းလဵဝ် လႆႈၵႂႃႇတၢင်း တူၼ်ႈတီး – လၢႆးၶႃႈ – မိူင်းၼွင် – မိူင်းယႆ – လႃႈသဵဝ်ႈ – သႅၼ်ဝီ – ၵူတ်ႉၶၢႆ – မူႇၸေႈ ၸဵမ်ၸိူဝ်းၼႆႉ။

သဵၼ်ႈတၢင်းၼႆႉသမ်ႉ မီးဝႆႉ သိုၵ်းမၢၼ်ႈ – သိုၵ်းတႆး – သိုၵ်းပဢူဝ်း – သိုၵ်းတဢၢင်း – သိုၵ်းၶၢင်- သိုၵ်းရၶႅင်ႇ ၸိူဝ်းၼႆႉတင်ႈလၢၼ်ႇ တင်ႈၵဵတ်ႉပႂ်ႉၵဵပ်းၶွၼ်ႇၼိူဝ်သဵၼ်ႈတၢင်း ၼမ်လိူဝ်ၵဝ်ႇ။

လႆႈႁူႉဝႃႈ သိုၵ်းမၢၼ်ႈ ၸိူဝ်းတင်ႈလၢၼ်ႇတင်ႈၵဵတ်ႉပႂ်ႉၼိူဝ်သဵၼ်ႈတၢင်း ဢၼ်လုၵ်ႉဝဵင်းလိူဝ်ႇ ၵႂႃႇဝဵင်းမူႇ ၸေႊၼႆႉ ၵဵပ်းငိုၼ်း ယွၼ်းၶွၼ်ႇတီႈၸဝ်ႈရူတ်ႉၸဝ်ႈၵႃးၵူၺ်းဢမ်ႇၵႃး သိမ်းပႃးၶူဝ်းၵုၼ်ႇ ၸိူဝ်းပဵၼ်ၶဝ်ႈ ၼမ်ႉတၢင်းၵိၼ် မိူၼ်ၼင်ႇ ၶဝ်ႈသၢၼ်၊ ၼမ်ႉမၼ်း၊ ၵိူဝ် ဢၼ်ၸဝ်ႈၵႃး တေႃႉတၢင်ႇမႃး ၸိူဝ်းၼၼ်ႉထႅင်ႈ လူးၵွၼ်ႇၼႆ ၸဝ်ႈၵႃး ဢၼ်လႅၼ်ႈၼိူဝ် သဵၼ်ႈတၢင်းဝဵင်းလိူဝ်ႇ – မူႇၸေႊ ၵေႃႉၼိုင်ႈ လၢတ်ႈၼႄၼင်ႇၼႆ။

“လမ်ႇလွင်ႈသုတ်းတႄႉ တီႈၵဵတ်ႉသိုၵ်းမၢၼ်ႈၼၼ်ႉယဝ်ႉ ၸႅတ်ႈၵျၢမ်းလိူဝ်ပိူၼ်ႈ။ ပေႃးဝႃႈ တၢင်ႇပႃးၶဝ်ႈ သၢၼ်၊ ၼမ်ႉမၼ်း ၶူဝ်းၸိူဝ်းဢၼ်ၶဝ်ႁၢမ်ႈဝႆႉၼၼ်ႉ ၺႃးသိမ်းၵမ်းလဵဝ်ယဝ်ႉ။ ယဝ်ႉၵေႃႈ ပေႃးတၢင်ႇပႃး ၼမ်ႉမၼ်းၸၢၵ်ႈမႃးၼႆ တိုၼ်းဢမ်ႇလွတ်ႈႁႄဢိတ်း လႆႈၶျႃႉဝႆႉပၼ်ၶဝ်ဢိူဝ်ႈ”- ဝႃႈၼႆ။

ၵဵတ်ႉသိုၵ်းမၢၼ်ႈ ဢၼ်ၵူတ်ႇထတ်းႁႅင်းလိူဝ်ပိူၼ်ႈ ၼိူဝ်သဵၼ်ႈတၢင်းလူင် ဝဵင်းလိူဝ်ႇ – မူႇၸေႊၼႆႉ ပဵၼ်တီႈတူၼ်ႈတီး ၵဵတ်ႉ 4 လၵ်း၊ မိူင်းၼွင်၊ ပၢင်လူင်၊ လၢႆးၶႃႈ၊ မိူင်းၵိုင် ၸဵမ်ၸိူဝ်းၼႆႉ။

ၵွၼ်ႇပႆႇပဵၼ်ပၢင်တိုၵ်း ၼႂ်းမိူင်းတႆးပွတ်းႁွင်ႇၼၼ်ႉတႄႉ ၶၢဝ်းတၢင်းဝဵင်းလိူဝ်ႇ – မူႇၸေႊၼႆႉ ၶၢဝ်းတၢင်း ဢမ်ႇၸိူင်ႉသေ ႁွတ်ႈလႆႈဝၼ်းလဵဝ်သေတႃႉ ဝၢႆးလင်ပၢင်တိုၵ်းယဝ်ႉ ၵူၼ်းမိူင်းတႆးပွတ်းႁွင်ႇ ဢွၵ်ႇၶၢဝ်း တၢင်းဢမ်ႇထိုင်တီႈထိုင်တၢင်း မီးလွင်ႈယၢပ်ႇၵူႈလွင်ႈလွင်ႈလႄႈ ႁဵတ်းႁႂ်ႈႁိုင်ၸွမ်းတၢင်း 2 ဝၼ်း 3 ဝၼ်း ၸိူဝ်းၼႆႉၵေႃႈမီး။ ၼၼ်ႉၵူၺ်းဢမ်ႇၵႃး သိုၵ်းၸိူဝ်းတင်ႈၵဵတ်ႉလၢၼ်ႇ ယွၼ်းၵိၼ်ၸွမ်းတၢင်းၵေႃႈ ၼမ်လိူဝ်မႃးႁႅင်းလႄႈ ႁဵတ်းႁႂ်ႈၵူၼ်းမိူင်းသဵင်ႈငိုၼ်းၼမ်လိူဝ်ၵဝ်ႇၼႆ ၵူၼ်းၼုမ်ႇ ဢႃယု 30 ပၢႆ ၵေႃႉၼိုင်ႈ လၢတ်ႈၼႄၼင်ႇၼႆ။

“တေဝႃႈဢမ်ႇၵႂႃႇၼႆၵေႃႈ သမ်ႉလူဝ်ႇႁဵတ်းႁႃၵိၼ်လဵင်ႉတွင်ႉယူႇ။ မိူဝ်ႈလဵဝ်သမ်ႉ ပေႃးတေလႆႈဢွၵ်ႇတၢင်း ၼိုင်ႈပွၵ်ႈၼႆ ပေႃးၶီႇၸႂ်လူင်ဝႆႉယဝ်ႉ။ ၸွမ်းတၢင်းၵေႃႈ တေပဵၼ်သင်ဢမ်ႇႁူႉ။ လႆႈမႆႈၸႂ်ယူႇတႃႇသေႇ။ ၵဵတ်ႉၵေႃႈၼမ်ၼႃႇ ဢေႇသုတ်းမၼ်း လႆႈပၼ်ယူႇ ၼိုင်ႈတီႈ 5 ႁဵင် ၼိုင်ႈမိုၼ်ႇ ၸိူဝ်းၼႆႉ။ ႁဵတ်းႁႃၵိၼ်ယၢပ်ႇၼႃႇ”- ဝႃႈၼႆ။

လႆႈႁူႉဝႃႈ ယၢမ်းလဵဝ် ၼႂ်းမိူင်းတႆးပွတ်းႁွင်ႇၼႆႉ ပေႃးလုၵ်ႉတၢင်းမူႇၸေႊ ၶၢမ်ႈၵဵတ်ႉမၢၼ်ႈဢွၵ်ႇမႃးၸိုင် တေမီးသိုၵ်းရၶႅင်ႇ AA ပႂ်ႉဝႆႉ၊ သင်ပူၼ်ႉၵဵတ်ႉတီႈၼၼ်ႉယဝ်ႉသေ လုၵ်ႉတီႈဝဵင်းၼမ်ႉၶမ်း တေႃႇပေႃးထိုင် ဝဵင်းမိူင်းယႆ တေလႆႈႁၼ်သိုၵ်းၸၢဝ်းၶိူဝ်း တင်ႈလၢၼ်ႇဝႆႉ လၢႆလၢႆတီႈ ၼႆယဝ်ႉ။

“တင်ႈတႄႇ ၼမ်ႉၶမ်း တေႃႇပေႃးထိုင် ၵူတ်ႉၶၢႆၼႆႉ တေပဵၼ်သိုၵ်းၶၢင်တင်း သိုၵ်းလွႆပႂ်ႉၵဵပ်းၶွၼ်ႇ။ သိုၵ်းၵဝ်ႈၵၢင်ႉၼႆႉ ပေႃးထိုင်တီႈတၢင်းၶဝ်ႈသႅၼ်ဝီ ၸင်ႇတေပႂ်ႉၵူၺ်း။ ဢၼ်ၶဝ်ၵႆႉထတ်းၵျၢမ်းၼႆႉ ပဵၼ်တီႈတၢင်းၶဝ်ႈႁိမ်းဝဵင်းလႃႈသဵဝ်ႈတင်း သႅၼ်ဝီၼၼ်ႉၼေႈ” – ဝႃႈၼႆ။

ယၢမ်းလဵဝ် ၵူၼ်းမိူင်းၸိူဝ်းယူႇသဝ်းၼႂ်းမိူင်းတႆးပွတ်းႁွင်ႇၼႆႉ လႆႈၶၢမ်ႇတၢမ်ႇ ပၢင်တိုၵ်းသိုၵ်းသိူဝ်ႁၢဝ်ႈႁႅင်း။ ယွၼ်ႉသိုၵ်းမၢၼ်ႈတင်း သိုၵ်းၸၢဝ်းၶိူဝ်း မီးလွင်ႈပၼ်ႁႃၵၼ်ၵူၺ်းဢမ်ႇ ၵႃး ဝၢႆးလင်မႃးၼႆႉ သိုၵ်းၸၢဝ်းၶိူဝ်း ၼင်ႇၵၼ်ၵေႃႈ ဢမ်ႇထုၵ်ႇမေႃၽေႃးၵႂၢမ်းၵၼ်သေ ၵိူတ်ႇပဵၼ်ပၼ်ႁႃမႃးဢမ်ႇထၢတ်ႇဢမ်ႇဝၢႆး ၼႆယဝ်ႉ။  

တႅမ်ႈ – ၽူၺ်းၼုမ်ႇ