ဝၢႆးသေသိုၵ်းမၢၼ်ႈယိုတ်းမိူင်းယဝ်ႉ ၵူၼ်းမိူင်းထူပ်းတၢင်းယၢပ်ႇၽိုတ်ႇလၢႆလွင်ႈ ပႃးၸဵမ်လွင်ႈယူႇသဝ်းၵိၼ်သၢင်ႈလႄႈ လွင်ႈၵႂႃႇလွင်ႈမႃးၸိူဝ်းၼႆႉ။ ယွၼ်ႉၵူႈလွင်ႈလွင်ႈ ဢမ်ႇမီးလွင်ႈထၢင်ႇႁၢင်ႈလႄႈ တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်း ။ ထိုင်မိူဝ်ႈလဵဝ် ၵဵတ်ႉမၢၼ်ႈ ၼႂ်းၵႄႈသဵၼ်ႈတၢင်း တႃႈၶီႈလဵၵ်း – ၵဵင်းတုင် တိုၵ်ႉၵူတ်ႇထတ်း ဢမ်ႇယင်ႉ ဢမ်ႇလိုဝ်ႈ။ ယႃႇဝႃႈ တေၵိုတ်းလွင်ႈၵမ်ၵိၼ်းၵူၼ်းမိူင်း သမ်ႉၶႅၼ်းႁၢင်ႈႁၢႆႉလိူဝ်ၵဝ်ႇလူးၵွၼ်ႇ ဝႃႈၼႆ ။

မိူဝ်ႈၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ပႆႇယိုတ်းမိူင်းတႄႉ သင်တေႃႉၵုၼ်ႇ ၼႂ်းၵႄႈသဵၼ်ႈတၢင်း တႃႈၶီႈလဵၵ်း တေႃႇႁွတ်ႈ ၵုၼ်ႁဵင် မိူင်းသူႈ ၸိူဝ်းၼႆႉ ၸဝ်ႈၵႃးလႆႈပၼ်ငိုၼ်းၸွမ်းၵဵတ်ႉ/လၢၼ်ႇ တင်းသဵင်ႈ 7- 8 သႅၼ်ပျႃး။ မွၵ်ႈၼၼ်ႉၵူၺ်းသမ်ႉပေႃးၼၵ်းၸႂ်ၽႂ်မၼ်းယဝ်ႉ ။

ငဝ်းလၢႆးမိူဝ်ႈလဵဝ်သမ်ႉ ၵႃးတၢင်ႇၵုၼ်ႇၼိုင်ႈလမ်းလႂ် လႆႈၸႂ်ႉၸၢႆႇငိုၼ်းပၼ် ၸွမ်းၵဵတ်ႉမၢၼ်ႈ ၸိူဝ်းၼၼ်ႉ လုၵ်ႉတီႈ 7 – 8 သႅၼ်သေ သဵင်ႈထိုင် 15 သႅၼ်ပျႃး ။ လႆႈသဵင်ႈငိုၼ်းၼမ်သေတႃႉ ၵုၼ်ႇတႄႉဢမ်ႇၸၢင်ႈတၢင်ႇၼမ်ၶိုၼ်ႈမႃး ယင်းၺႃး ႁႄႉႁၢမ်ႈဢမ်ႇၶႂ်ႈပၼ်တေႃႉ ၵုၼ်ႇသႅၼ်းၼၼ်ႉသႅၼ်းၼႆႉလူးၵွၼ်ႇ ၼႆ ၵူၼ်းႁေႃႈရူတ်ႉၵႃး ၼႂ်ႈၵႄႈ တႃႈၶီႈလဵၵ်း ၵုၼ်ႁဵင်ၵေႃႉၼိုင်ႈလၢတ်ႈၼင်ႇၼႆ။

ဢိင်ၼိူဝ် ၵဵတ်ႉသိုၵ်းမၢၼ်ႈ ၵူတ်ႇထတ်းႁႅင်းသေ ၵူၼ်းမိူင်းႁဵတ်းၵၢၼ်လဵင်ႉတွင်ႉယၢပ်ႇ ။ ၽိူဝ်သေလႆႈသဵင်ႈငိုၼ်းၼမ် ပွတ်းတႃႈပွတ်းတၢင်း သဵၼ်ႈတၢင်းတႃႇႁေႃႈရူတ်ႉလႅၼ်ႈၵႂႃႇမႃးသမ်ႉ ယၢပ်ႇ။ ရူတ်ႉၵႃးၵေႃႈၵွႆငၢႆႈ ၊ ၵႃႈမႄးမၼ်းၵေႃႈ ၵႃႈယႂ်ႇၶၼ်လူင် ဢမ်ႇႁူႉတေႁႃႁဵတ်းၵၢၼ်သင်ႁႂ်ႈငၢႆႈလူမ်ၸႂ် ၼႆ ၵူၼ်းႁေႃႈရူတ်ႉၵႃး တႃႈၶီႈလဵၵ်း – ၵုၼ်ႁဵင် လၢတ်ႈဝႆႉၼင်ႇၼႆ

မၼ်းၵႂႃႇၵၼ်ႁႅင်းၼႃႇၶႃႈ မိူဝ်ႈဢွၼ်တၢင်းၼႆႉ 3 ပုၼ်ႈၼႆႉ တေလႆႈယူႇ မွၵ်ႈ 2 ပုၼ်ႈ၊ မိူဝ်ႈလဵဝ်ၼႆႉတႄႉ ပေႃး 3 ပုၼ်ႈၵေႃႈ တေလႆႈၼိုင်ႈပုၼ်ႈၸိူင်ႉၼႆၵွႆးယဝ်ႉဝႃႈ၊ ယဝ်ႉၵေႃႈထႅင်ႈမဵဝ်းၵေႃႈ သဵၼ်ႈတၢင်းၵေႃႈယၢပ်ႇၼႃႇ၊ ပေႃးတၢင်းယၢပ်ႇမႃး ၵႃးၵေႃႈသမ်ႉၵွႆ ပေႃးၵွႆမႃး မႄးၵႃးၼိုင်ႈၵမ်းၵေႃႈ ဢမ်ႇလႆႈၶႃႈၼႆ။ မၼ်းဢမ်ႇလႆႈလႅၼ်ႈမိူၼ်မိူဝ်ႈဢွၼ်တၢင်း မိူဝ်ႈလဵဝ်ၼႆႉ 2 ၶွၵ်ႉၸိူင်ႉၼႆၵွႆးဢေႃႈ။ ႁဝ်းဝႃႈငဝ်းလၢႆးမၼ်း ဢမ်ႇပၼ်မႃးသေဢိတ်းၶႃႈၼေႈ တႃႇတေမိူၼ်ၵဝ်ႇၼႆႉ၊ မိူဝ်ႈလဵဝ်ၼႆႉ လႅၼ်ႈၵႃးၵေႃႈ ၶႅၼ်းသေၵႂႃႇႁဵတ်းလုုၵ်ႈလဵင်ႉပိူၼ်ႈၸိူင်ႉၼၼ်ၵွႆး တေႃႉတႄႉ ပေႃးယူႇပေႃးၵိၼ်လႆႈၸိူင်ႉၼၼ်ၵွႆးယဝ်ႉ

ၵမ်ႈၼမ် ၶူဝ်းၵုၼ်ႇ တႃႇႁွတ်ႈမႃးၼႂ်းမိူင်းတႆးၼႆႉ လႆႈတေႃႉဢဝ် မႃးတၢင်းလႅၼ်လိၼ်ပဵၼ်ပိူင်လူင် ။ မိူဝ်ႈလဵဝ် တႃႇ တေႃႉ ၶၢမ်ႈလႅၼ်လိၼ်ၵေႃႈယၢပ်ႇ ။ ၶွၼ်ႇၵေႃႈ လႆႈပၼ်ၼမ်လႄႈ တေႃႇထိုင် ၼႂ်းမိုဝ်း ၸဝ်ႈႁၢၼ်ႉၸဝ်ႈသႅင်ႇၵေႃႈ လႆႈသဵင်ႈလၢႆတႃလႄႈ ၵူၼ်းမိူင်းတေသိုဝ်ႉတေၶၢႆတေႃႇၵၼ်ပေႃးယၢပ်ႇ ။

မိူၼ်ဢွၼ်တၢင်း ၶဝ်ႈသွႆးႁႅင်ႈၸိူဝ်းၼႆႉ ၵႃႈတၢင်ႇမၼ်း သဵင်ႈမွၵ်ႈမိုၼ်ႇႁႃႈ ၼႆႉၵူၺ်း။ ဝၢႆးသေ မီးမႃး ၽႅၼ်ၵၢၼ် ပၢၵ်ႇဝၼ်း ရက် 100 စီမံကိန်း ၼႆႉ ၵႃႈမၼ်းၶိုၼ်ႈ 25000 ထိုင် 30000 ပျႃး ။ တေႃႈၼင်ႇလႆႈပၼ် ငိုၼ်းၸိူင်ႉၼၼ် ယင်းဢမ်ႇတေႃႉလႆႈငၢႆႈငၢႆႈ ။

ၼၢင်းယိင်း ၵူၼ်းၵႃႉၶၢႆၵုၼ်ႇ ဝဵင်းၵႃလီႉၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

ၵူၺ်းၵႃႈ ဢမ်ႇမႃးလႆႈမိူၼ်ၸႂ်ၶႃႈ၊ ပေႃးဝႃႈ ၶဝ်ႁတ်းတၢင်ႇမႃးၵေႃႈလႆႈသေ မၢင်ပွၵ်ႈၵေႃႈဢမ်ႇလႆႈသေ ႁဵတ်းၼၼ်ၵွႆးဢေႃႈ။ ၸဝ်ႈၵႃးဢၼ်ႁူႉၸၵ်းၶဝ်ၵေႃႈ တေတၢင်ႇမႃးပၼ်ဢိတ်းဢိတ်း ၶူဝ်းဢၼ်လွင်ႈယႂ်ႇမၼ်း ႁဵတ်းၼၼ်ၵွႆးၶႃႈ၊ ၶဝ်ၵေႃႈ တေၸုၼ်ႉသေဢဝ်မႃးၼၼ်ႉၶႃႈၼႃႇၼေႃႈ ပေႃးဝႃႈၺႃး မိူၼ်ၸိူင်ႉပိူၼ်ႈၸႅတ်ႈႁႃႉၼႆၵေႃႈ သမ်ႉတေလႆႈလၢတ်ႈၵႂၢမ်းၼမ်ၽွင်ႈ ။ ပၼ်ငိုၼ်းၸၢႆႇၶဝ်ဢိတ်းဢွတ်းသေ ၼၼ်ႉၶႃႈၼႃႇ ၸွမ်းၵဵတ်ႉ ၸွမ်းလၢၼ်ႇၵေႃႈ

သိုၵ်းမၢၼ်ႈ ဢွၵ်ႇပိူင် ႁၢမ်ႈၵုၼ်ႇဢၼ်လတ်းၶဝ်ႈမႃးတၢင်း လႅၼ်လိၼ် မိူဝ်ႈ 2025 တင်းမူတ်း မီး 35 သႅၼ်း

ယၢမ်းလဵဝ် ၸုမ်းသိုၵ်းမၢၼ်ႈ ၶိုၼ်းပိုၼ်ၽၢဝ်ႇၶူင်းၵၢၼ် 100 ဝၼ်းၼႆသေ တင်ႈတႄႇ လိူၼ်ဢေႇပရိူဝ်ႊ ဝၼ်းတီႈ 20 တေႃႇထိုင် လိူၼ်ၵျူႊလၢႆႊ ပီ 2026 ၼႆႉ တေမႄးၵုမ်းၵၢၼ်ငၢၼ်းလၢႆလၢႆတွၼ်ႈ ၼင်ႇၵၢၼ်ၵုမ်းထိင်းၵႄႈၶႆ ၶၼ်ၵုၼ်ႇ သုင်ၸိူဝ်းၼႆႉ ။
ယွၼ်ႉၼၼ် ၵူၼ်းမိူင်းၶဝ်တႄႉ ႁၼ်ထိုင်ဝႃႈ ၵၢၼ်ၵုမ်းထိင်းတေႃႉၶူဝ်းၵုၼ်ႇၼႆႉ ယိုင်ႈၶႅၼ်းႁဵတ်းႁႂ်ႈၶၼ်ၵုၼ်ႇသုင် ထႅင်ႈၵွႆးၼႆယဝ်ႉ။

ယၢမ်းလဵဝ် ယွၼ်ႉၶၼ်ၶူဝ်းၵုၼ်ႇ လႆႈၵိုတ်းယင်ႉတင်းၼမ်လႄႈ ၽွၼ်းယွၼ်ႈဢၼ်မႃးၸွမ်းတင်းလင်ၵေႃႈ မီးဝႆႉလၢႆပိူင် ။ ဢၼ်ၼႃႇလိူဝ်ႁႅင်းၵေႃႈ ၶၼ်ၵုၼ်ႇၵေႃႈပုင်ႈၶိုၼ်ႈၵူႈမိုဝ်ႉၵူႈဝၼ်း ၵူၼ်းမိူင်းၸိူဝ်းႁဵတ်းၵၢၼ် ပၢႆးမၢၵ်ႈမီး ပႃးၸဵမ်ၵူၼ်းၸိူဝ်းႁႃၸဝ်ႉၵိၼ်ၶမ်ႈၶဝ်ၵေႃႈမီးႁႅင်းႁိပ်ႇ တႃႇၵၢၼ်ႁႃၵိၼ်လဵင်ႉတွင်ႉႁင်းၽႂ်မၼ်း။