တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA သင်ႇဢိုတ်း ႁူင်းယႃသုၼ်ႇတူဝ်ၵူၼ်းမိူင်း ဝဵင်းၼမ်ႉၶမ်း မီးၶၢဝ်းတၢင်း 10 ဝၼ်းပၢႆယဝ်ႉ ပႆႇပိုတ်ႇ ၵူၼ်းမိူင်းတုၵ်းယွၼ်းႁႂ်ႈပိုတ်ႇပၼ်ၶိုၼ်း ဝႃႈၼႆ။

ဝၼ်းတီႈ 01/03/2025 ၼၼ်ႉ ယူႇတီႈ သိုၵ်းတဢၢင်း သင်ႇဢိုတ်း ႁူင်းယႃသုၼ်ႇတူဝ်ၵူၼ်းမိူင်း “ၶျႄႇရီႇမျေႇ” ဢၼ်ပိုတ်ႇဝႆႉတီႈၼႂ်းပွၵ်ႉၼွင်ၸၢင်ႉ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၺႃးဢိုတ်းၵႂႃႇယဝ်ႉ။ ယွၼ်ႉသင်သေ သိုၵ်းလွႆၶဝ် သင်ႇဢိုတ်းပႅတ်ႈတႄႉ ဢမ်ႇလႆႈႁူႉၸွမ်းႁူဝ်ယွႆႈမၼ်းၶႃႈ။ မေႃယႃလႄႈ တင်း ၵူၼ်းႁဵတ်းၵၢၼ် တီႈၼႂ်းႁူင်းယႃၼၼ်ႉတႄႉ ပဵၼ်ၵူၼ်းပိုၼ်ႉတီႈ ၼႂ်းဝဵင်းၼမ်ႉၶမ်းၼႆႉဢေႃႈ”- ဝႃႈၼႆ။

လႆႈႁူႉဝႃႈ ႁူင်းယႃၶျႄႇရီႇမျေႇၼႆႉ တႄႇပိုတ်ႇမႃး မိူဝ်ႈပီ 2022 ဝၢႆးလင် ၶၢဝ်းတၢင်းပဵၼ်ၶူဝ်ႊဝိတ်ႉ 19 ၼၼ်ႉမႃး ၼႆယဝ်ႉ။

ယၢမ်းလဵဝ် သိုၵ်းတဢၢင်းသမ်ႉ ၵဵပ်းၶွၼ်ႇႁၢၼ်ႉၶၢႆယႃႈယႃ၊ ႁွင်ႈယႃ (ဆေးခန်း) ၸိူဝ်းၼႆႉ ၼမ်ႁႅင်း။ မိူၼ်ၼင်ႇ ႁၢၼ်ႉၶၢႆယႃႈယႃ 40 သႅၼ်ပျႃး – 60 ပျႃး ဢဝ်ၸွမ်းႁၢၼ်ႉလဵၵ်ႉ/ ယႂ်ႇ။ ပေႃးပဵၼ်ႁွင်ႈယႃသမ်ႉ 120 သႅၼ်ပျႃး တေႃႇပီ ၼႆယဝ်ႉ။

“ႁဝ်းၶႃႈ ၵူၼ်းမိူင်းတႄႉ တုၵ်းယွၼ်းထိုင် လွင်ႈၵဵပ်းၶွၼ်ႇၼႆႉ ၶႅၼ်းတေႃႈ လူတ်းယွမ်းပၼ်ၽွင်ႈ။ ပေႃးၵဵပ်းၼမ်ၵေႃႈ ႁဝ်းၶႃႈၵူၼ်းမိူင်းၵူၺ်း တေတုၵ်ႉၶႁႅင်း။ တေလႆႈသိုဝ်ႉၵိၼ်ယႃႈယႃ – ယူတ်းယႃတူဝ် ၸိူဝ်းၼႆႉ လႆႈပၼ်ၵႃႈၶၼ်ၼမ်လႄႈ ငဝ်ႈၶၢမ်ႇပိုၼ်ႉၵူၼ်းမိူင်းၼမ်ႉၶမ်းႁဝ်းၶႃႈၼႆႉ ဢၼ်လမ်ႇလွင်ႈမၼ်း ပဵၼ်ပၢႆးပၺ်ႇၺႃႇလႄႈ ပၢႆးယူႇလီ ၼၼ်ႉယဝ်ႉ။ လွင်ႈၸိူဝ်းၼႆႉ ၶႂ်ႈႁႂ်ႈသိုၵ်းၶဝ် တူၺ်းထိုင်ပၼ်ၵူၼ်းမိူင်းၼမ်ၼမ်သေၵမ်း”- ၵူၼ်းပိုၼ်ႉတီႈ ဝဵင်းၼမ်ၶမ်း သိုပ်ႇလၢတ်ႈၼႄၼင်ႇၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူးၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA လူၺ်းယေႇဢူးၵေႃႈ ဢမ်ႇလႆႈ။

ဝဵင်းၼမ်ႉၶမ်းၼႆႉ သိုၵ်းတဢၢင်း ယိုတ်းၵုမ်းမႃး တင်ႈတႄႇဝၼ်းတီႈ 19/12/2023 ၼၼ်ႉမႃး ႁၢၼ်ႉတေႃႇထိုင်တေႃႈလဵဝ်။

ယၢမ်းလဵဝ် ၼႂ်းၼႃႈတီႈ တပ်ႉသိုၵ်းတဢၢင်း TNLA ယိုတ်းၵုမ်းလႆႈဝႆႉ ဝၢႆးလင် ၽႅၼ်ယၼ်ႇသိုၵ်း 1027 ၼၼ်ႉမႃး ဢမ်ႇယွမ်း 10 ၸႄႈဝဵင်းယဝ်ႉ။ မိူၼ်ၼင်ႇ – ၸႄႈဝဵင်းၼမ်ႉၶမ်း၊ သီႇပေႃႉ၊ ၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉတူႈ၊ မိူင်းၵုတ်ႈ၊ မိူင်းမိတ်ႈ၊ ၵူတ်ႉၶၢႆ၊ ၼွင်ၶဵဝ်၊ ၵျွၵ်ႉမႄး (မိူင်းလူင်၊ မိူင်းငေႃႉ) ၸိူဝ်းၼႆႉ။

တႅမ်ႈ – ၽူၺ်းၼုမ်ႇ