မိူဝ်ႈၼႆႉ ဝၼ်းတီႈ 12/03/2025 ႁွင်ႈၵၢၼ်ၶၢဝ်ႇလူင်ပွင်ၸိုင်ႈ မိူင်းမၢၼ်ႈ ပိုၼ်ၽၢဝ်ႇဝႆႉဝႃႈ မိူဝ်ႈဝႃး ဝၼ်းတီႈ 11/03/2025 ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ႁူပ်ႉထူပ်းၵၼ်တင်း တိူင်ႉသျီႊၵျုၼ်ႊ (Deng Xijun) ၽွင်းလူင် ၾၢႆႇၼွၵ်ႈမိူင်း တူဝ်တႅၼ်းလူင်ပွင်ၸိုင်ႈမိူင်းၶႄႇ တီႈဝဵင်းလူင်ၼေႇပျီႇတေႃႇ ဝႃႈၼႆ။

ႁူပ်ႉဢုပ်ႇၵၼ် လွင်ႈပၢင်လိူၵ်ႈတင်ႈ ဢၼ်တေၸတ်းႁဵတ်းၶိုင်ပွင်ၵႂႃႇ ၼႂ်းႁၢင်ပီ 2025 ၼႆႉသေ ၾၢႆႇလူင်ပွင်ၸိုင်ႈမိူင်းၶႄႇ တေႁဵတ်းႁိုဝ်ႁူမ်ႈတူင်ႉၼိုင်ၸွမ်း ၼႂ်းၵၢၼ်ႁၢင်ႈႁႅၼ်း တႃႇပၢင်လိူၵ်ႈတင်ႈလႄႈ ဢုပ်ႇဢူဝ်းၵၼ် ၼႂ်းငဝ်းလၢႆးၶၵ်ႉၵၢၼ်ငမ်းယဵၼ် ဢၼ်မိူင်းၶႄႇႁူမ်ႈမိုဝ်းၸွႆႈထႅမ်ဝႆႉၼၼ်ႉ ၼႆယဝ်ႉ။

ၽွင်းၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လုၵ်ႉမိူင်းပႄႇလႃႇလိတ်ႊလႄႈ မိူင်းရတ်းသျႃး ပွၵ်ႈမႃးၽႅဝ်ၶိုၼ်း တီႈၼေႇပျီႇတေႃႇ မွၵ်ႈၼိုင်ႈဝၼ်းၵူၺ်း တူဝ်တႅၼ်းလူင်ပွင်ၸိုင်ႈမိူင်း ၶႄႇ မိတ်ႊသတိူဝ်ႊ တိူင်ႉသျီႊၵျုၼ်ႊၵေႃႈ ဢွၵ်ႇၶၢဝ်းတၢင်းႁွတ်ႈထိုင်မႃးတီႈ ဝဵင်းလူင်ၼေႇပျီႇတေႃႇၵမ်းလဵဝ် ၼႆယဝ်ႉ။

ၵဵဝ်ႇၵပ်းလူၺ်ႈ လွင်ႈၼႆႉသေ ၽူႈလဵပ်ႈႁဵၼ်းၾၢႆႇၵၢၼ်မိူင်းၶဝ်ၵေႃႈ ထတ်းသၢင်ဝႃႈ ၾၢႆႇမိူင်းၶႄႇ မႆႈၸႂ် ၵူဝ်ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ မီးလွင်ႈၸမ်ၸႂ်ၵၼ်တင်း မိူင်းရတ်းသျႃး ၼမ်လိူဝ်ၶဝ် ဝႃႈၼႆ။

ၼႂ်းလိၵ်ႈၽိုၼ်ၶၢဝ်ႇ ဢၼ်သိုၵ်းမၢၼ်ႈၵုမ်းၵမ်ဝႆႉၼၼ်ႉ ဢွၵ်ႇဝႆႉဝႃႈ လွင်ႈဢၼ်ၾၢႆႇလူင်ပွင်ၸိုင်ႈမိူင်းၶႄႇ မႃးႁူပ်ႉၵၼ်တင်း ၸွမ်ၸိၵ်းသိုၵ်းမိၼ်းဢွင်ႇလၢႆႇၼႆႉ ဢုပ်ႇဢူဝ်းၵၼ်ၵဵဝ်ႇလူၺ်ႈလွင်ႈ ၵၢၼ်လွၵ်ႇလႅၼ် ၵိၼ်ငိုၼ်း တင်းဢွၼ်ႊလၢႆႊ၊ ၵၢၼ်ႁႄႉႁၢမ်ႈ လွင်ႈယႃႈမဝ်းၵမ်သေ တင်းသွင်မိူင်း တေႁူမ်ႈၵၼ် ႁဵတ်းသၢင်ႈၵႂႃႇ။ ၼွၵ်ႈလိူဝ်ၼၼ်ႉၵေႃႈ ဢုပ်ႇဢူဝ်းပႃး လွင်ႈၵၢၼ်ၵႃႉၶၢႆ မိူင်းမၢၼ်ႈ – မိူင်းၶႄႇထႅင်ႈ ၼႆယဝ်ႉ။

ပၢင်ႁူပ်ႉထူပ်းဢုပ်ႇဢူဝ်း တူဝ်တႅၼ်း လူင်ပွင်ၸိုင်ႈမိူင်းၶႄႇတင်း သိုၵ်းမၢၼ်ႈ ပွၵ်ႈၼႆႉ ၵႅမ်ၽူႈၼမ်းၼႂ်း သိုၵ်းမၢၼ်ႈ ၸွမ်သိုၵ်း ယေးဝိၼ်းဢူးတင်း ၸွမ်သိုၵ်း ယႃႇပျေႉ ၽွင်းလူင် ၾၢႆႇလႅၼ်လိၼ် မိူင်းမၢၼ်ႈၵေႃႈ ၶဝ်ႈႁူမ်ႈၸွမ်း ၼႆယဝ်ႉ။

မိူဝ်ႈဝၼ်းတီႈ 10/03/2025 ၼၼ်ႉၵေႃႈ မိတ်ႊသတိူဝ်ႊ တိူင်ႉသျီႊၵျုၼ်ႊၼႆႉ ႁူပ်ႉထူပ်းၵၼ်တင်း ၽွင်းလူင် ၾၢႆႇႁွင်ႈၵၢၼ်မိူင်းၼွၵ်ႈ သိုၵ်းမၢၼ်ႈ ဢူးတၢၼ်းသူၺ်ႇသေ ဢုပ်ႇဢူဝ်းလွင်ႈ မိုတ်ႈၵိုဝ်းၼႅင်ႈသၢၼ် မိူင်းမၢၼ်ႈ – မိူင်းၶႄႇ ၼႆယဝ်ႉ။

လႆႈႁူႉဝႃႈ မိတ်ႊသတိူဝ်ႊ တိူင်ႉသျီႊၵျုၼ်ႊၼႆႉ တေသိုပ်ႇၶၢဝ်းတၢင်းၵႂႃႇ မိူင်းထႆး ဝဵင်းၵဵင်းမႂ်ႇၼႆသေတႃႉ တေၵႂႃႇႁူပ်ႉၵၼ်တင်းၽႂ်ၼႆတႄႉၵေႃႈ ပႆႇလႆႈႁူႉၸွမ်းၸႅင်ႈလႅင်း ၼႆယဝ်ႉ။

တႅမ်ႈ – ၽူၺ်းၼုမ်ႇ