တႄႇႁူဝ်လိူၼ်မၢတ်ႊၶျ်ၼႆႉမႃး တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တႄႇဢွၵ်ႇၶေႃႈပူင်ဝႃႈ ၵူၼ်းမိူင်းၵူႈ​ၵေႃႉ ၸိူဝ်းဢႃယု 18 ပီ တေႃႇ 45 ပီ တေလႆႈႁၢပ်ႇထၢမ်းၵၢၼ်သိုၵ်း ၼိုင်ႈႁိူၼ်းၼိုင်ႈၵေႃႉ တၵ်းတေလႆႈၶဝ်ႈႁဵတ်းသိုၵ်း ၼႂ်းၸႄႈဝဵင်းမိူင်းၵုတ်ႈ ၸိုင်ႈတႆးပွတ်းႁွင်ႇ ဝႃႈၼႆ။

ၵူၼ်းပိုၼ်ႉတီႈ ၵေႃႉၼိုင်ႈ ဝဵင်းမိူင်းၵုတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢမ်ႇၸႂ်ႈဝႃႈ ၶဝ်ၵဵပ်းၵူၼ်းလွႆ (ပလွင်ႈ) ၶဝ်ၵူၺ်း။ တေလႆႈပၼ်ၶဝ် ၼိုင်ႈႁိူၼ်းၼိုင်ႈၵေႃႉဝႃႇ။ ၶဝ်တေဢဝ်ႁဵတ်း မိူၼ်ၼင်ႇ သိုၵ်းပႂ်ႉ ဝၢၼ်ႈဝဵင်းၼၼ်ႉယူဝ်ႉ။ ငိၼ်းဝႃႈၼၼ်ယဝ်ႉ”- ဝႃႈၼႆ။

မိူၼ်ၼၼ်ၼင်ႇၵဝ်ႇ တၢင်းမိူင်းတႆးပွတ်းႁွင်ႇ ၸႄႈဝဵင်းၼမ်ႉၶမ်းၸိူဝ်းၼႆႉၵေႃႈ သိုၵ်းတဢၢင်းၶဝ် ၵဵပ်းၵူၼ်းမိူင်း ႁဵတ်းသိုၵ်းမႂ်ႇလႄႈ ၵူၼ်းမိူင်းမၢင်ၸိူဝ်း ဢမ်ႇၽွမ်ႉၸႂ်သေ ႁွင်ႉဢဝ် မုင်ႉႁေႃႁိူၼ်း ဢွၵ်ႇပၢႆႈငိူင်ႉဝႄႈၵႂႃႇယူႇဝႆႉ တၢင်ႇဝၢၼ်ႈတၢင်ႇမိူင်း ဢမ်ႇပွၵ်ႈမႃးယူႇၶိုၼ်းႁိူၼ်း ၸဵမ်ၸိူဝ်းၼႆႉ။

လႆႈႁူႉဝႃႈ တီႈၼႂ်းၸႄႈဝဵင်းၼမ်ႉၶမ်းၼႆႉ လင်ႁိူၼ်းၵူၼ်းၸိူဝ်းဢမ်ႇမီးၵူၼ်းယူႇသဝ်းၼႆႉ သိုၵ်းတဢၢင်းၶဝ် ယိုတ်းဢဝ်သေ ၶိုၼ်းၶၢတ်ႈပၼ် ၸဝ်ႈၵၢၼ်ပၢႆးမၢၵ်ႈမီးၶႄႇၶဝ် မႃးၶၢတ်ႈၼႆ – ၵူၼ်းမိူင်းဝဵင်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။

“ႁိူၼ်းၸိူဝ်းဢၼ်ၶဝ်ယိုတ်း(သိမ်း) ဢဝ်ၼၼ်ႉ ၶၢတ်ႈပၼ်ၶႄႇၶဝ်ၶိုၼ်း။ ၶႄႇၶဝ်သမ်ႉ မႃးပိုတ်ႇ KTV တီႈ ႁိူၼ်းၶၢတ်ႈ ၸိူဝ်းၼၼ်ႉ။ ၼႂ်း KTV ၸိူဝ်းၶႄႇၶဝ်မႃးပိုတ်ႇၼႆႉ ၶႂ်ႈလႆႈယႃႈၵေႃႈ သိုဝ်ႉလႆႈဢိူဝ်ႈ”- ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူးၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA လူၺ်းယေႇဢူးၵေႃႈ ဢမ်ႇလႆႈ။

ၼႂ်းငဝ်းလၢႆးဝၢၼ်ႈမိူင်း ဢမ်ႇၼိမ်ၸိူင်ႉၼႆ ၵူၼ်းမိူင်းမီးလွင်ႈယၢပ်ႇၵိၼ်း ၵၢၼ်ႁႃၵိၼ်လဵင်ႉတွင်ႉလႄႈ ၼၢင်းယိင်းဢွၼ်ႇၼႂ်းပိုၼ်ႉတီႈ ၵမ်ႈၽွင်ႈ ဢွၼ်ၵၼ်ၵႂႃႇႁဵတ်းၵၢၼ် ၼႂ်းႁၢၼ်ႉ KTV ၸဵမ်ၸိူဝ်းၼႆႉ ၼႆယဝ်ႉ။

ၼႂ်းမိူင်းတႆးပွတ်းႁွင်ႇၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆလၢႆၸုမ်း ၵုမ်းၵမ်ဝႆႉ။ မိူၼ်ၼင်ႇ MNDAA, TNLA, KIA, SSPP ၸိူဝ်းၼႆႉ ဢွၼ်ၵၼ် ၵဵပ်းသိုၵ်းမႂ်ႇ ၼႂ်းပိုၼ်ႉတီႈၼႃႈလိၼ်ၽႂ်မၼ်းယူႇ ၼႆယဝ်ႉ။

တႅမ်ႈ – ၽူၺ်းၼုမ်ႇ