ၽွင်းငဝ်းလၢႆးဝၢၼ်ႈမိူင်းၼႂ်းၸိုင်ႈတႆး တိုၵ်ႉသုၵ်ႉၸွမ်းၵၢၼ်သိုၵ်းၵၢၼ်သိူဝ်ယူႇၼႆႉ ၵူၼ်းမိူင်းတႆး ၸိူဝ်းယၢၼ်ၵႆႁိူၼ်းသေ တူၵ်းယူႇၼႂ်းမိူင်းပိူၼ်ႈၵေႃႈ လႆႈၼႃႈလဵၵ်ႉတႃၼွႆႉ ဢမ်ႇလႆႈယူႇသႃႇ ၵႂႃႇတၢင်းလႂ်ၵေႃႈ လႆႈၵူဝ်လႆႈႁႄ။ ၵူၼ်းမိူင်းတႆး ပၢႆႈၶဝ်ႈမိူင်းထႆး ၼပ်ႉႁူဝ်သိပ်းသႅၼ် ပၢႆႈယဝ်ႉပၢႆႈထႅင်ႈၵေႃႈ ပႆႇထိုင် တီႈၵတ်းယဵၼ်ၸႂ်လႆႈ။

တႃႇၵူၼ်းၸိူဝ်းပွင်ပဵၼ်လႆႈတႄႉ ငဝ်းလၢႆးပၼ်မႃးၸိူင်ႉႁိုဝ်ၵေႃႈ ၶၢမ်ႈပူၼ်ႉယူႇၵႂႃႇလႆႈၵူႈဝၼ်းဝၼ်း ယူႇသေတႃႉ ၵူၼ်းၸိူဝ်းႁႃၸဝ်ႉၵိၼ်ၶမ်ႈ လူဝ်ႇလဵင်ႉလူတူၺ်းထိုင်ၼႂ်းၼႃႈႁိူၼ်းတႄႉ ၵိၼ်းၸႂ်ႁႅင်းဝႆႉ။

လိူဝ်သေ လႆႈမႆႈၸႂ်တႃႇယူႇတႃႇၵိၼ် တႃႇဝတ်းတႃႇဝႂ်ယဝ်ႉ သမ်ႉယူႇယၢပ်ႇၼႂ်းၵႄႈပိူၼ်ႈထႅင်ႈ။ ယွၼ်ႉမီးၵူၼ်းၼုမ်ႇတႆး ၸိူဝ်းၽွတ်ႈပဵၼ်မူႇပဵၼ်ၸုမ်း လႄႇႁႃၵေႃႇၵၢၼ်ႁၢႆႉ ယိပ်းမိတ်ႈယိပ်းလႅဝ်းသေ ၽိတ်းမေႃးၶႃႈႁႅမ်ၵၼ် ၼႂ်းဝၢၼ်ႈပိူၼ်ႈမိူင်းပိူၼ်ႈ။    

ထိုင်တီႈ ၸဝ်ႈႁိူၼ်း ၵႂႃႇလၢတ်ႈတီႈၸဝ်ႈၼႃႈတီႈၾၢႆႇၵုမ်းဝၢၼ်ႈမိူင်း လိုပ်ႈလမ်းၵႂၢတ်ႇလၢင်ႈၽဵဝ်ႈတီႉ။ ပေႃးထိုင်ၶၵ်ႉတွၼ်ႈၼႆႉမႃး ဢၼ်တုမ်ႉတိူဝ်ႉၼႆႉ ဢမ်ႇၸႂ်ႈၸုမ်းၵူၼ်းၼုမ်ႇတႆး ဢၼ်သၢင်ႈလွင်ႈ လိူတ်ႇမႆႈၵူၺ်း။ ၵူၼ်းၸိူဝ်းႁႃၸဝ်ႉၵိၼ်ၶမ်ႈ ယူႇႁင်းၵူၺ်းၵတ်းၵတ်းယဵၼ်ယဵၼ်ၵေႃႈ တုမ်ႉတိူဝ်ႉလိူတ်ႇမႆႈပႃးၸွမ်း။

မိူၼ်ၼင်ႇ ၼႂ်းဝဵင်းၵဵင်းမႂ်ႇ ၸိုင်ႈထႆးၼႆႉ ၵူၼ်းၼုမ်ႇတႆး (ဝႆႊရုၼ်ႉ) ၵႆႉၶႃႈၵၼ်ၽိတ်းၵၼ်။ ႁဵတ်းႁႂ်ႈ ၵူၼ်းၸၢဝ်းတႆး ၸိူဝ်းဢမ်ႇၵဵဝ်ႇသင်ၸွမ်းလႆႈ လိူတ်ႇလႆႈမႆႈၸွမ်း။ ၼႂ်းႁူဝ်လိူၼ်မၢတ်ႊၶျ် 2025 ၼႆႉ ၵူၺ်း ၸုမ်းၵူၼ်းၼုမ်ႇတႆး ႁႅင်းၵူၼ်း 7-8 ၵေႃႉ လမ်းတႅင်းထုပ်ႉပေႃႉ ၵူၼ်းထႆး ၵေႃႉၼိုင်ႈ ထိုင်တၢႆ တီႈၵၢတ်ႇၽၵ်းတူၵဵင်းမႂ်ႇ။

လွင်ႈၼႆႉ တုမ်ႉတိူဝ်ႉပႃး ႁႅင်းၵၢၼ်ယၢၼ်မိူင်းၸိူဝ်းမီးၼႂ်းၸႄႈတွၼ်ႈၵဵင်းမႂ်ႇၵူႈၵေႃႉ။ ၵႂႃႇလႂ်ပႆလႂ်ၵေႃႈ ၵူၼ်းပိုၼ်ႉတီႈ ပေႃးသီႈၵႄႉႁႄႈတႃ ထၢင်ႇလဵၵ်ႉလူမဝ် လၢတ်ႈၸႃသႄႉသွမ်းယဵပ်ႇယမ်ႈ – သမ်ႉပေႃး ႁဵတ်းၵၢၼ်ယၢပ်ႇၽိုတ်ႇ။ ၸဵမ်မိူဝ်ႈႁပ်ႉႁူႉၶၢဝ်ႇၼႆႉယဝ်ႉၵေႃႈ ၵူၼ်းမိူင်းထႆးပတ်းပိုၼ်ႉ မီးၸႂ်ဢိမ်ႇမိူဝ်ႇ ၵူၼ်းတႆး (ၵူၼ်းမိူင်းမၢၼ်ႈ) မႃး။ ပႃၼဝ်ႈတူဝ်ၼိုင်ႈၵေႃႈ မဵၼ်တင်းသႃႉယဝ်ႉၼႆ ၽူႈတူင်ႉၼိုင်ၼႂ်း တူင်ႇၵူၼ်းၵဵင်းမႂ်ႇ ၵေႃႉၼိုင်ႈလၢတ်ႈ။

ဢိင်ၼိူဝ်လွင်ႈၼႆႉ ၼင်ႇႁိုဝ် ၵူၼ်းၼုမ်ႇတႆး သမ်ႉပေႃးတေဢမ်ႇသၢင်ႈပၼ်ႁႃ ၼင်ႇႁိုဝ် တေဢမ်ႇၵေႃႇ ၵၢၼ်ႁၢႆႉၼႆႉ ထုၵ်ႇလီလႆႈႁဵတ်းၸိူင်ႉႁိုဝ်၊ သဵင်ၵၢင်ၸႂ်ၵူၼ်းၼုမ်ႇ ၽူႈမီးတၢင်းၶတ်းၸႂ်ႁႃ တၢင်းၶိုၼ်ႈယႂ်ႇ  ၶဝ်လၢတ်ႈၼင်ႇၼႆ –

ယူႇလႂ်ၵေႃႈႁႂ်ႈမေႃယွၼ်ႇယွမ်းၶဝ်ႈႁႃၵၼ် ၸင်ႇလႆႈယူႇၵတ်းယဵၼ်

ယိင်းမူၺ်ႁွမ် လုၵ်ႈႁဵၼ်းၸၼ်ႉၸွမ်မႁႃႇၸူးလႃးလူင်းၵွၼ်း

ဢၼ်ၵူၼ်းၼုမ်ႇတႆးၽိတ်းၵၼ်ၼၼ်ႉ ၶဝ်မီးလိူင်ႈသင်ၵၼ်တႄႉတႄႉ ဢမ်ႇႁူႉ ။ ယွၼ်ႉဝႃႈ ႁဝ်းၵေႃႈ ဢမ်ႇလႆႈ ၵႂႃႇယူႇၼႂ်းတူင်ႇဝူင်းၼၼ်ႉ ။ ၵူၺ်းၵႃႈ ထႆးၶဝ်တႄႉၵေႃႈ လၢတ်ႈဢွၵ်ႇမႃးဝႃႈ ပဵၼ်ၵူၼ်းတႆး ၵေႃႉႁဵတ်းၼႆၼၼ်ႉၼႃႇၼေႃ။ ၸိူဝ်းၼႄးပႃးတင်းၸိူဝ်ႉတင်းၶိူဝ်းၵေႃႈမီး။ ၶဝ်တိုၼ်းၼႄးဝႃႈ ၵူၼ်း တႆးႁဝ်း ၵႂႃႇႁဵတ်းႁၢႆႉၶဝ် ၼႆၼၼ်ႉ ယဝ်ႉၶႃႈ။

ၵဵဝ်ႇၵပ်းလွင်ႈၼႆႉသေ ၸွင်ႇႁဝ်းၶႃႈယူႇယၢပ်ႇႁႃႉၼႆတႄႉၵေႃႈ ယွၼ်ႉႁဝ်းမႃးႁဵၼ်းလႄႈ ႁႂ်ႈပေႃးတုမ်ႉ တိူဝ်ႉတႄႉ ဢမ်ႇမီးယႂ်ႇလူင်ၼင်ႇၵဝ်ႇ။ ၵူၺ်းၵႃႈ ဢၼ်တုမ်ႉတိူဝ်ႉတႄႉၵေႃႈ ၸိုဝ်ႈသဵင်တႆးႁဝ်း ပိူၼ်ႈ ဝႃႈႁင်းတႆးႁဝ်းၼႆၼၼ်ႉ ၵူၺ်းယဝ်ႉၶႃႈ။

ၸဵမ်ပိုင်းၵေႃႈ ထႆးၼႆႉ မၼ်းဢမ်ႇပေႃးၵျိူၵ်ႈမၢၼ်ႈယူႇယဝ်ႉ။ ယွၼ်ႉၼၼ် ပေႃးဝႃႈ ၵူၼ်းမိူင်းႁူမ်ႈ  တုမ်မၢၼ်ႈႁဵတ်းသင်ၽိတ်းၵေႃႈ တေပဵၼ်တီႈၶဝ်ႈသႄႉၼႄး ယူႇယဝ်ႉၶႃႈ။။

ၶႃႈႁၼ်ထိုင်တႄႉၵေႃႈ မိူဝ်ႈလဵဝ် ႁဝ်းမႃးယူႇမိူင်းပိူၼ်ႈၼႆႉ ဢမ်ႇၸႂ်ႈဝႃႈ ၵျေႃႇၼႃႇလႄႈမႃး။ ပေႃးမိူၼ် ႁဝ်းၼႆႉ ၶႂ်ႈလႆႈပၢႆးပၺ်ႇၺႃႇလႄႈမႃး။ ၵမ်ႈၽွင်ႈၵေႃႈ ယွၼ်ႉမိူင်းႁဝ်းႁဵတ်းၵၢၼ်ယၢပ်ႇလႄႈ ၸင်ႇမႃး။ တီႈတႄႉမၼ်း ႁဝ်းမႃးတူၵ်းမိူင်းပိူၼ်ႈ မၢင်လွင်ႈလွင်ႈၵေႃႈ ႁႂ်ႈမီးၸႂ်ယိူၼ်ႉၵၼ်ႈၽွင်ႈ ယွၼ်ႇယွမ်းၽွင်ႈ ဢမ်ႇၸႂ်ႈဝႃႈ ၶႂ်ႈလၢတ်ႈသင်ၵေႃႈလၢတ်ႈ  ၶႂ်ႈႁဵတ်းသင်ၵေႃႈႁဵတ်း။ ပေႃးႁဝ်းၵေႃႇၵၢၼ်ႁၢႆႉသေ လွင်ႈ လွင်ႈၵေႃႈ ဢမ်ႇၸႂ်ႈဝႃႈတေယဝ်ႉတီႈႁဝ်းၵေႃႉလဵဝ်ၵူၺ်း တိူဝ်ႉပႃးၵူၼ်းတင်းၼမ်။

တႆးၽိတ်းၵၼ် ၸိုဝ်ႈတႆးလူႉ ၵူၼ်းမိူင်းတႆးႁႃႁဵတ်းၵၢၼ်ယၢပ်ႇ

ၸၢႆးဝိၼ်းထေး ႁႅင်းၵၢၼ်ၵူၼ်းၼုမ်ႇ

ပေႃးဝႃႈ ၵူၼ်းၼုမ်ႇႁဝ်း ၵႂႃႇၽိတ်းပိူၼ်ႈႁဵတ်းၼၼ် ႁဝ်းၶႃႈ ၸိူဝ်းပဵၼ်ႁႅင်းၵၢၼ် ၵႂႃႇယိုၼ်ႈယွၼ်းႁဵတ်း ၵၢၼ်ပိူၼ်ႈယၢပ်ႇ။ ပေႃးႁဝ်းၵႂႃႇတႃႈပႆတၢင်းၼႆၵေႃႈ ပိူၼ်ႈတေတူၺ်းႁဝ်းဢမ်ႇလီ။ မိူၼ်ႁဝ်းၼႆႉ ပဵၼ် ၵူၼ်းႁၢႆႉၵူၼ်းမိူၵ်ႈဝႆႉ။

ၼင်ႇႁိုဝ် တေဢမ်ႇပဵၼ်ၼၼ် ႁဝ်းလူဝ်ႇတင်ႈၸုမ်းသေ ပၼ်ၾၢင်ႉၵၼ်ၼႂ်းဢွၼ်ႊလၢႆႊ။ ၼင်ႇႁိုဝ် တေႁူႉပၵ်းပိူင်လွင်ႈယူႇလွင်ႈသဝ်းမိူင်းပိူၼ်ႈၵေႃႈ ႁဝ်းလူဝ်ႇမေႃသျႄးပၼ်ၵၼ်။ သင်ဝႃႈ မီးပေႃႈမႄႈ ပီႈၼွင်ႉၼႆၵေႃႈ ၸွႆႈသင်ႇသွၼ်လုၵ်ႈလၢၼ်ႁင်းၽႂ်ႁင်းမၼ်း ၸိူင်ႉၼႆ တေလီဢေႃႈ ။

ပေႃးတႆးၽိတ်းၵေႃႉၼိုင်ႈၵေႃႈ ပိူၼ်ႈႁၼ်ႁဝ်းၽိတ်းတင်းၶိူဝ်း

ၼၢင်းဢွၼ်ႇလိုၼ်း ၽူႈႁွင်ႉၵႂၢမ်းသႅၼ်းၵူၼ်းၼုမ်ႇ

ပေႃးၵူၼ်းၼုမ်ႇတႆးႁဝ်းၽိတ်းၵၼ်မႃး ၵေႃႇၵၢၼ်ႁၢႆႉမႃးၼႆ ပိူၼ်ႈပၵ်းတႃတူၺ်းႁဝ်းတင်းၶိူဝ်းဢေႃႈ။ ပေႃးႁဵတ်းၽိတ်းၵေႃႈ ပိူၼ်ႈဢမ်ႇလႆႈဝႃႈ ၵူၼ်းၼုမ်ႇႁႃႉ ၵူၼ်းထဝ်ႈႁႃႉၼႆၵူၺ်း။ သရေႇၼႃႈတႃ ႁဝ်း ၵေႃႈ တိူဝ်ႉတင်းၶိူဝ်း။

ယဝ်ႉၵေႃႈ တေႁဵတ်းႁႂ်ႈၵူၼ်းဢၼ်မီးၼႂ်းမိူင်းထႆးၼႆႉယူႇယၢပ်ႇ။ တေႁႃၵိၼ်လဵင်ႉတွင်ႉယၢပ်ႇ။ ပိူၼ်ႈ တေတူၺ်းႁဝ်းမိူၼ်ၵူၼ်းဢမ်ႇလႆႈလွင်ႈ မိူၼ်ၵူၼ်းႁၢႆႉ။

မိူဝ်ႈၵွၼ်ႇၼႆ ပိူၼ်ႈၵႆႉဝႃႈ ၵူၼ်းတႆးလႄႈၵူၼ်းထႆးၼႆႉ ႁဝ်းဢမ်ႇယၢမ်ႈၽိတ်းၵၼ်။ ႁဝ်းပဵၼ်ဢူၺ်းၵေႃႉ လီၵၼ်မႃးတႃႇသေႇ ၼႆၸိူဝ်းၼႆႉ။မိူဝ်ႈလဵဝ်တႄႉ ပိူၼ်ႈဢမ်ႇႁၼ်ၸိူင်ႉၼၼ်ယဝ်ႉၶႃႈ။

ၵူၼ်းၼုမ်ႇတႆးဢၼ်ၵတ်ႉၵတ်ႉ ဢၼ်လီလီၵေႃႈမီးတင်းၼမ် ၵူၺ်းၵႃႈ ပိူၼ်ႈသမ်ႉႁၼ်ဢမ်ႇလီပႅတ်ႈ ႁဵတ်းၼႆၵေႃႈမီးဢေႃႈ ယွၼ်ႉၵူၼ်းၵေႃႇၵၢၼ်ႁၢႆႉ ၸိူဝ်းၼၼ်ႉ။

ႁဝ်းယူႇမိူင်းပိူၼ်ႈၼႆႉ ႁဝ်းတေသင်ႇတေသွၼ်ၵၼ်ၵေႃႈယၢပ်ႇ ပိူင်လူင်မၼ်းတႄႉ ယူႇတီႈ ၽူႈၵွၼ်း ၼႃႈႁိူၼ်းၶဝ် လီသင်ႇသွၼ်ပွၼ်ႈလီပၼ်ၵူၼ်းၼုမ်ႇလုၵ်ႈဢွၼ်ႇၵူႈၵေႃႉ ႁႂ်ႈမေႃယူႇမေႃၵိၼ်ၼႂ်းမိူင်း ပိူၼ်ႈ။

ၵူၼ်းၼုမ်ႇၼႆႉ ပေႃးယုမ်ႇတူဝ်ၵဝ်ႇပူၼ်ႉတီႈလိူဝ်ႁႅင်းၵေႃႈ ၸၢင်ႈပႆတၢင်းၽိတ်း

ၸၢႆးဢွင်ႇ လုၵ်ႈႁဵၼ်းၸၼ်ႉၸွမ် ရၢတ်ႉၶျၽတ်း ၵဵင်းႁၢႆး

ၵူၼ်းၼုမ်ႇၼႆႉ ပိူင်လူင်မၼ်းတႄႉ ယူႇတီႈပေႃႈမႄႈဢေႃႈ။ ပေႃႈမႄႈလုၵ်ႈဢွၼ်ႇၼႆႉ ႁဵတ်းႁိုဝ်လုမ်း လႃးမႃး။ ယဝ်ႉၵေႃႈ ၸွင်ႇၶဝ်လႆႈယူႇၸွမ်းပေႃႈမႄႈႁႃႉ ဢမ်ႇလႆႈယူႇႁႃႉ ၼႆၸိူဝ်းၼႆႉ။

ယဝ်ႉၵေႃႈ ဢိင်ၼိူဝ်ၶဝ် ယႂ်ႇမႃးၼႂ်းတူင်ႇဝူင်းၸိူင်ႉႁိုဝ်။ သင်ဝႃႈ ၶဝ်ယႂ်ႇမႃးၸွမ်းတူင်ႇဝူင်း ဢၼ်ဝူၼ်ႉ ၽိတ်း ႁဵတ်းၽိတ်းၵေႃႈ ၶဝ်ၵေႃႈတေမေႃႁဵတ်းၽိတ်းၸွမ်း။ သင်ဝႃႈ တူင်ႇဝူင်းလီၵေႃႈ ၶဝ်တေလီ ၸွမ်း။

သင်ဝႃႈ လႆႈၶိုၼ်ႈႁူင်းႁဵၼ်းၵေႃႈ သမ်ႉဢမ်ႇသင်မၼ်း ၶဝ်လႆႈမီးတိုဝ်ႉတၢင်းႁဵၼ်း သွၼ်ဢဝ်လွင်ႈလီ ၵႂႃႇယူႇ။ တႃႇတေႁဵတ်းႁႂ်ႈၵူၼ်းၼုမ်ႇ မီးပၢႆးဝူၼ်ႉလီ ႁဵတ်းလီတႄႉ ငဝ်ႈလူင်မၼ်းသမ်ႉ ပဵၼ်ပေႃႈပဵၼ် မႄႈ။ ယဝ်ႉၵေႃႈ တူင်ႇၵူၼ်းဢၼ်ၶဝ် ၵႂႃႇယူႇဢိူမ်ႈ။ ပေႃးပၼ်ႁႅင်းၵၼ် ႁဵတ်းလွင်ႈဢမ်ႇလီၵေႃႈ ယိင်ႈ ၶႅၼ်းတေႁၢႆႉၵႂႃႇတိၵ်းတိၵ်း။

ၵူၼ်းၼုမ်ႇၼႆႉ ပဵၼ်ၵူၼ်းၵျိူၵ်ႈယွင်ႈ ပေႃးယွင်ႈဢမ်ႇမႅၼ်းလၢႆးမၼ်းၵေႃႈ ၸၢင်ႈႁဵတ်းႁႂ်ႈၶဝ်ပႆတၢင်း ၽိတ်း။

ပႃၼဝ်ႈတူဝ်ၼိုင်ႈ ယႃႇႁႂ်ႈၼဝ်ႈတင်းၵူၺ်

ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ယၢၼ်မိူင်း MAP Foundation

ပိုင်ႈဢိင်ယူႇမိူင်းပိူၼ်ႈၼႆႉ ပႃၼဝ်ႈတူဝ်ၼိုင်ႈ ယႃႇႁႂ်ႈၼဝ်ႈတင်းၵူၺ်။ ယႃႇပေၵႂႃႇ ၵေႃႇၵၢၼ်ႁၢႆႉၸႃႉ ႁဵတ်းၼႆတိၵ်းတိၵ်း။ မိူဝ်ႈလဵဝ် လွင်ႈဝတ်းလွင်ႈဝႂ်ၵေႃႈ ဢမ်ႇတဵမ်ထူၼ်ႈ  ယူႇယၢပ်ႇႁင်းၽႂ်ႁင်းမၼ်း။ ႁႅင်းၵၢၼ်ႁဝ်းၵေႃႈ မၼ်းယူႇယၢပ်ႇၵၼ်ၼႃႇ။ ႁဝ်းႁႃးၼင်ႇၵၼ်ၵေႃႈ ပေႃးၶၢၼ်ၸႂ်ၼႃႇယဝ်ႉ။

ၸိူဝ်းပဵၼ်ပေႃႈမႄႈၵူၼ်းၼုမ်ႇၼႆၵေႃႈ ႁႂ်ႈသင်ႇသွၼ်ပွၼ်ႈပၼ်လီလီ။ ဢမ်ႇၼၼ်ၵေႃႈ ဢဝ်လွင်ႈ ယၢပ်ႇၽိုတ်ႇဝတ်းဝႂ်ၼႆႉသေ သင်ႇသွၼ်ပၼ်။ ၶၢဝ်းၼႆႉၵေႃႈ ပွႆးၵေႃႈသမ်ႉလိူင်ႇသေ ၵူဝ်ၵႂႃႇၽိတ်းၵၼ် ၼႂ်းပွႆး။ ၵူၼ်းၼုမ်ႇမၢင်ၸိူဝ်း ၽိတ်းၵၼ်ၼႂ်းပွႆးၼိုင်ႈ ၵႂႃႇတွပ်ႇတႅၼ်းၵၼ်ၶိုၼ်း ထႅင်ႈပွႆးၼိုင်ႈသေ ၵေႃႇ ၵၢၼ်ႁၢႆႉ တွပ်ႇၵၼ်ၵႂႃႇတွပ်ႇၵၼ်မႃး ဢမ်ႇယဝ်ႉဢမ်ႇတူဝ်ႉ။

ႁဝ်းမႃးယူႇမိူင်းထႆး ႁဝ်းၵေႃႈ လူဝ်ႇလႆႈႁူႉပိူင်မိူင်းထႆး။ မိူၼ်ၼင်ႇ တၢင်းႁူင်းပွႆႇသဵင် MAP ႁဝ်းၵေႃႈ လၢတ်ႈပၼ်ယူႇတႃႇသေႇ။ ဢွၵ်ႇၶေႃႈ မုလ်းၶၢဝ်ႇပၼ်ယူႇတႃႇသေႇ။ မိူၼ်ၼင်ႇ သိုဝ်ႇၶၢဝ်ႇၽူႈတွႆႇႁွၵ်ႈ ၸိူဝ်းၼႆႉၵေႃႈ ပိူၼ်ႈၵေႃႈ ၾၢင်ႉပၼ်ယူႇၵူႈမိူဝ်ႈ။ ပၵ်းပိူင်မၢႆမီႈဢၼ်လႂ် ထုၵ်ႇဢမ်ႇထုၵ်ႇၵေႃႈ ႁႂ်ႈမေႃ လိူၵ်ႈတူၺ်းၶၢဝ်ႇ ဢၼ်မီးတီႈဢၢင်ႈဢိင်။

ဢမ်ႇၸႂ်ႈဝႃႈ ၵႂႃႇတူၺ်းၼႂ်း TIKTOK ဢၼ်ပိူၼ်ႈဝႃႈတႂ်ႈဝႃႈၼိူဝ် ဢမ်ႇမီးတီႈဢၢင်ႈဢိင်သင်ၼၼ်ႉ။ ပေႃးႁဝ်းႁူႉပၵ်းပိူင်ပိူၼ်ႈၵေႃႈ ႁဝ်းတေမေႃၾၢင်ႉယူႇၾၢင်ႉၵိၼ်သေ တေဢမ်ႇမီးမိူဝ်ႈၵေႃႇၵၢၼ်ႁၢႆႉ။

ၵူၼ်းၼုမ်ႇဢၼ်ဝႃႈၼႆႉ ပေႃးမေႃသင်ႇသွၼ်ပွၼ်ႈလီၵေႃႈ ၸၢင်ႈပဵၼ်မႃးၽူႈဢွၼ်ႁူဝ်လီၼႂ်းဝၼ်း မိူဝ်းၼႃႈ။ သင်ဝႃႈ ၵူၼ်းၼုမ်ႇ ဢမ်ႇမီးၼမ်ႉၵတ်ႉ ဢမ်ႇမေႃဝူၼ်ႉလီႁဵတ်းလီၵေႃႈ ၸၢင်ႈႁဵတ်းႁႂ်ႈ ၶိူဝ်း တႆးမိူဝ်းၼႃႈ တူၵ်းတႅမ်ႇလႆႈ။ ယွၼ်ႉၼၼ် ႁိူၼ်းလႂ် တူင်ႇၵူၼ်းလႂ်ၵေႃႈယဝ်ႉ တၵ်းလူဝ်ႇသႂ်ႇၸႂ်ၼိူဝ် လုၵ်ႈဢွၼ်ႇၵူၼ်းၼုမ်ႇသေ ၸီႉၸမ်ႈပၼ် ႁႂ်ႈၶဝ်မေႃလိူၵ်ႈသဵၼ်ႈတၢင်းလီ။