ထဝ်ႈယိင်း ဢႃယု 60 ပၢႆၵေႃႉၼိုင်ႈ ယူႇဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ၺႃးၸုမ်းဢမ်ႇႁူႉၾၢႆႇ တီႉၺွပ်းႁဵတ်းပဵၼ်တူဝ်ယိူဝ်ႇၵႂႃႇ ဝႃႈၼႆ။
ဝၼ်းတီႈ 10/03/2025 ယၢမ်းၵၢင်ၶမ်ႈမွၵ်ႈ 9 မူင်းၶိုင်ႈ မီးၵူၼ်းၸၢႆး 2 ၵေႃႉ ၶီႇၵႃး Crown သီလမ် လမ်းၼိုင်ႈ မႃးၵိုတ်းႁိမ်းႁိူၼ်း ပႃႈၸၢမ်သႅင်း ဢႃယု 60 ပၢႆ ယူႇဝၢၼ်ႈမၢၵ်ႇယၢင်း ဢိူင်ႇၽၢင်မိၼ် ၸႄႈဝဵင်းတႃႈၶီႈလဵၵ်း လႅၼ်လိၼ်တႆး – ထႆး ၺႃးတီႉၺွပ်းၵႂႃႇ ၼႂ်းႁိူၼ်းမၼ်းၼၢင်း ၼႆယဝ်ႉ။
ၼၢင်းယိင်း ဢႃယု 50 ပၢႆ ၵေႃႉၼိုင်ႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ပႃႈၸၢမ်သႅင်း ၺႃးတီႉၺွပ်းၵႂႃႇ ယွၼ်ႉသင်လႄႈ ၺႃးတီႉၵႂႃႇတႄႉ ဢမ်ႇႁူႉၶႃႈ။ မၼ်း ၼၢင်း ပဵၼ်ၵူၼ်းႁဵတ်းၵၢၼ် ပၢႆးမၢၵ်ႈမီး ၵေႃႉၼိုင်ႈ။ ယဝ်ႉၵေႃႈ ပဵၼ်ၵူၼ်းမီးငိုၼ်းဢေႃႈ။ ၵူၺ်းၵႃႈ ၾၢႆႇလႂ်ဢဝ်ၵႂႃႇတႄႉ ဢမ်ႇလႆႈႁူႉၶႃႈ”- ဝႃႈၼႆ။
ယၢမ်းလဵဝ် ပႃႈၸၢမ်သႅင်းၼႆႉ ထုၵ်ႇတီႉၺွပ်းဢဝ်ၵႂႃႇဝႆႉတီႈလႂ် ၸုမ်းဢၼ်မႃးတီႉၺွပ်းၵႂႃႇၼၼ်ႉသမ်ႉ ပဵၼ်ၼမ်ႉမိုဝ်းၽႂ် ၸုမ်းလႂ်ႁဵတ်း ဢၼ်ဝႃႈၼၼ်ႉ ယင်းပႆႇႁူႉ။
ပူၼ်ႉမႃး ဝၼ်းတီႈ 21/01/2025 ယၢမ်းၵၢင်ၶမ်ႈ ပေႃႈလဵင်ႉလူင် လုင်းၸၢႆးလႅင်း ဢႃယု 53 ပီ ၵူၼ်းဝၢၼ်ႈမၢၵ်ႇယၢင်း ၼၼ်ႉၵေႃႈ ၺႃးၸုမ်းဢမ်ႇႁူႉၾၢႆႇ တီႉၺွပ်းဢဝ်တူဝ်မၼ်းၸၢႆး ၽွင်းတိုၵ်ႉဢွၵ်ႇႁႅင်းပႆတၢင်း ႁၢၼ်ႉတေႃႇထိုင်ယၢမ်းလဵဝ် ၸမ် 2 လိူၼ်ယဝ်ႉ ပႆႁၼ်ၶိုၼ်း ဝႃႈၼႆ။
တီႈၸႄႈဝဵင်းတႃႈၶီႈလဵၵ်းၼႆႉ ၽူႈလၵ်ႉၸၵ်ႉၶုတ်ႈ ၼမ်လိူင်ႇႁႅင်း၊ ၵူၼ်းမိူင်းဢမ်ႇမီး လွင်ႈႁူမ်ႇလူမ်ႈ၊ ၾၢႆႇသိုၵ်းမၢၼ်ႈ ပလိၵ်ႈမၢၼ်ႈၵေႃႈ ဢမ်ႇဢဝ်ပုၼ်ႈၽွၼ်းၵႄႈလိတ်ႈပၼ်။
မိူၼ်ၼႆ ဝၼ်းၼၼ်ႉ ယၢမ်းၵၢင်ဝၼ်း တီႈၸႄႈဝဵင်းတႃႇမူၺ်ႇ ဝဵင်းလူင်တႃႈၵုင်ႈၵေႃႈ ၸဝ်ႈႁိူၼ်းၼၢင်း ယိင်း ၺႃးတီႉၺွပ်းမတ်ႉတႅင်းသေ ၸူၼ်ဢဝ်ၵႂႃႇ ၶူဝ်းၶွင်ငိုၼ်းၶမ်း၊ ၸဝ်ႈ ႁိူၼ်းမၢတ်ႇၸဵပ်းႁႅင်း လႆႈႁၢမ်သူင်ႇႁူင်းယႃဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ