မိူဝ်ႈၼႆႉ ဝၼ်တီႈ 10/03/2025 လိူၼ်သီႇမႂ်ႇ 12 ၶမ်ႈ ၵူၼ်းမိူင်းပိုၼ်ႉတီႈလႄႈ သြႃႇတၵ်ႉၵႃႇ ႁူမ်ႈၵၼ်ၵႂႃႇ ပၢင်းဢဝ်ၽြႃး တိဢိင်ႇတ ၸဝ်ႈမိူင်းၶၢဝ်ႉ တီႈဝၢၼ်ႈႁူဝ်တူင်ႈ ၶဝ်ႈၼႂ်းဝဵင်းသႅၼ်ဝီသေ တႄႇၸတ်းပၢင်ပွႆးလိူၼ်သီႇၵႂႃႇ ၼႆယဝ်ႉ။

ၼႂ်းပွႆးလိူၼ်သီႇၼႆႉ သိုၵ်းၵဝ်ႈၵၢင်ႉ ပၼ်ၶႂၢင်ႉပိုတ်ႇပၢင်တေႃႇလွင်းသေ မီးၸဝ်ႈၼႃႈတီႈၾၢႆႇသိုၵ်းၶဝ် ဢဝ်ႁူမ်ႇလူမ်ႈဝႆႉသေဢမ်ႇၵႃး မီးပႃးႁၢၼ်ႉၶၢႆၶူဝ်းၵုၼ်ႇလႄႈ ႁၢၼ်ႉတၢင်းၵိၼ် တင်းၼမ် ၼႆယဝ်ႉ။

ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ -“ၸွမ်းၵိဝ်ႇဢွၼ်ႇၵိဝ်ႇဢိတ်း ၸိူဝ်းၼႆႉ သိုၵ်းၵဝ်ႈၵၢင်ႉၶဝ် ဢိုတ်းဝႆႉမူတ်းယဝ်ႉ။ ၶဝ်ဢဝ်ႁူမ်ႇလူမ်ႈဝႆႉ သမ်ႉပေႃးတဵမ်လူင်ၵႂႃႇ ၸွမ်းပွႆး။ တၢင်းၶဝ်ႈတၢင်းဢွၵ်ႇပွႆးၼႆႉ ၶဝ်ဝႆႉပၼ် သွင်သဵၼ်ႈၵူၺ်း။ ၵူႈပွၵ်ႈပႄႇ ပွႆးလိူၼ်သီႇႁဝ်းၼႆႉ ဢမ်ႇမီးပၢင်တေႃႇပၢင်လွင်းသင် ဢမ်ႇမီးသိုၵ်းသင်မႃးပႂ်ႉ တၢင်းၼႆႉၶႂ်ႈၶဝ်ႈသဵၼ်ႈလႂ် ဢွၵ်ႇသဵၼ်ႈလႂ်ၵေႃႈလႆႈယဝ်ႉ”- ဝႃႈၼႆ။

လႆႈႁူႉဝႃႈ ၼႂ်းပၢင်ပွႆးလိူၼ်သီႇ ဝဵင်းသႅၼ်ဝီၼႆႉ မီးပၢင်ၽၢႆႉၵိဝ်း 14 ၽိူၼ်၊ လေးၵွင်ႇၵျိၼ်ႇ 3 ၽိူၼ်၊ ႁူၵ်းတူဝ် 17 ၽိူၼ်လႄႈ မီးပႃးပၢင်ၽၢႆႉ (သျၢၼ်းၵူဝ်းမီး) ဢိၵ်ႇတင်း 36 တူဝ် (36 မိူင်းလူင်) ၸဵမ်ၸိူဝ်းၼႆႉ ၵူၺ်းဢမ်ႇၵႃး မီးပႃးဢွင်ႈတီႈသိုင်းမၢၵ်ႇပေႃႇလုင်းလႄႈ သိုင်းတဝ်ႈပီႊယိူဝ်ႊ ၸဵမ်ၸိူဝ်းၼႆႉ။

လိူဝ်ၼၼ်ႉ သိုၵ်းၵဝ်ႈၵၢင်ႉ ပၼ်ၶႂၢင်ႉၸတ်း ပၢင်တေႃႇလွင်း ၼႂ်းပွႆးလိူၼ်သီႇသေ သႂ်ႇသိူဝ်ႈၶူဝ်းသိုၵ်း ပႃးၵွင်ႈမႃးပႂ်ႉဢဝ်ႁူမ်ႇလူမ်ႈၸွမ်းပွႆး။ လွင်ႈၼႆႉ ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ ၼႆယဝ်ႉ။

မိူဝ်ႈပူၼ်ႉမႃး ၼႂ်းဝၼ်းတီႈ 20/02/2025 ၼၼ်ႉၵေႃႈ သိုၵ်းမၢၼ်ႈ ယၢမ်ႈဢဝ် ၶိူင်ႈမိၼ်တိုၵ်း မႃးပွႆႇမၢၵ်ႇလူင်သႅၼ်း 500 ပွင်ႇသႂ်ႇ တီႈဝၢၼ်ႈဝႄးပွင်း ဝဵင်းမိူင်းမိတ်ႈ ဢွင်ႈတီႈသိုၵ်းတဢၢင်း ၵုမ်းၵမ်ၼၼ်ႉလႄႈ ၵူၼ်းမိူင်းလႆႈတၢႆၵႂႃႇ 3 ၵေႃႉ မၢတ်ႇၸဵပ်းၵႂႃႇ 7 ၵေႃႉ။ ၽွင်းၼၼ်ႉ ၼႂ်းဝဵင်းမိူင်းမိတ်ႈ မီးပွႆးၽြႃးဝႆႉသေ ယွၼ်ႉသဵင်သေႃႇလၢတ်ႈ ၼႂ်းၶိူင်ႈသဵင်လင်ႁႅင်း ၼႃႇလႄႈ ၵူၼ်းမိူင်းဢမ်ႇလႆႈငိၼ်းသဵင် ၶိူင်ႈမိၼ်မႃး ၼႆယဝ်ႉ။  

တႅမ်ႈ – ၽူၺ်းၼုမ်ႇ