“ယူႊၶရဵၼ်ႊၼႆႉ တႃႇတေလႆႈလွင်ႈငမ်းယဵၼ်ၶၢဝ်းယၢဝ်းၼၼ်ႉ တူဝ်ႈတၼ်းဝႆႉ တႃႇဢုပ်ႇဢူဝ်းၵၼ် ၶၼ်ဝႆးသုတ်းယူႇ။ ဢမ်ႇမီးၽႂ်လႂ် တေၶႂ်ႈလႆႈလွင်ႈငမ်းယဵၼ် ႁႂ်ႈပေႃးပူၼ်ႉလိူဝ်ယူႊၶရဵၼ်ႊႁဝ်း။ ၵဝ်ၶႃႈလႄႈ ၸုမ်းၵဝ်ၶႃႈၼႆႉ တူဝ်ႈတၼ်းဝႆႉ တႃႇႁပ်ႉဢဝ်တၢင်းဢွၼ်ႁူဝ် ၸွမ်ၸိုင်ႈထရမ်ႉသေ ႁဵတ်းႁႂ်ႈလႆႈလွင်ႈငမ်းယဵၼ် ၼၼ်ႉယဝ်ႉ။
မိူင်းဢမေႊရိၵၼ်ႊ ၸွႆႈထႅမ်ပႂ်ႉပႃးပၼ် ဢႃႇၼႃႇပၢၼ်ႇပွင်လႄႈ လွင်ႈလွတ်ႈလႅဝ်းသဝ်းၶေႃ ၶွင်ယူႊၶရဵၼ်ႊၼႆႉ ဝႆႉၼၵ်းပၵ်းၸႂ်ၼပ်ႉယမ်တႄႉယဝ်ႉ။ ၵဵဝ်ႇလူၺ်ႈ ၵၢၼ်ၶုတ်းၽၢၼ်ႉ ႁိၼ်ႁႄႈလႄႈ ၵၢၼ်တူၵ်းလူင်းလိူင်ႈႁူမ်ႇလူမ်ႈသေ ပေႃးထိုင်ၵမ်းသၢင်ႇထုၵ်ႇမႃး ယူႊၶရဵၼ်ႊၼႆႉ တူဝ်ႈတၼ်းဝႆႉတႃႇလူင်း လၢႆးမိုဝ်းၸွမ်းယူႇ…” ၼႆ ၽိူဝ်ႇလႆႈႁၼ် Zelenskyy ၸွမ် ၸိုင်ႈယူႊၶရဵၼ်ႊ တႅမ်ႈတၢင်ႇၼိူဝ်သိုဝ်ႇၶၢဝ်ႇ X ၵေႃႈ ၵူၼ်းပၵ်းတႃပႂ်ႉတူၺ်းၸွမ်း ၾိင်ႈၵၢၼ်မိူင်းလုမ်ႈၾႃႉၶဝ် ဢဝ်ယုပ်းၽၢၼ်ႈလူင်ၵႂႃႇမူတ်း။
ယူႊၶရဵၼ်ႊၼႆႉ ပဵၼ်ထိုင်ငဝ်းလၢႆးမူတိူၵ်ႈၽႃ မႃတိူၵ်ႈႁူဝ်ႉယဝ်ႉလႄႈ ၵႃႈလႆႈၵူမ်ႈႁူဝ်ၼွမ်းတူဝ်တႄႉ ယဝ်ႉႁႃႉ၊ ၸုမ်းလူင်ပွင်ၸိုင်ႈထရမ်ႉၼႆႉ ယႃႉလူႉပႅတ်ႈ ၶေႃႈတူၵ်းလူင်းၵိၼ်ၵႅၼ်ႇ Budapest ယဝ်ႉၼႄႇ၊ ယူႇလွၵ်ႇယူႇလၢႆ ၵႂႃႇႁႃၸုၵ်းၸွမ်းရတ်ႉသျႃးၼႆႉ ပဵၼ်ပၢႆးဝူၼ်ႉတူပ်ႉသွၵ်ႇ ၽၢတ်ႇဢွၵ်ႇၾိင်ႈ ၵၢၼ်မိူင်း လုမ်ႈၾႃႉ the world order ဢၼ်မီးမႃးႁူဝ်ပိုင်းၼၼ်ႉ ၵူၺ်း။
ထရမ်ႉၼႆႉ ယွင်ႇဢႃႇၼႃႇႁိုဝ် ယွင်ႇမၢၵ်ႈမီးယဝ်ႉယူဝ်ႉၼႆၵေႃႈ မီးၵူၼ်းဝႃႈမႃးယဝ်ႉ။ မၼ်းယွင်ႇႁႃႉ ၵူၼ်းၼမ် ဢမ်ႇပွင်ႇၸႂ်ၸွမ်းၽႅၼ်မၼ်းႁိုဝ်တႄႉ တေလႆႈပႂ်ႉတူၺ်းတေႃႇထိုင်ၶၢဝ်းယၢမ်းယေႈပွတ်းယေႈတွၼ်ႈယူႇ။ ၵူၺ်းၵႃႈ ပိုၼ်းပဵၼ်မႃးတႄႉ မွတ်ႇႁၢႆဢမ်ႇလႆႈသႄႈ။
မိူဝ်ႈ 1994 ၸွမ်ၸိုင်ႈၵလိၼ်ႇတၼ်ႇလႄႈ ၸွမ်ၸိုင်ႈယႄလ်သိၼ် ဢွၼ်ႁူဝ်သေ ပၼ်ႁႅင်းဢီး ႁႂ်ႈမိူင်းယူႊၶရဵၼ်ႊ ပႃးၸဵမ်ၿႄးလႃရုတ်ႉလႄႈ ၵႃၸႅၵ်သတၼ် ၸိူဝ်းၼႆႉ လူင်းလၢႆးမိုဝ်းၸွမ်း လိၵ်ႈႁူမ်ႈမၢႆ Budapest ၊ ပိူဝ်ႈတႃႇ ဢဝ်မၢၵ်ႇပီၵူၺ်ႈၼိဝ်းၵလီးယိူဝ်း ပၢၼ်မိူင်းႁူမ်ႈတုမ်သူဝ်းဝီးယႅတ်ႉ ဢၼ်ၵိုတ်းမီးဝႆႉၼႂ်းမိူင်းၽႂ်မၼ်း ၵဵပ်းသူင်ႇပၼ်ၶိုၼ်းတီႈရတ်ႉသျႃး။
မိူင်းရတ်ႉသျႃးၼႆႉ တေဢမ်ႇလႆႈၸႂ်ႉတိုဝ်းမၢၵ်ႇၼိဝ်းၵလီးယိူဝ်းသေ ႁၢင်ႈသိုၵ်းပူၼ်ႉပႅၼ်၊ တေဢမ်ႇ လႆႈတုမ်ႉတိူဝ်ႉတေႃႇဢႃႇၼႃႇပၢၼ်ႇပွင် ၶွင်ယူႊၶရဵၼ်ႊ။ လိူဝ်ၼၼ်ႉယဝ်ႉ တေ ဢမ်ႇလႆႈႁဵတ်းလိူင်ႈပေႉ ၵိၼ် လူၺ်ႈလၢႆးၵၢၼ်မၢၵ်ႈမီး ဝႃႈၼႆၵၼ်ပႃးဝႆႉ။
ယၢမ်းၼင်ႇၼၼ် ဢမ်ႇပေႃးမၼ်ႈၸႂ်ၵႃႈႁိုဝ်ၵေႃႈ ၵွပ်ႈပိူဝ်ႈၸွမ်ၸိုင်ႈၵလိၼ်ႇတၼ် ၶျေႃးလွၵ်ႇလၢႆးဢူၼ်ႈသေ ပၼ်ႁႅင်းဢီးဝႃႈ ထႃႈဢမ်ႇလူင်းလၢႆးမိုဝ်းၸွမ်းတႄႉ မိူင်းဢမေႊရိ ၵၼ်ႊ ဢမ်ႇၸၢင်ႈဢဝ် ၽၼ်ဢဝ်ငဝ်းပၼ်ယူႊၶရဵၼ်ႊၼႆသေ ၸင်ႇလႆႈတူၵ်းလူင်းမႃးၵူၺ်း။
မိူဝ်ႈလဵဝ် ယူႊၶရဵၼ်း ယဵပ်ႇၺႃးၵၼ်းတၢၵ်ႈတႃးယဝ်ႉ၊ ဢမ်ႇယုမ်ႇၵေႃႈ ၵမ်းတူၺ်းၼႃႈၽၢၵ်ႇသေ ႁူႉၸဵပ်းဝႆႉယဝ်ႉ။ ၸၢမ်းႁႂ်ႈမၼ်းဢမ်ႇၵဵပ်းသူင်ႇၶိုၼ်း မၢၵ်ႇၼိဝ်းၵလီးယိူဝ်း ဢၼ်မီးၼႂ်းမိုဝ်းမၼ်းၼႆ ၸွင်ႇတေပဵၼ်မႃးၸိူင်ႉၼႆႁိုဝ်ၼႆ ၸိူဝ်းၸွၼ်ၼႅင်ၸႂ်တၢင်ၵေႃႈ မီးမႃးယဝ်ႉ။
လိၵ်ႈႁူမ်ႈမၢႆဝႃႇ ၶေႃႈတူၵ်းလူင်းဝႃႇ ၵႂၢမ်းမၼ်ႈၵႅၼ်ႇဝႃႇၸိူဝ်းၼႆႉ ဢိင်ၼိူဝ်ၶၢဝ်းယၢမ်းသေ ၸၢင်ႈပိၼ်ႇလႅၵ်ႈၶၢႆႉလၢႆႈလူၺ်ႈ ငဝ်းလၢႆးဢၼ်ဝႃႈၼၼ်ႉ တႃႉလီၾၢင်ႉၼၵ်းထိုင်ၵၼ်ယူႇယဝ်ႉ။
“ႁဝ်းတူၵ်းလူင်းၸွမ်း လူင်ပွင်ၸိုင်ႈၸုမ်းဢွၼ်တၢင်းယိုင်”၊ “ငဝ်းလၢႆးမိူဝ်ႈလဵဝ် ဢမ်ႇၸႂ်ႈၼင်ႇမိူဝ်ႈ ၼၼ်ႉလူင်” ဢၼ်ဝႃႈၼႆႉ ထႃႈဢမ်ႇမီးဝႆႉ လွင်ႈၵတ်ႉတၢင်းၶႅၼ်ႇလႄႈ ၵွင်ႉႁႅၼ်ႇမႃႇၶႅင်ႁႅင်းၵိုၼ်းတႄႉ တၵ်းၺႃးမၢပ်ႇဝႃႈဢမ်ႇႁၢင်ႉယဝ်ႉ။
မိူၼ်ၸိူင်ႉလိၵ်ႈႁူမ်ႈမၢႆ Budapest ဢၼ်တူၵ်းလူင်းတီႈ မိူင်းႁၢင်ၵေရီၼႆႉ လိၵ်ႈႁူမ်ႈမၢႆပၢင်လူင်ဢၼ် တူၵ်းလူင်းတီႈမိူင်းတႆးၼႆၵေႃႈ ၸွင်ႇဢမ်ႇၺႃးယႃႉလူႉပူၼ်ႉပႅၼ် လၢႆၵမ်းယဝ်ႉႁိုဝ်။
တေႃႈၼင်ႇ ယင်းယူႇတီႈ ၽူႈၵိူဝ်းၵုမ်ၸိုင်ႈမိူင်းသေလၢတ်ႈဝႃႈ လိၵ်ႈႁူမ်ႈမၢႆပၢင်လူင်ၼႆႉ ဢမ်ႇၵႃႈႁိုဝ်၊ ဢၼ်လမ်ႇလွင်ႈၼႆႉ ပဵၼ်ၼမ်ႉၸႂ်ပၢင်လူင် ဢၼ်ဝႃႈတေလႆႈၽွမ်ႉႁူမ်ႈၵၼ် ၼၼ်ႉၵူၺ်း ၼႆဢမ်ႇႁိုဝ်။
ဝၼ်းမိူင်းႁူမ်ႈတုမ်ၼႆႉ တႄႇငဝ်ႈမႃးတီႈၸႄႈမိူင်းၶၢင်ဢိူဝ်ႈၼႆၵေႃႈ ဝႃႈဝီႈလူင်ၵႂႃႇၵွၼ်ႇ။ သုတ်းတီႈ ၵူၼ်းၵၢၼ်မိူင်းၼႂ်းတႆး ဢၼ်ၶိၼ်ႁဵတ်းၵူၼ်းႁူႉလူင်သေပၢၵ်ႇဝႃႈ လိၵ်ႈႁူမ်ႈမၢႆပၢင်လူင်ၼႆႉ ၶွပ်ႇပိူင်ၶၢဝ်းယၢမ်းမၼ်းပူၼ်ႉၵႂႃႇပႅတ်ႈယဝ်ႉၼႆၵေႃႈ ယင်းမီးမႃးလူး။
ၸင်ႇၼၼ် ၵဵဝ်ႇလူၺ်ႈမိူင်းတႆးလႄႈ ၵၢၼ်လုၵ်ႉၽိုၼ်ႉတႃႇမိူင်းတႆးပူတ်းပွႆႇသေ မီးဝႆႉၶေႃႈတူၵ်းလူင်းၵၼ် ၼႂ်းၵႄႈၸုမ်းၼၼ်ႉၸုမ်းၼႆႉဝႃႇ၊ မီးဝႆႉလၵ်းထၢၼ်မၼ်ႈၵႅၼ်ႇထိုင်လႂ်ထၢၼ်ႈလႂ်ဝႃႇသေတႃႉ ပေႃး ဢမ်ႇမီးၼမ်ႉၵတ်ႉတၢင်းၶႅၼ်ႇလႄႈ မႃႇႁႅင်းယိုင်ႈယႂ်ႇ ဢၼ်မိူၼ်ၵွင်ႉမိူၼ်ႁႅၼ်ႇတႄႉ ဢမ်ႇပေႃးၸၢင်ႈ ၸႂ်ယႂ်ႇပိုင်ႈဢိင်လႆႈၵႃႈႁိုဝ်သႄႈ။
ၵူၺ်းၼၼ်သေတႃႉ ၸွမ်ၸိုင်ႈ Zelenskyy တႄႉ ဢမ်ႇၸႂ်ႈၵေႃႉၸုင်ၵႂၢႆးတဝ်ဝၢၼ်ႈ ၸိူင်ႉၼင်ႇ ၵူၼ်းၵၢၼ်မိူင်းၼႂ်းတႆးႁဝ်းၼၼ်ႉသႄႈ။
ဢမ်ႇလိူဝ်လႆႈ World Order ၾိင်ႈၵၢၼ်မိူင်းလုမ်ႈၾႃႉလႅၵ်ႈလၢႆႈလႄႈ လႆႈယိူၼ်ႉယွၼ်ႇၼွမ်းတၢင် ၵူၼ်းမိူင်းၵူၺ်း။ ဢမ်ႇပူၼ်ႉလႆႈ World Power ၸိုင်ႈမိူင်းႁႅင်းယႂ်ႇလူင်သေ လႆႈၼွမ်းတႅမ်ႇႁႃလီၵူၺ်း။
ၸိူင်ႉၼႆမိူင်းမၢၼ်ႈ ဢၼ်ၶမ်ယူႇၼႂ်းၵႄႈ မိူင်းၶႄႇလႄႈ မိူင်းဢိၼ်ႊတီႊယိူဝ်ႊၼႆႉၵေႃႈ ထႃႈဢမ်ႇမေႃ လဵၼ်ႈၵေႃႉတေႃႇၶဝ်သေ တေၵုမ်ႇယၵ်းယႂ်ႉၶဝ်ႈဢွၵ်ႇတေႃႇရတ်ႉသျႃး၊ တေ ၶိၼ်ဢႃးလႃးဝူႈတေႃႇသၢႆ ဝၼ်းတူၵ်းယူႇတႄႉ ယူဝ်ၸဵပ်းသႅပ်ႇလိူဝ်ယူႊၶရဵၼ်ႊၶဝ်ႁိုဝ်။
မိူင်းတႆးႁဝ်း ဢၼ်တေႃႉတႄႉမီးယူႇ ၼိုင်ႈၽိတ်ႇၼိုင်ႈၽွင် ၶွင်မိူင်းၶႄႇၼႆႉၵေႃႈ ၽိူဝ်ႇတေႁဵတ်းၵႂၢႆး ၵမ်ႉမႃႇလေႃႇႁူဝ်ၵၼ် တႃႉႁႃႁႂ်ႈႁၼ်လၢႆးႁဵတ်းၵေႃႉလီၵၼ်တင်း မိူင်းႁိမ်းႁွမ်းလႃႈ တေၸၢင်ႈမီးလွင်ႈ ႁူမ်ႇလူမ်ႈလီၼႆ ယွၼ်းပၢႆးၼႄမွၵ်ႈၼႆႈၵွၼ်ႇဢေႃႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ