မိူဝ်ႈၼႆႉ ဝၼ်းတီႈ 07/03/2025 ၸုမ်းၾၢႆႇၸွႆႈထႅမ် ငူပ်ႉငီႉလွင်ႈပူၼ်ႉပႅၼ်သုၼ်ႇလႆႈၵူၼ်း ၸၢတ်ႈၸိုင်ႈလုမ်ႈၾႃႉ (UNOCHA) ပိုၼ်ၽၢဝ်ႇဝႃႈ ၼႂ်းမိူင်းမၢၼ်ႈၼႆႉ ၼၢင်းယိင်းလႄႈ လုၵ်ႈဢွၼ်ႇ ထူပ်းၺႃးလွင်ႈ ပူၼ်ႉပႅၼ်သုၼ်ႇလႆႈၵူၼ်းလႄႈ မီးၽေးၼမ်လိူဝ်ပိူၼ်ႈသုတ်း ယၢမ်းလဵဝ် လူဝ်ႇတၢင်းၸွႆႈထႅမ်ဝႆႉတင်းၼမ် ဝႃႈၼႆ။

ဝၢႆးသိုၵ်းမၢၼ်ႈ ယိုတ်းဢႃႇၼႃႇမႃး ၶၢဝ်းတၢင်း 4 ပီၼႆႉ ၼၢင်းယိင်းလႄႈ လုၵ်ႈဢွၼ်ႇ ၼႂ်းမိူင်းမၢၼ်ႈမွၵ်ႈ 10.4 လၢၼ်ႉ လူဝ်ႇတၢင်းၸွႆႈထႅမ် ၵဵဝ်ႇလူၺ်ႈလွင်ႈႁဵတ်းႁၢႆႉၸႃႉ ၼိူဝ်လွင်ႈပူၼ်ႉပႅၼ်တင်းၵႃႇမ ယိင်း/ၸၢႆး၊ လွင်ႈၵႃႉၶၢႆၵူၼ်းလႄႈ လွင်ႈၵိၼ်ၸိၵ်းတွၵ်ႇၸွၵ်းၵႃႈႁႅင်း ၸိူဝ်းၼႆႉ။

လိူဝ်ၼၼ်ႉ မီးလွင်ႈၶဵင်ႇတႃႉ ၵၢၼ်ႁႃၵိၼ်လဵင်ႉတွင်ႉလႄႈ လႆႈႁူပ်ႉတၢင်းယၢပ်ႇထႅင်ႈ လွင်ႈမၵ်းတတ်း တႃႇလႆႈလွင်ႈၸွႆႈထႅမ်ၵၢၼ်ပၢႆးပၺ်ႇၺႃႇလႄႈ ပၢႆးယူႇလီ ၸိူဝ်းၼႆႉ။

လႆႈႁူႉဝႃႈ ၼၢင်းယိင်းၸိူဝ်းႁူပ်ႉတၢင်းယၢပ်ႇ 10.4 လၢၼ်ႉၼႆႉ တႃႇ 52% လူဝ်ႇတၢင်းၸွႆႈထႅမ်ဝႆႉသေ တႃႇ 7.1 လၢၼ်ႉသမ်ႉ ပဵၼ်ၼၢင်းယိင်းဢႃယု 18 ပီ ၶိုၼ်ႈၼိူဝ် တႃႇ 3.3 လၢၼ်ႉ ပဵၼ်ၼၢင်းယိင်းဢွၼ်ႇ ၸိူဝ်း ဢႃယုပႆႇတဵမ် 18 ပီ ၼႆယဝ်ႉ။

ၼင်ႇႁိုဝ် ၼၢင်းယိင်းလႄႈ လုၵ်ႈဢွၼ်ႇ တေမီးလွင်ႈႁူမ်ႇလူမ်ႈၼမ်တိူဝ်းမႃးလိူဝ်ၵဝ်ႇသေ လႆႈႁပ်ႉလွင်ႈၽဵင်ႇပဵင်း၊ ဢမ်ႇႁူပ်ႉၺႃး လွင်ႈၶီႇၼဵၵ်းတဵၵ်းတဵင်ၼၼ်ႉ တေလႆႈၸွႆႈထႅမ် ႁႄႉ ၵင်ႈပၼ် တႃႇသလေႇၵုင်ႇသိၵ်ႇၶႃႇၼၢင်းယိင်းၵႂႃႇ ၼႆယဝ်ႉ။

တႅမ်ႈ – ၽူၺ်းၼုမ်ႇ