တႄႇႁၢင်လိူၼ်ၾႅပ်ႊပိဝ်ႊရီႊမႃးၼႆႉ သိုၵ်းမၢၼ်ႈ ထႅမ်ႁႅင်းသိုၵ်းလေႃႇတိုၵ်း တပ်ႉသိုၵ်းတဢၢင်း TNLA ၶိုၼ်း ၼႂ်းၼႃႈတီႈတွင်းၶမ်း ၸႄႈဝဵင်းၼွင်ၶဵဝ် မႃးႁၢဝ်ႈႁႅင်းလိူဝ်ၵဝ်ႇ ဝႃႈၼႆ။

မိူဝ်ႈဝႃး ဝၼ်းတီႈ 05/03/2025 ယၢမ်းဝၢႆးဝၼ်း ၾၢႆႇတပ်ႉသိုၵ်းမၢၼ်ႈ ၸႂ်ႉၻရူၼ်ႊသေ ၵႂႃႇပွႆႇမၢၵ်ႈသႂ်ႇ ၼႂ်းဝၢၼ်ႈဢုမ်းမတီး ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ႁဵတ်းႁႂ်ႈၾႆးမႆႈသူၼ်ဢွႆႈတင်း ႁိူၼ်းယေး ၵူၼ်း မိူင်း လူႉၵွႆၵႂႃႇတင်းၼမ် ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈတင်း သိုၵ်းတဢၢင်း ႁူမ်ႈတင်း PDF သေ ယိုဝ်းၵၼ်ႁၢဝ်ႈႁႅင်းဢေႃႈ ၶႂ်ႈဝႃႈၵူႈဝၼ်းယဝ်ႉ မၢၵ်ႇလူင်တူၵ်းသႂ်ႇ ႁိူၼ်းယေးၵူၼ်းဝၢၼ်ႈဢုမ်းမတီး ၺႃးၾႆးမႆႈၵႂႃႇလင်ၼိုင်ႈဢေႃႈ”- ဝႃႈၼႆ။

မိူဝ်ႈၼႆႉ ဝၼ်းတီႈ 06/03/2025 ယၢမ်းၶၢဝ်းၵၢင်ၼႂ်မွၵ်ႈ 10 မူင်း ၼႆႉၵေႃႈ သိုၵ်းမၢၼ်ႈ ဢဝ်ၻရူၼ်ႊလႄႈ ၶိူင်ႈမိၼ်တိုၵ်း (ၵျႅတ်ႊၾၢႆႊတိူဝ်ႊ) မႃးပွႆႇမၢၵ်ႇၵႂႃႇ ၼႂ်းဝၢၼ်ႈဢုမ်းမတီးထႅင်ႈလႄႈ ႁိူၼ်းယေး ၵူၼ်းမိူင်း လႄႈ ဝတ်ႉဝႃးၽႃသိူဝ်ႇ ၸိူဝ်းၼႆႉၵေႃႈ လူႉၵွႆထႅင်ႈတင်းၼမ် ၼႆယဝ်။

ဝၢၼ်ႈတွင်းၶမ်းၼႆႉ မီးၾၢႆႇၸၢၼ်း ဝဵင်းၼွင်ၶဵဝ် ယၢၼ်ဝဵင်းမွၵ်ႈ 20 လၵ်း ယူႇတီႈ သိုၵ်းတဢၢင်း TNLA တင်း PDF ႁူမ်ႈၵၼ် ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ ဢၼ်ပၵ်းသဝ်းဝႆႉ ၼႂ်းထုင်းၼၼ်ႉမႃး ႁိုင် ၶၢဝ်းတၢင်း 6 လိူၼ်ယဝ်ႉ။

ၵွပ်ႈၼႆလႄႈ သိုၵ်းမၢၼ်ႈ လုၵ်ႉတၢင်း ဝဵင်းပၢင်ႇဢူး ထႅမ်ဢဵၼ်ႁႅင်းသိုၵ်းသေ လေႃႇတိုၵ်းၶိုၼ်းလႄႈ ၾၢႆႇ သိုၵ်းတဢၢင်း TNLA လႆႈထွႆပၼ်ၶိုၼ်း ၼႃႈတီႈၸိူဝ်းၵုမ်းၵမ်လႆႈဝႆႉ ၸိူဝ်း ၼၼ်ႉ ၵမ်ႈၽွင်ႈၵွၼ်ႇ ဝႃႈၼႆ။

ဝၢႆးလင် ၽႅၼ်ယၼ်ႇသိုၵ်း 1027 ပွၵ်ႈၵမ်းသွင်မႃး သိုၵ်းတဢၢင်း TNLA ပိုၼ်ၽၢဝ်ႇဢွၵ်ႇမႃးဝႃႈ ယိုတ်းလႆႈ ဝဵင်းၼွင်ၶဵဝ် မိူဝ်ႈဝၼ်းတီႈ 10/07/2024 ၼၼ်ႉသေတႃႉ ႁၢၼ်ႉတေႃႇထိုင်ယၢမ်းလဵဝ် ယင်းပႆႇၵုမ်းၵမ်လႆႈ ဝဵင်းၼွင်ၶဵဝ်တင်းသဵင်ႈ။

တႅမ်ႈ – ၽူၺ်းၼုမ်ႇ