တႄႇဢဝ် ဝၼ်းတီႈ 02-06/03/2025 သင်ၶၸဝ်ႈလႄႈ တၵ်ႉၵႃႇသတ်ႉထႃး ႁူမ်ႈၵၼ် ၸတ်းႁဵတ်းပၢင် ၵုမ်လူင်မႁႃသတိပထၢၼ်ႇ (ၺီႇလႃႇၶၢမ်ႇ) ပတ်းပိုၼ်ႉၸိုင်ႈတႆး ပွၵ်ႈၵမ်း 59 လႄႈ မၢႆတွင်း တိူၵ်ႈၵမ်မထၢၼ်း ၶွပ်ႈတဵမ် 50 ပီ (ပီၵွၼ်းၶမ်း) တီႈဝဵင်းပၢင်လူင် ၸိုင်ႈတႆးပွတ်းၸၢၼ်း။
ၸဝ်ႈၶူး ဝိၸႃရတ ၸဝ်ႈၵွၼ်းဝတ်ႉၵမ်မထၢၼ်း ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ -“ပၢင်ၵုမ် ၼႆႉ ၸတ်းႁဵတ်းၶၢဝ်းတၢင်း 5 ဝၼ်း။ သင်ၶၸဝ်ႈလႄႈ ၽူႈတၢင်တူဝ်တိူၵ်ႈၵမ်မထၢၼ်း ၼႂ်းမိူင်းတႆးၸိူဝ်း မႃးၶဝ်ႈႁူမ်ႈ ဢုပ်ႇဢူဝ်းတၢင်ႇလဝ်ႈ လၢတ်ႈၼႄၵၼ် လွင်ႈငဝ်းလၢႆးၵၢၼ်ငၢၼ်း တီႈတိူၵ်ႈၵမ်မထၢၼ်း ၽႂ်မၼ်းလႄႈ လွင်ႈႁၢင်ႈႁႅၼ်းၽႅၼ်ၵၢၼ်မိူဝ်းၼႃႈ ၸဵမ်ၸိူဝ်းၼႆႉ။ သင်ၶၸဝ်ႈ မႃးၶဝ်ႈႁူမ်ႈပၢင်ၵုမ် ဢမ်ႇယွမ်း 500 ပၢႆ”- ဝႃႈၼႆ။
လိူဝ်ၼၼ်ႉ ၸဝ်ႈၼႄတြႃး မႃးဢုပ်ႇဢူဝ်းတႅတ်းတတ်း လွင်ႈၼႃႈၵၢၼ်ဢၼ်တေ ၸတ်းႁဵတ်းၼႂ်းပီ တေမႃး တေပၼ်ပုၼ်ႈၽွၼ်း ဝဵင်းလႂ်ႁပ်ႉပဵၼ်ၸဝ်ႈတႃႇၼ တႃႇပၢင်ၵုမ်လူင်လႄႈ ပၢင်တြႃးၶၢဝ်းမႆႈ ၼႆႉ တေသိုပ်ႇပိုတ်ႇၵႂႃႇတီႈလႂ် ၸဵမ်ၸိူဝ်းသေ ၽွင်းပၢင်ပွႆး ၶၢဝ်းတၢင်းႁႃႈဝၼ်းၼႆႉ မီးသြႃႇၸဝ်ႈလူင် ၼႂ်းမိူင်းတႆးလၢႆတူၼ် မႃးမဵတ်ႉတႃႇတြႃးပွၼ်ႈထမ်းပၼ် ၵူႈၶမ်ႈ တၵ်ႉၵႃႇသတ်းထႃး ၼႂ်းမိူင်းတႆး တီႈ ၸမ်ၵႆ မႃးၶဝ်ႈႁူမ်ႈဢမ်ႇယွမ်းမိုၼ်ႇ။
ဝၼ်းတီႈ 06 မိူဝ်ႈၼႆႉသမ်ႉ ပိုတ်ႇလုမ်းငဝ်ႈငုၼ်း ၸုမ်းၸဝ်ႈၼႄတြႃး ပတ်းပိုၼ်ႉၸိုင်ႈတႆးသေ ၸဝ်ႈ တူၼ်ၶူးလူင် ဝိၸိတ်တသႃရ ႁူဝ်ပဝ်ႈ ၸုမ်းၸဝ်ႈၼႄတြႃး ၵမ်မထၢၼ်းၸိုင်ႈတႆး ပိုၼ်ၽၢဝ်ႇ ႁုပ်ႈၼႄ ၶေႃႈတူၵ်းလူင်းပၢင်ၵုမ်လူင်သေ ပီၼႃႈမႃး တေလႆႈႁပ်ႉၸတ်းႁဵတ်း ပၢင်ၵုမ်လူင် မႁႃသတိပထၢၼ်ႇ ပွၵ်ႈၵမ်း 60 ၼၼ်ႉ တေၸတ်းႁဵတ်းတီႈ တိူၵ်ႈၵမ်မထၢၼ်း ၼမ်ႉသၢႆး ထုင်ႉဝၢၼ်ႈႁၢတ်ႇ ဝဵင်းလၢင်း ၶိူဝ်း။ ပၢင်တြႃးသင်ၶၸဝ်ႈ ၵွၼ်ႇၶဝ်ႈဝႃသႃၼၼ်ႉသမ်ႉ တေၸတ်းႁဵတ်းတီႈ တိူၵ်ႈၵမ်ႇမထၢၼ်း ဝတ်ႉသုၶိ တႃႇ ဝဵင်းၼမ်ႉၸၢင် ၼႆယဝ်ႉ။
မိူဝ်ႈၼႆႉယၢမ်းၵၢင်ဝၼ်းသမ်ႉ ၸဝ်ႈတူၼ်ၶူးလူင် တွၵ်ႇတိူဝ်ႇ ထမ်မသႃမိ ၽူႈၵေႃႇတင်ႈ ၸၼ်ႉၸွမ် ပုတ်ႉထမိူင်းတႆး မဵတ်ႉတႃႇပွၼ်ႈထမ်းတြႃးသေ ၸဝ်ႈသြႃႇတွၵ်ႇတိူဝ်ႇ ပၺႃၼၼ်တ ႁူဝ်ပဝ်ႈ ငဝ်ႈငုၼ်း မုၵ်ႉၸုမ်းလူင်သင်ၶၸိုင်ႈတႆး တေဢွၼ်ၼမ်လူႇတၢၼ်းၵႂႃႇ ၼႆယဝ်ႉ။
ပၢင်ၵုမ်လူင်မႁႃသတိပထၢၼ်ႇ ပွၵ်ႈၵမ်း 59 ၼႆႉ ၽူႈတၢင်တူဝ် တိူၵ်ႈၵမ်မထၢၼ်း ၼႂ်းမိူင်းတႆးပတ်း ပိုၼ်ႉ ဢၼ်မီးဝႆႉ 37 တိူၵ်ႈၼၼ်ႉ မႃးၶဝ်ႈႁူမ်ႈ ဢုပ်ႇဢူဝ်း 35 တိူၵ်ႈ။ တိူၵ်ႈၵမ်မထၢၼ်း မိူင်းယၢင်းလႅင် 2 တိူၵ်ႈ တိုဝ်ႉၸၢႆးၶႃးလႄႈ ၵွင်းမူးၶမ်း၊ တိူၵ်ႈၵမ်မထၢၼ်း မိူင်းမွၼ်းသမ်ႉ ပဵၼ်တီႈဝဵင်းသထူင်ႇ တိူၵ်ႈၼိုင်ႈသေ ဢၼ်ဢမ်ႇပဵၼ်မႃးၶဝ်ႈႁူမ်ႈပၢင်ၵုမ်ၼႆႉတႄႉ ပဵၼ်တိူၵ်ႈၵမ်မထၢၼ်း ၸေႊလၢၼ်ႉလႄႈ တိူၵ်ႈၵမ်မထၢၼ်း ဝဵင်းၼမ်ႉတူႈ ၼႆယဝ်ႉ။
ဢွင်ႈတီႈ တိုဝ်းၵမ်တြႃး တိူၵ်ႈၵမ်မထၢၼ်း မူႇလမိၼ်းၵုၼ်းၼႆႉ ၼႂ်းမိူင်းတႆးပတ်းပိုၼ်ႉ မီး 37 ဢွင်ႈ။ ၼႂ်းၼၼ်ႉ တိူၵ်ႈၵမ်မထၢၼ်း တီႈဝဵင်းလၢင်းၶိူဝ်း ပဵၼ်တိူၵ်ႈငဝ်ႈ၊ တီႈတႄႇပၢင်တိုဝ်းၵမ် – ၵမ်မထၢၼ်း ပွၵ်ႈဢွၼ်တၢင်းသုတ်း တင်ႈတႄႇပီၶရိတ်ႉ 1947 (ပီၵေႃးၸႃႇ 1309 ၼီႈ) မႃး တေႃႇယၢမ်းလဵဝ်။
ပီၼႆႉ ယွၼ်ႉငဝ်းလၢႆး ၼႂ်းပိုၼ်ႉတီႈဢမ်ႇၼိမ်သဝ်းလႄႈ ဢွင်ႈတီႈ ဢမ်ႇလႆႈပိုတ်ႇပၢင်တြႃးမႃး မီးယူႇ သွင်သၢမ်ဝဵင်း ၼႂ်းၼၼ်ႉ တေပဵၼ်ဝဵင်းၸေႊလၢၼ်ႉလႄႈ ဝဵင်းၼမ်ႉတူႈ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ