ယၢမ်းလဵဝ် ၶွမ်ႊမတီႊ ဢုပ်ႇဢူဝ်းလွင်ႈငမ်းယဵၼ် ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ ၶွင်တပ်ႉသိုၵ်းမၢၼ်ႈ (NSPNC) လႄႈ ပႃႇတီႇၵၢၼ်မိူင်းလၢႆလၢႆၸုမ်း တေႁူမ်ႈၵၼ် ႁၢင်ႈႁႅၼ်းတႃႇထတ်းသၢင်မူၼ်းမႄးၶိုၼ်း ပိူင်ငဝ်ႈပိုင်းမိူင်း 2008 တႃႇၼႂ်းပၢင်ၵုမ်လူင်သၽႃ မိူင်းႁူမ်ႈတုမ် ဢၼ်တေၵေႃႇတင်ႈၶိုၼ်ႈမႃးမႂ်ႇၼႆႉ ဝႃႈၼႆ။

ဢူးၵူဝ်ႇၵူဝ်ႇၵျီး ႁူဝ်ပဝ်ႈ ပႃႇတီႇၵူၼ်းမိူင်း (PP) လၢတ်ႈဝႆႉတီႈသိုဝ်ႇၶၢဝ်ႇ CNI ဝႃႈ – “ႁဝ်းၶႃႈ ဢုပ်ႇဢူဝ်းၵၼ်ဝႆႉ လွင်ႈတႃႇၸတ်းပၢင်ၵုမ်လူင် ၺီႇလႃႇၶၢမ်ႇ ၵဵဝ်ႇၵပ်းၵၢၼ်ဢုပ်ႇဢူဝ်းထတ်းသၢင်ၶိုၼ်း မၢႆမီႈမတ်ႉတႃ ဢၼ်ပႃးဝႆႉ ၼႂ်းပိူင်ငဝ်ႈပိုင်းမိူင်းၼၼ်ႉ တင်းသဵင်ႈ။ လွင်ႈၼႆႉ လူဝ်ႇဢုပ်ႇဢူဝ်းၵၼ်ၵႂႃႇၵမ်းၸၼ်ႉၸၼ်ႉ ပေႃးၼၼ် ၸင်ႇယုမ်ႇယမ်ဝႃႈ တေၸၢင်ႈပဵၼ်မႃး ပၢင်ဢုပ်ႇဢူဝ်း ၵႂၢင်ႈၵႂၢင်ႈၶႂၢင်ၶႂၢင်”- ဝႃႈၼႆ။

လႆႈႁူႉဝႃႈ ၶွမ်ႊမတီႊ ဢုပ်ႇဢူဝ်းလွင်ႈငမ်းယဵၼ်လႄႈ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ ၶွင်တပ်ႉသိုၵ်းမၢၼ်ႈ NSPNC တင်း ၸုမ်းပွင်ၵၢၼ် ၼႂ်းပႃႇတီႇၵၢၼ်မိူင်းလၢႆလၢႆၸုမ်း ဢုပ်ႇဢူဝ်းၵၼ်ဝႆႉ ၶေႃႈမၢႆမီႈ ဢၼ်တေလႆႈမူၼ်ႉမႄး ၼႂ်းပိူင်ငဝ်ႈပိုင်းမိူင်းၼၼ်ႉမီးယူႇ 43 ၶေႃႈ။ ၶေႃႈမၢႆမီႈ ဢၼ်တေလႆႈသိုပ်ႇဢုပ်ႇဢူဝ်းၵၼ်ၵႂႃႇ တိုၵ်ႉၵိုတ်းဝႆႉယူႇ တႃႇ 7 ၶေႃႈ ၼႆယဝ်ႉ။

တွၼ်ႈတႃႇ တေမူၼ်ႉမႄး ပိၼ်ႇတႅမ်ႈၶိုၼ်း ပိူင်ငဝ်ႈပိုင်းမိူင်း 2008 ၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ ပႃႇတီႇၵၢၼ်မိူင်းဢိၵ်ႇပႃး ၵူၼ်းၸိူဝ်းႁဵတ်းၵၢၼ်တူင်ႉၼိုင် လွင်ႈတီႊမူဝ်ႊၶရေႊၸီႊ ၸိူဝ်းၼႆႉ တုၵ်းယွၼ်းမႃး ၶၢဝ်းတၢင်းႁိုင်သေတႃႉ ၾၢႆႇတပ်ႉသိုၵ်းမၢၼ်ႈသမ်ႉ ဢမ်ႇၽွမ်ႉၸွမ်းမႃးသေပွၵ်ႈ ၼႆယဝ်ႉ။

ၽူႈလူင်ႉလႅၼ်ႇ ၵၢၼ်သိုၵ်းၵၢၼ်မိူင်းၶဝ် ထတ်းသၢင်ဝႆႉဝႃႈ – “တႃႇတေၸတ်းၵၢၼ် ၶိုင်ပွင်ပဵၼ်လႆႈ ပၢင် လိူၵ်ႈတင်ႈၼႂ်းမိူင်းႁူမ်ႈတုမ်ၼႆႉ မီးတၢင်းမုင်ႈမွင်းဢေႇတႄႉတႄႉ။ သင်ဝႃႈ တင်ႈၶိုၼ်ႈ မႃးလႆႈသၽႃးမိူင်း ႁူမ်ႈတုမ်ၼႆသေတႃႉၵေႃႈ တွၼ်ႈတႃႇ တေဢုပ်ႇဢူဝ်း လွင်ႈတႃႇမူၼ်ႉမႄးလႅၵ်ႈလၢႆႈ ၶိုၼ်းပၵ်းပိူင်လၵ်း မိူင်း 2008 ၼၼ်ႉၵေႃႈ တေဢမ်ႇၸႂ်ႈလွင်ႈငၢႆႈ”- ဝႃႈၼႆ။  

ယၢမ်းလဵဝ် သိုၵ်းမၢၼ်ႈ ၸႂ်ႉတိုဝ်းပိူင်ငဝ်ႈပိုင်းမိူင်း 2008 ၼႆႉသေ ႁုပ်ႈယိုတ်းဢႃႇၼႃႇ ၼႂ်းမိူင်းႁူမ်ႈတုမ် ပတ်းပိုၼ်ႉမႃး မိူဝ်ႈဝၼ်းတီႈ 01/02/2021 မႃးႁၢၼ်ႉတေႃႇထိုင်ယၢမ်းလဵဝ် မီးႁိုင်ၶၢဝ်းတၢင်း 4 ပီယဝ်ႉ။

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ပိုၼ်ၽၢဝ်ႇႁၢင်ႈႁႅၼ်းဝႆႉ တေၸတ်းႁဵတ်းပၢင်လိူၵ်ႈတင်ႈပတ်းပိုၼ်ႉ မိူင်းႁူမ်ႈတုမ်ၵႂႃႇ ၼႂ်းလိူၼ်ဢွၵ်ႊထိူဝ်ႊပိူဝ်ႊ၊ ၼူဝ်ႊဝႅမ်ႊပိူဝ်ႊ၊ တီႊသႅမ်ႊပိူဝ်ႊ ပီ 2025 ၼႆႉသေ တေမွပ်ႈဢၢပ်ႈဢႃႇၼႃႇ ၸတ်းပွင်ၸိုင်ႈမိူင်းပၼ်ၶိုၼ်း ပႃႇတီႇၵၢၼ်မိူင်း ဢၼ်ဢွင်ႇပေႉပၢင်လိူၵ်ႈတင်ႈၶိုၼ်း ၼႆယဝ်ႉ။

တႅမ်ႈ – ၽူၺ်းၼုမ်ႇ