ၼႂ်းၶၢဝ်းတၢင်း 4-5 ဝၼ်း ႁူဝ်လိူၼ်မၢတ်ႊၶျ်ၼႆႉၵူၺ်း ၾၢႆႇႁူမ်ႇလူမ်ႈလႅၼ်လိၼ်ထႆး မိူင်းထႆးပွတ်းၼိူဝ် တီႉလႆႈယႃႈမႃႉ 2 လၢၼ်ႉမဵတ်ႉယဝ်ႉ။

ဝၼ်းတီႈ 04/03/2025 ယၢမ်းၵၢင်ၼႂ်ၸဝ်ႉ 1:45 မူင်း သိုၵ်းထႆးႁူမ်ႇလူမ်ႈလႅၼ်လိၼ်လႄႈ ၸုမ်းတေႃႉယႃႈ မႃႉ ပိုတ်းယိုဝ်းၵၼ် တီႈလွႆႁူဝ်ၼူၵ်ႉ ဝၢၼ်ႈၶွပ်ႇလင် ဢိူင်ႇမွၼ်ႉပိၼ်ႇ ၸႄႈဝဵင်းၾၢင် ၸႄႈတွၼ်ႈၵဵင်းမႂ်ႇ။ ပိုတ်းယိုဝ်းၵၼ်ႁိုင်မွၵ်ႈ 15 မိၼိတ်ႉ။ ထိုင်ယၢမ်းၵၢင်ၼႂ်မိူင်းလႅင်း ပလိၵ်ႈထႆး ၵႂႃႇၵူတ်ႇထတ်းပိုၼ်ႉတီႈ ၊ ထူပ်းႁၼ်ထူင်ၸၢၼ်ႈဢၼ်သႂ်ႇယႃႈမႃႉဝႆႉ 4 ထူင်။ တင်းမူတ်းယႃႈမႃႉ မီး 4 သႅၼ်မဵတ်ႉ။ ၵူၼ်းတေႃႉယႃႈ မႃးတႄႉ ဢမ်ႇႁၼ်သေၵေႃႉယဝ်ႉ – ဝႃႈၼႆ။

ၼႂ်းဝၼ်းတီႈ 04/03/2025 ၼၼ်ႉၵူၺ်းၼင်ႇၵဝ်ႇ သိုၵ်းၾၢႆႇႁူမ်ႇလူမ်ႈလႅၼ်လိၼ် ၸႄႈတွၼ်ႈၵဵင်းလၢဝ် ႁႄႉၵူၼ်းၵေႃႉၼိုင်ႈ ဢၼ်ၸေးထူင်ၸၢၼ်ႈမႃး တီႈဝၢၼ်ႈဢၼုရူဝ်းထႆး ဢိူင်ႇမိူင်းၼ ၸႄႈဝဵင်းၵဵင်းလၢဝ်။ မၼ်းၸၢႆးပွႆႇထူင်ၸၢၼ်ႈပိူဝ်ႉမၼ်းသေ လႅၼ်ႈပၢႆႈ။ ၽိူဝ်ႇသိုၵ်းထႆးၵႂႃႇတူၺ်း လႆႈႁၼ်ယႃႈမႃႉၼႂ်းထူင်ၼၼ်ႉ 2 သႅၼ်မဵတ်ႉ။

မိူဝ်ႈဝၼ်းတီႈ 02/03/2025 ၼၼ်ႉၵေႃႈ သိုၵ်းႁူမ်ႇလူမ်ႈလႅၼ်လိၼ် တီႈၸႄႈတွၼ်ႈၵဵင်းႁၢႆး ႁႄႉၵူၼ်းၸုမ်း ၼိုင်ႈ တီႈဢိူင်ႇဝဵင်းၵႅၼ်ႇ။ လႆႈပိုတ်းယိုဝ်းၵၼ်မွၵ်ႈ 5 မိၼိတ်ႉ။ ၼၼ်ႉၵေႃႈ သိုၵ်းထႆးတီႉလႆႈယႃႈမႃႉ ၼႂ်း ထူင်လုၵ်ႈၼိုင်ႈ မီး 2 သႅၼ်မဵတ်ႉ။ တီႈဢိူင်ႇပူင်ႇၽႃ ၸႄႈဝဵင်းမႄႈသၢႆၼၼ်ႉၼင်ႇၵဝ်ႇ တီႉလႆႈယႃႈမႃႉ ထႅင်ႈ 2 တီႈ၊ ႁူမ်ႈၵၼ်လႆႈယႃႈမႃႉတင်းမူတ်း 1,370,000 မဵတ်ႉ(ၼိုင်ႈလၢၼ်ႉပၢႆ)။

ၼႂ်းဝၼ်းၼၼ်ႉၵူၺ်း ပလိၵ်ႈထႆးသိုၵ်းထႆး ႁႄႉၵူတ်ႇထတ်းရူတ်ႉၵႃးတၢင်ႇၶဝ်ႈၵၢပ်ႇလမ်းၼိုင်ႈ တီႈၸႄႈတွၼ်ႈဢယုတ်ႉထယႃး။ ၼၼ်ႉၵေႃႈ မီးယႃႈမႃႉ 5 သႅၼ်မဵတ်ႉ မူၵ်းမႃးၼႂ်းရူတ်ႉၵႃးတၢင်ႇၶဝ်ႈၵၢပ်ႇ။ ၵူၼ်း ၶပ်းရူတ်ႉၵႃး ပဵၼ်ၵူၼ်းယူႇၸႄႈဝဵင်းမႄႈတႅင် ဝဵင်းၵဵင်းမႂ်ႇ။ ယႃႈမႃႉၼၼ်ႉၵေႃႈ ဢဝ်တၢင်းၵဵင်းမႂ်ႇ လူင်းၵႂႃႇ – ဝႃႈၼႆ။

ၼႂ်းႁူဝ်ပီ 2025 ၼႆႉ ၸုမ်းတေႃႉယႃႈ ၶၢမ်ႈလႅၼ်လိၼ်ၶဝ်ႈမိူင်းထႆး တၢင်းၸႄႈဝဵင်းမိူင်းၾၢင်လႄႈ ၸႄႈ ဝဵင်းမႄႈသၢႆ၊ ၵဵင်းႁၢႆး ၶႂ်ႈဝႃႈမီးၵူႈဝၼ်း။ ၼႂ်းႁူဝ်လိူၼ်မၢတ်ႊၶျ် ၶၢဝ်းတၢင်း 4-5 ဝၼ်းၼႆႉၵူၺ်း ဢၼ်ၾၢႆႇ ႁူမ်ႇလူမ်ႈလႅၼ်လိၼ်ထႆး တီႉလႆႈယႃႈမႃႉၼႆႉ တင်းမူတ်းမီး 2 လၢၼ်ႉမဵတ်ႉပၢႆယဝ်ႉ။

ဢၢင်ႈဢိင် – Maesaipress