ဝၼ်းတီႈ 4/3/2025 ယၢမ်းႁူဝ်ၶမ်ႈ 4 မူင်း ၸဝ်ႈတူၼ်ၶူးၼင်ႈၵျွင်းဝၢၼ်ႈလွႆပဝ်း  လႄႈ တၵ်ႉၵႃႇလူင် မၼ်းၸဝ်ႈထုၵ်ႇယိုဝ်းတၢႆ ၼိူဝ်ဝတ်ႉၵျွင်းဝၢၼ်ႈ ဢုမ်ႇတိုင်း ၸႄႈဝဵင်းၾၢႆၶုၼ်  ၸိုင်ႈတႆးပွတ်းၸၢၼ်း   ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ ၸဝ်ႈသြႃႇဝဵင်းၾၢႆၶုၼ် ပၢႆႈၽေးသိုၵ်းမီး 2-3 ပီ ယဝ်ႉ။ ပၢႆႈယူႇသွၼ်ႈဝႆႉတီႈ ဝၢၼ်ႈလွႆပဝ်း ၊ ႁူဝ်ၶမ်ႈမႃးၸဝ်ႈသြႃႇဝႃႈ   တေၵႂႃႇဝၢၼ်ႈ ဢုမ်ႇတိုင်းၵမ်းၼိုင်ႈၼႆ ၊ ၽွင်းႁွတ်ႈထိုင်တီႈၼၼ်ႈၵေႃႈ ထုၵ်ႇယိုဝ်း။ တၵ်ႉၵႃႇလူင်မၼ်းၸဝ်ႈ ဢၼ်ႁေႃႈၵႃး သူင်ႇပၼ်ၸဝ်ႈ ၼၼ်ႉၵေႃႈ ထုၵ်ႇယိုဝ်းတၢႆ ထင်တီႈ”- ဝႃႈၼႆ ။

ၸဝ်ႈတူၼ်ၶူး ၼင်ႈၵျွင်းဝၢၼ်ႈလွႆပဝ်း ဢၼ်ထုၵ်ႇယိုဝ်းသေလူႉလွၼ်ႇထင်တီႈၼႆႉၸိုဝ်ႈႁွင်ႉ ဢူးထမ်ႇမသႃႇရ (ႁိုဝ်) ၸဝ်ႈယွမ်( တၵ်ႉၵႃႇဢွၼ်ၵၼ်ႁွင်ႉ ဢူးပဵင်ႇ)  ဢႃယု 47 ပီ ဝႃႇၸဝ်ႈ 27 ဝႃႇ  ၺႃးယိုဝ်းတီႈတူဝ် 8 ၵမ်း ၊ တၵ်ႉၵႃႇမၼ်းၸဝ်ႈ  ၸိုဝ်ႈႁွင်ႉၸၢႆးပီး ဢႃယု 40 ပၢႆ  ၺႃးယိုဝ်း 2 ၵမ်း ။   လူႉလွၼ်ႇတၢႆထင်တီႈ  ၵျွင်းဝၢၼ်ႈဢုမ်ႇတိုင်း ၼၼ်ႉၵမ်းလဵဝ် ဝႃႈၼႆ ။ ပဵၼ်ၽႂ်ၵေႃႉယိုဝ်း၊  ယွၼ်ႉသင် ၺႃးယိုဝ်းၼႆတႄႉ ဢမ်ႇမီးၽႂ် ယိုၼ်ယၼ် ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ-“ ပဵၼ်ၵၢင်ၶမ်ႈ ၵၢင်ၶိုၼ်းၵေႃႈ ဢမ်ႇၸႂ်ႈၶႃႈ ။ ၵၢင်ဝၼ်းလူင် ၵေႃႈယိုဝ်းၵၼ်။ သမ်ႉပဵၼ်ၼိူဝ်ၵျွင်းမုၼ်ၸဝ်ႈထႅင်ႈ။ ၸုမ်းလႂ်ယိုဝ်းတႄႉတႄႉၵေႃႈ ဢမ်ႇႁူႉ၊တၢင်းၼၼ်ႉ တႄႉ ဢၼ်ယိပ်းၵွင်ႈၵၢင်ႇၼႆ  သိုၵ်းယၢင်းလႅင်ၵေႃႈမီး သိုၵ်းပျီႇတူႉၸိတ်ႉပဢူဝ်းၵေႃႈမီး ၊ တီႈတူဝ် မၼ်း ၸဝ်ႈ  တိုဝ်ႉမၢၵ်ႇၵွင်ႈၼမ် ထိုင်တီႈတၢႆထင်တီႈ ၊ ပေႃးဝႃႈတႄႉတႄႉ ၸဝ်ႈသြႃႇ ဢမ်ႇယၢမ်ႈ မီးပၼ်ႁႃ  တင်းၽႂ်သေပွၵ်ႈ ။ ဢၼ်ငွႆးယိုဝ်းၵၼ်ၼႆႉ ပဵၼ်လွင်ႈတင်ႈၸႂ်ၶႂ်ႈၶႃႈႁႅမ်ၵၼ်တၢႆ ၊ ပေႃးႁၼ်ဢမ်ႇထုၵ်ႇတႃႇၵေႃႉလႂ်ၵေႃႉ ၶဝ်ယိုဝ်းတၢႆလူင်ၵႂႃႇၸိူင်ႉၼၼ်။ မုၼ်ၸဝ်ႈမုၼ်ၸၢင်း ၵေႃႈၶဝ်ဢမ်ႇဝႆႉ ”- ဝႃႈၼႆ ။

လွင်ႈၼႆႉ ၸုမ်းသိုၵ်းၵူၼ်းမိူင်း PDF ဝဵင်းၾၢႆၶုၼ်ၼႄႉ ဢွၵ်ႇလိၵ်ႈပိုၼ်ၽၢဝ်ႇဝႃႈ  – ဢၼ်ၸဝ်ႈၼင်ႈၵျွင်း လွႆပဝ်း ထုၵ်ႇယိုဝ်းၼႆႉ ဢမ်ႇၸႂ်ႈၼမ်ႉမိုဝ်းၶဝ်။ ဢမ်ႇၵဵဝ်ႇတၢင်းၶဝ်။ ၶဝ်ဢမ်ႇလႆႈႁူႉသင်ၸွမ်း- ဝႃႈၼႆ။

ၸဝ်ႈသြႃႇဢူးပဵင်ႇၼႆႉ ပဵၼ်ၸဝ်ႈဢၼ် ပူၵ်းပွင်သႃႇသၼႃႇၼႂ်းၸႄႈဝဵင်းၾၢႆၶုၼ် ၊ ၸုင်ၸၼ်ပႃး မေႃသွၼ် လုၵ်ႈႁဵၼ်း ၵူၼ်းၼုမ်ႇ၊ ၵမ်ႉၸွႆႈထႅမ်ပၼ်ၵူၼ်းပၢႆႈၽေးသိုၵ်း ။   တၵ်ႉၵႃႇ  ၸၢႆးပီးၼၼ်ႉပဵၼ်ပေႃႈဢွၵ်ႇ လူႇတၢၼ်းဝတ်ႉဝႃးၽႃသိူဝ်ႇတႃႇမၼ်းၸဝ်ႈ။ ပဵၼ်ၵေႃႉဢၼ်မၼ်းၸဝ်ႈလႆႈၸႂ်ယႂ်ႇပိုင်ႈဢိင် လူလွမ်တူၺ်း ထိုင်ၵၼ် ႁူမ်ႈၵၼ်ပူၵ်းပွင်ပၢႆးပၺ်ႇၺႃႇ လႄႈသႃႇသၼႃႇ – ၵူၼ်းပိုၼ်ႉတီႈလၢတ်ႈၼင်ႇၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၸဝ်ႈသြႃႇပူၵ်းပွင်ၵၢၼ်သႃႇသၼႃႇတႃႇတႆးၵမ်ႈၼမ် ၊ ၽွင်းမိူင်းလီတႄႉ လုၵ်ႈဢွၼ်တႆးဢၼ်မီးတင်းၼႆႉ ပိုတ်ႇပၢင်သွၼ်လိၵ်ႈတႆး ၊ ၽိုတ်ႇပၢင်ၾိုၵ်းၽွၼ်ႉပၼ် မေႃသွၼ် တႃႇသွၼ်ပၼ်လိၵ်ႈတႆးၶိုၼ်းၵူႈပီ ၊ ပဵၼ်တီႈၸႂ်ယႂ်ႇ ၵူၼ်းပိုၼ်ႉတီႈႁဝ်းၶႃႈ၊ ပဵၼ်ၽူႈဢွၼ်ႁူဝ်လီတႃႇ ၵူၼ်းပိုၼ်ႉတီႈႁဝ်းဢေႃႈ”- ဝႃႈၼႆ ။ 

တီႈတၢင်းဝဵင်းမိူင်းပၢႆးလႄႈ ၾၢႆၶုၼ် ၸိုင်ႈတႆးပွတ်းၸၢၼ်းၼႆႉ တိတ်းၸပ်းၵၼ် တၢင်းမိူင်းယၢင်းလႅင်၊ သိုၵ်းမၢၼ်ႈလႄႈ ၸုမ်းၵႅတ်ႇၶႄၵူၼ်းမိူင်းႁူမ်ႈ သိုၵ်းၽွမ်ႉႁူမ်ႈယၢင်းလႅင် ပဵၼ်ပၢင်တိုၵ်းၵၼ် ဢမ်ႇၵိုတ်းဢမ်ႇထၢတ်ႇ။ ၵူၼ်းမိူင်းဢမ်ႇလႆႈၶဝ်ႈယူႇ ၼႂ်းဝၢၼ်ႈၼႂ်းဝဵင်း၊ လႆႈပၢႆႈၽေးသိုၵ်းဝႆႉ မီးမႃးၶၢဝ်းတၢင်း 3 ပီပၢႆယဝ်ႉ။

ယၢမ်းလဵဝ် ၸွမ်းပိုၼ်ႉတီႈ ဝဵင်းၾၢႆၶုၼ်ၼႆႉ ဢမ်ႇမီးပၢင်တိုၵ်းသင်သေတႃႉ ၾၢႆႇသိုၵ်းမၢၼ်ႈတႄႉ တိုၵ်ႉထႅမ်ႁႅင်းသိုၵ်းမႃးထႅင်ႈတင်းၼမ်လႄႈ ၵႆႉမီးလွင်ႈပွႆႇမၢၵ်ႇလူင် သႂ်ႇၸွမ်းဝၢၼ်ႈသေ ႁဵတ်းႁႂ်ႈၵူၼ်းဝၢၼ်ႈ ပႃးၸဵမ်ၵူၼ်းပၢႆႈၽေး ဢွၼ် ၵၼ်မႆႈၸႂ် ၵူဝ်ဢမ်ႇမီးလွင်ႈႁူမ်ႇလူမ်ႈ။ ယဝ်ႉၵေႃႈ ၸိူဝ်းပၢႆႈမႃးၼၼ်ႉ ပႆႇၸၢင်ႈပွၵ်ႈၶိုၼ်းႁိူၼ်းယေး ဢွၼ်ၵၼ်ထူပ်းတၢင်းယၢပ်ႇၽိုတ်ႇဢမ်ႇၸၢင်ႈၵႂႃႇမႃးႁႃၵိၼ်လဵင်ႉတွင်ႉ။