ယၢမ်းလဵဝ် ၼႂ်းၼႃႈတီႈ တပ်ႉသိုၵ်းၵဝ်ႈၵၢင်ႉ MNDAA ၵုမ်းၵမ်ဝႆႉ ၼႂ်းၸႄႈဝဵင်းသီႇပေႃႉ ၸိူဝ်းၼၼ်ႉ သိုၵ်းၶဝ် ဢွၼ်တႄႇပိုတ်ႇပၢင်တေႃႇလွင်းမႃးယဝ်ႉ ဝႃႈၼႆ။
တႄႇဢဝ် လိူၼ်ၵျႅၼ်ႊၼိဝ်ႊရီႊ ပီ 2025 ၼႆႉမႃး တပ်ႉသိုၵ်းၵဝ်ႈၵၢင်ႉ MNDAA ဢွၼ်ႁူဝ်သေ ပိုတ်ႇပၢင် တေႃႇလွင်း ၼႂ်းဢိူင်ႇၵုင်းသႃႇ၊ ၼွင်ဢၢင်ႇလႄႈ ပၢင်ၼိဝ်ႉ တၢင်းၸဵင်ႇႁွင်ႇဝၼ်းဢွၵ်ႇ ၼႂ်းၸႄႈဝဵင်းသီႇ ပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ ဝဵင်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ဢၼ်တပ်ႉသိုၵ်းၵဝ်ႈၵၢင်ႉ ၶဝ် ၵုမ်းၵမ်ဝႆႉၼၼ်ႉ ၶဝ်ပိုတ်ႇပၢင်တေႃႇလွင်းမႃး ဝၢၼ်ႈၼိုင်ႈယဝ်ႉဝၢၼ်ႈၼိုင်ႈ ၸိူင်ႉၼၼ်ၶႃႈဢေႃႈ။ ၵူၼ်းသိုၵ်းၶဝ် ၵေႃႉဢႅဝ်ႇႁႃတီႈ ၶၢတ်ႈႁိူၼ်းသေ ပိုတ်ႇပၢင်တေႃႇလွင်းဢေႃႈ။ တၢင်းဢိူင်ႇၵုင်းသႃႇၼၼ်ႉ တႄႉ တႄႇပိုတ်ႇမႃးယဝ်ႉ တေႃႇပေႃးထိုင် ဢိူင်ႇပၢင်ၼိဝ်ႉ ၶႂ်ႈဝႃႈပၢင်လွင်းၼႆႉ မီးၵူႈဝၢၼ်ႈယဝ်ႉ”- ဝႃႈၼႆ။
ပူၼ်ႉမႃး မိူဝ်ႈလိူၼ်ဢေႃႊၵတ်ႊသ် ပီ 2024 ၼၼ်ႉ တပ်ႉသိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ တပ်ႉသိုၵ်းမၢၼ်ႈ ၶလယ 147 ဢၼ်ပၵ်းဝႆႉတီႈဢိူင်ႇၼွင်ၵေႃႈလူင်ၼၼ်ႉ။ ၵွပ်ႈၼႆ ၼႂ်းၶၢဝ်းတၢင်း 6 လိူၼ်မႃး ၼႆႉ သိုၵ်းၵဝ်ႈၵၢင်ႉၶဝ် တႄႇပိုတ်ႇပၢင်တေႃႇလွင်းမႃး တၢင်းၸဵင်ႇႁွင်ႇဝၼ်းဢွၵ်ႇ ဝဵင်းသီႇပေႃႉၼႆႉ ဝႃႈၼႆ။
မိူဝ်ႈၽွင်း ပီမႂ်ႇၶႄႇၼၼ်ႉၵေႃႈ သိုၵ်းၵဝ်ႈၵၢင်ႉၶဝ် ၼႄၶေႃႈဢၢင်ႈသေ ပိုတ်ႇပၢင်တေႃႇလွင်းမႃး တီႈၼႂ်းဢိူင်ႇၵုင်းသႃႇ၊ ၼွင်ဢၢင်ႇ၊ ပၢင်ၼိဝ်ႉ ၸိူဝ်းၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ပႆႇပိၵ်ႉဢိုတ်း။
လိူဝ်ၼၼ်ႉ မိူၼ်ၼင်ႇ တၢင်းဝၢၼ်ႈၼမ်ႉယၢင်းၼၼ်ႉၵေႃႈ သိုၵ်းၵဝ်ႈၵၢင်ႉၶဝ် တိုၵ်ႉႁႃဢွင်ႈတီႈမၼ်း တႃႇတေပိုတ်ႇပၢင်တေႃႇလွင်းယူႇ ဝႃႈၼႆ။
“ဝၢႆးပၢင်တိုၵ်းယဵၼ်ၵႂႃႇ ပႆႇႁိုင်ၼႆႉ ယၢမ်းလဵဝ် သိုၵ်းၵဝ်ႈၵၢင်ႉၶဝ် ပေႃးတႄႇပၢင်တေႃႇလွင်းယဝ်ႉ။ တေႁဵတ်းႁႂ်ႈၵူၼ်းမိူင်း ၵွတ်းၽၢၼ်မူတ်းယဝ်ႉ။ ၸဝ်ႈတႅင်ႇမၼ်းသမ်ႉ ပဵၼ်ၶဝ် ဝၢႆးမႃး ၵူၼ်းမိူင်းၸိူဝ်းဢဝ်ႁိူၼ်း သူၼ်ႁႆႈၼႃး ၵမ်ႉၶဝ်သေ တေႃႇလွင်းၼၼ်ႉ တေထုၵ်ႇၶဝ်ႁုပ်ႈသိမ်းဢဝ်လၢႆမူတ်းယဝ်ႉ။ သင်မီးပၢင်လွင်းၵေႃႈ လွင်ႈၽူႈလၵ်ႉၸၵ်ႉၶုတ်ႈ၊ လွင်ႈၼႃႈႁိူၼ်းယေးတႅၵ်ႇယၢႆႈ ၸိူဝ်းၼႆႉ တိုၼ်းတေမီးယဝ်ႉ”- ၵူၼ်းပိုၼ်ႉတီႈ ဝဵင်းသီႇပေႃႉလၢတ်ႈ။
မိူၼ်ၼႆၼင်ႇၵဝ်ႇ တီႈပွႆးလိူၼ်သီႇ ဝတ်ႉမၢၼ်ႈသူႈ ဝဵင်းလႃႈသဵဝ်ႈၵေႃႈ တႄႇဢဝ် ဝၼ်းတီႈ 07-13/03/2025 ၼႆႉ သိုၵ်းၵဝ်ႈၵၢင်ႉၶဝ် ပၼ်ၶႂၢင်ႉပိုတ်ႇပၢင်တေႃႇလွင်း တႃႇၶၢဝ်းတၢင်း 7 ဝၼ်း ၼႆယဝ်ႉ။
တႅမ်ႈ – ၸၢႆးၶႂၼ်မိူင်း ပိၼ်ႇၽႃသႃ ၸၢႆးယွတ်ႈၶမ်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ