တင်ႈတႄႇႁၢင်လိူၼ်ဢေႃႊၵတ်ႊသ် ပီ 2024 ဝၢႆးၽႅၼ်ယၼ်ႇသိုၵ်း 1027 ပွၵ်ႈၵမ်းသွင်ယဝ်ႉၼၼ်ႉ သိုၵ်းၵူဝ်းၵၢင်ႉ MNDAA ပိုၼ်ၽၢဝ်ႇ ႁွင်ႉဢဝ်ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ပွၵ်ႈယူႇၶိုၼ်းႁိူၼ်းယေးၽႂ်မၼ်း။

ယၢမ်းလဵဝ် ၵူၼ်းမိူင်းၼႂ်းၸႄႈဝဵင်းလႃႈသဵဝ်ႈ ပွၵ်ႈယူႇၶိုၼ်းႁိူၼ်းၽႂ်မၼ်းၼမ်သေတႃႉ ယွၼ်ႉၸဝ်ႈငိုၼ်းတိုၼ်း/ ပေႃႈလဵင်ႉၸိူဝ်းႁဵတ်းၵၢၼ်ၶွမ်ႊပၼီႊ ဢမ်ႇပွၵ်ႈမိူဝ်းတႄႇၵၢၼ်ၶိုၼ်းလႄႈ ၵူၼ်းမိူင်းႁႃၵၢၼ် တႃႇ ႁဵတ်းၵိၼ်လဵင်ႉတွင်ႉ ႁႂ်ႈပေႃးၵုမ်ႇထူၼ်ႈတႃႇမုင်ႉႁေႃႁိူၼ်းၼႆႉ ယၢပ်ႇၵိၼ်းတႄႉတႄႉ ၼႆယဝ်ႉ။

ၵူၼ်းမိူင်း ဢႃႇယု 40 ပၢႆ ဢၼ်ပၢႆႈဢွၵ်ႇဝဵင်းၵႂႃႇသေ ပွၵ်ႈမႃးယူႇသဝ်းၶိုၼ်းတီႈဝဵင်းလႃႈသဵဝ်ႈ လၢတ်ႈတီႈ ၽူႈတွႆႇႁွၵ်ႈဝႃႈ – “မိူဝ်ႈလဵဝ် သိုၵ်းမၢၼ်ႈ​တင်း ၵဝ်ႈၵၢင်ႉၶဝ်ၵေႃႈ လႆႈၶေႃႈတူၵ်းလူင်းၵၼ်ယဝ်ႉ သိုၵ်းမၢၼ်ႈ ၵေႃႈ ဢမ်ႇပႆႇမႃးပွႆႇမၢၵ်ႇၶိုၼ်းယဝ်ႉလႄႈ ႁဝ်းၸင်ႇဢွၼ်ၵၼ်ပွၵ်ႈမႃးယူႇၶိုၼ်းတီႈႁိူၼ်းၼၼ်ႉၼႃႇ။ ပေႃး ႁဝ်း တေသိုပ်ႇယူႇဝဵင်းပိူၼ်ႈယူႇတိၵ်းတိၵ်ႈၸိုင် ၵႃႈၸႂ်ႉၸၢႆႇၼမ်ၼႃႇ ဢမ်ႇတႃႈၼိုင်ႇၵၼ်လႆႈယဝ်ႉလူး။ ၼင်ႇႁိုဝ် တီႈဝဵင်းႁဝ်း ပႆႇပဵၼ်ႁင်းၽႂ်ၼၼ်ႉ ၸင်ႇဢွၼ်ၵၼ်ပွၵ်ႈမႃးယူႇၶိုၼ်းထႃႈ”- ဝႃႈၼႆ။  

ၽွင်းၵူၼ်းမိူင်း ဢမ်ႇမီးၵၢၼ်ႁဵတ်း ႁႃၵိၼ်လဵင်ႉတွင်ႉယၢပ်ႇၵိၼ်းယူႇၼႆႉ ၾၢႆႇသိုၵ်းၵဝ်ႈၵၢင်ႉၵေႃႈ တႄႇ ၵဵပ်းၶွၼ်ႇ ၵႃႈယူႇသဝ်းၵိၼ်သၢင်ႈၼႂ်းဝဵင်းသေ ၵူၼ်းမိူင်းလႆႈၸၢႆႇပၼ်ၵႃႈယုၵ်းယၢၵ်း ၼမ်လိူဝ်ၵဝ်ႇတႄႉ တႄႉ ၼႆယဝ်ႉ။

ၸၢႆးမိူင်း ၵူၼ်းၼႂ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၶဝ်ၵဵပ်းၶွၼ်ႇၵႃႈ ယုၵ်း ယၢၵ်း။ ႁူင်းႁဵတ်းၵၢၼ်တတ်းလဵၵ်း (ဝွပ်ႉသျွပ်ႉ) ႁိမ်းၶၢင်ႈႁိူၼ်းႁဝ်းၼႆႉ လႆႈပၼ်ၼိုင်ႈလိူၼ် ႁႃႈမိုၼ်ႇၵမ်းလဵဝ်။ ႁိူၼ်းလင်လဵၵ်ႉ ၸိူင်ႉၼင်ႇႁဝ်းၼႆႉသမ်ႉ လႆႈပၼ်ၼိုင်ႈလိူၼ်ၼႆႉ မွၵ်ႈၼိုင်ႈမိုၼ်ႇ ၸိူဝ်းၼႆႉ။ ဢွၼ်တၢင်းၼႆႉ ႁဝ်းၵူၺ်းလႆႈပၼ်သွင်ႁဵင်ၵူၺ်းၼႃႇ”- ဝႃႈၼႆ။

ယၢမ်းလဵဝ် ဢၼ်ၼမ်လိူဝ်ပိူၼ်ႈတီႈသုတ်းတႄႉ ပဵၼ်ႁူင်းမိပ်ႇၼူတ်ႈလႄႈ ႁူင်းမႄႈမွၵ်ႇယႃႈ ဢိၵ်ႇပႃးပၢင် တေႃႇလွင်းတင်း KTV ။ ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၵိၼ်းလႄႈ ၵူၼ်းၼုမ်ႇဢိၵ်ႇ ၼၢင်းယိင်း ၼုမ်ႇဢွၼ်ႇၶဝ် ၵမ်ႈၽွင်ႈ ဢွၼ်ၵၼ်ၵႂႃႇႁဵတ်းၵၢၼ် ၼႂ်းႁူင်းမိပ်ႇၼူတ်ႈတင်း ႁူင်းမႄႈမွၵ်ႇယႃႈ ၸိူဝ်းၼႆႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းၼႂ်းဝဵင်းလႃႈသဵဝ်ႈ ၵမ်ႈၼမ် ဢွၼ်ၵၼ်မႆႈၸႂ်ဝႃႈ ၸၢင်ႈတုမ်ႉတိူဝ်ႉ ၾိင်ႈယၢမ်ႈၵူၼ်းမိူင်းလီလႄႈ လွင်ႈယူႇသဝ်းၵိၼ်သၢင်ႈ ၵူၼ်းမိူင်းလီ ၼႆယဝ်ႉ။

ပၢင်တေႃႇလွင်း ၼႂ်းဝဵင်းလႃႈသဵဝ်ႈ ဢၼ်သိုၵ်းၵဝ်ႈၵၢင်ႉ MNDAA တႄႇပိုတ်ႇမႃး ဝၢႆးလင် လႆႈၶေႃႈတူၵ်း လူင်းၵၼ်တင်း သိုၵ်းမၢၼ်ႈ တီႈၶုၼ်ႊမိင်ႊၼၼ်ႉ လူတ်းယွမ်းၵႂႃႇၵမ်ႈၽွင်ႈသေတႃႉ မိူၼ်ၼင်ႇ ပၢင်တေႃႇ ၵႆႇတႄႉ ယင်းသိုပ်ႇပိုတ်ႇပဵၼ်တၢင်းၵၢၼ်ဝႆႉယူႇလႄႈ ႁဵတ်းႁႂ်ႈၾိင်ႈယၢမ်ႈၵူၼ်းမိူင်းလူႉသေ ၸၢင်ႈတုမ်ႉ တိူဝ်ႉပႃး မုင်ႉႁေႃႁိူၼ်းတႅၵ်ႇလႅဝ်ထႅင်ႈ ၼႆယဝ်ႉ။

လႆႈႁူႉဝႃႈ ၵူၼ်းမိူင်းၼႂ်းၸႄႈဝဵင်း ဢၼ်သိုၵ်းၵဝ်ႈၵၢင်ႉၶဝ် ၵုမ်းၵမ်ဝႆႉၼၼ်ႉ လႆႈၵႂႃႇႁဵတ်းၵူၼ်းပႂ်ႉပၢင်တေႃႇလွင်း၊ မၢင်ၸိူဝ်း ၵႂႃႇယိပ်းၵွင်ႈသေ ဢဝ်ပၼ်လွင်ႈႁူမ်ႇလူမ်ႈပၢင်လွင်း၊ ၵမ်ႈၽွင်ႈ ၵႂႃႇၶဝ်ႈႁဵတ်းပဵၼ်ၵူၼ်း သိုၵ်းသေ ပႂ်ႉဢဝ်ႁူမ်ႇလူမ်ႈဝဵင်း ၸဵမ်ၸိူဝ်းၼႆႉ။

လုင်းၸၢႆး ၵူၼ်းမိူင်း ၼႂ်းဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈသိုၼ်းၼၼ်ႉ ႁဝ်းလတ်းၵဵတ်ႉ ဢေးသျႃးဝေႃးၵႂႃႇ ႁၼ်ၸၢႆးဢွၼ်ႇၵေႃႉၼိုင်ႈ ၼုင်ႈသိူဝ်ႈၶူဝ်းသိုၵ်းၵူဝ်းၵၢင်ႉသေ ယိပ်းၵွင်ႈ ပႂ်ႉတီႈၵဵတ်ႉဝႆႉ။ လုင်းၸူးထၢမ် ဢၢႆႈၼွင်ႉဢွၼ်ႇၼၼ်ႉဝႃႈ သူလႆႈငိုၼ်းလိူၼ်ၵႃႈႁိုဝ်လႃႇ မၼ်းတွပ်ႇလုင်းဝႃႈ ဢႃႉ….လုင်း မၼ်းဢမ်ႇလႆႈတဵမ်ယဝ်ႉ။ တေႃႈလဵဝ် ယွမ်းလူင်းတိၵ်းတိၵ်းဢိူဝ်ႈ။ မိူဝ်ႈတႄႇတႄႉ ၶဝ်ပၼ်ႁဝ်း 4 သႅၼ် 3 သႅၼ် ၸိူဝ်းၼႆႉယူႇ”- ဝႃႈၼႆ။

ၼႂ်းၸႄႈဝဵင်းလႃႈသဵဝ်ႈၼႆႉ ပႅၵ်ႉသမ်ႉၵူၼ်းတင်းၼမ်ႁူႉဝႃႈ သိုၵ်းၵဝ်ႈၵၢင်ႉ ၵုမ်းၵမ်ဝႆႉၵမ်းသိုဝ်ႈၼႆသေတႃႉ ၸိူဝ်းႁဵတ်းၵၢၼ်တူင်ႉၼိုင်ၼႂ်းပိုၼ်ႉတီႈတႄႉတႄႉသမ်ႉ ပဵၼ်ၸုမ်းၵူၼ်းၼုမ်ႇ ၸၢဝ်းၶိူဝ်းမၢၼ်ႈ PDF ဢၼ် သၢၼ်ၶတ်း သိုၵ်းမၢၼ်ႈ ယိုတ်းမိူင်းၼၼ်ႉ ဝႃႈၼႆ။

လႆႈႁူႉဝႃႈ ၼႂ်းၾၢႆႇၵၢၼ်လုမ်း ၵၢၼ်ဢုပ်ႉပိူင်ႇ (ထူၺ်ႇဢူၵ်ႉ)၊ ႁွင်ႈၵၢၼ် ၾၢႆႇယူႇလီ၊ ႁွင်ႈၵၢၼ် ၾၢႆႇလိူမ်ႈလႆႇ (ၸီႇပိၼ်ႇ) ၸိူဝ်းၼႆႉ ပဵၼ်ဝႆႉၵူၼ်းၼုမ်ႇၸၢဝ်းၶိူဝ်းမၢၼ်ႈ PDF ဢၼ်ၼုင်ႈၶူဝ်းသိုၵ်းၵဝ်ႈၵၢင်ႉသေ ႁဵတ်း ၵၢၼ်ဝႆႉတင်းသဵင်ႈ ၼႆယဝ်ႉ။

မိူဝ်ႈၽႅၼ်ယၼ်ႇသိုၵ်း 1027 ၼၼ်ႉ သိုၵ်းၵဝ်ႈၵၢင်ႉ MNDAA ၶဝ်ႈယိုတ်းဝဵင်းလႃႈသဵဝ်ႈသေ ပွႆႇပၼ် ၵူၼ်းၼုမ်ႇမၢၼ်ႈ ၸိူဝ်းၺႃးၶင်ဝႆႉ တၢင်းၽိတ်းႁဵတ်းၵၢၼ်မိူင်း (နိုင်/ကျဉ်း) တီႈၶွၵ်ႈလူင်ၼၼ်ႉတင်းသဵင်ႈသေ ယၢမ်းလဵဝ် ၵူၼ်းၸိူဝ်းၼၼ်ႉ လႆႈဢွင်ႈတီႈ၊ လႆႈႁပ်ႉပုၼ်ႈၽွၼ်း ႁဵတ်းၵၢၼ်ၼႂ်းဝဵင်းၶိုၼ်းတင်းမူတ်း ၼႆယဝ်ႉ။

မိူဝ်ႈဝၼ်းတီႈ 17/02/2025 ၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇ ၼႂ်းၼႃႈတီႈၵုမ်းၵမ် သိုၵ်းၵဝ်ႈၵၢင်ႉၼၼ်ႉ ႁွင်ႉဢဝ်ၵၢင်ႉၵႄႇ ၼႂ်းၸႄႈဝဵင်းလႃႈသဵဝ်ႈတင်းသဵင်ႈသေ ဢုပ်ႇဢူဝ်းလွင်ႈတေမၵ်းမၼ်ႈ ၵႃႈၸႂ်ႉၸၢႆႇၾႆးၾႃႉ ၼႆယဝ်ႉ။

ၾႆးၾႃႉ ဢၼ်သိုၵ်းၵဝ်ႈၵၢင်ႉ ပိုတ်ႇပၼ်ၵူၼ်းမိူင်း ၼႂ်းၸႄႈဝဵင်းလႃႈသဵဝ်ႈ ၸႂ်ႉတိုဝ်းယူႇယၢမ်းလဵဝ်ၼႆႉ သိုပ်ႇဢဝ်တီႈ ႁူင်းၾႆးၾႃႉ မၢၼ်ႈသၢင်ႈယေႇၵျႃႉ (မန်ဆန်းရေကျ) မႃး။ ယၢမ်းလဵဝ် ၼႂ်းဝဵင်းလႃႈသဵဝ်ႈ ယင်းပႆႇၸႂ်ႉလႆႈၾႆးၾႃႉ ၸွတ်ႇၸေးၵူႈပွၵ်ႉၵူႈယွမ်ႇ တဵမ် 24 ၸူဝ်ႈမူင်း ၼႆယဝ်ႉ။

ပႅၵ်ႉသမ်ႉဝႃႈ ပၢင်တိုၵ်းဢမ်ႇပဵၼ် သဵင်ၵွင်ႈဢမ်ႇတႅၵ်ႇ သိုၵ်းမၢၼ်ႈ ဢမ်ႇဢဝ်ၶိူင်ႈမိၼ် မႃးပွႆႇၶိုၼ်း ၶိူဝ်းၶိူဝ်းယႂ်းယႂ်း ၼႆသေတႃႉ ၾၢႆႇၼိုင်ႈတၢင်းၼိုင်ႈ ယွၼ်ႉမီးၶၢဝ်ႇလိုဝ်းဝႃႈ ၵဵဝ်ႇၵပ်းလူၺ်ႈ ၵၢၼ်သိုၵ်း ၵၢၼ်မိူင်း ဢမ်ႇၼိမ်သဝ်းလႄႈ ၵူၼ်းမိူင်းၸိူဝ်းမိူဝ်းယူႇသဝ်းၶိုၼ်း ၼႂ်းပိုၼ်ႉတီႈတႄႉ ယင်းတိုၵ်ႉ လႆႈၾၢင်ႉယူႇၾၢင်ႉၵိၼ်၊ ဝႆႉသတိယူႇသဝ်းၵႂႃႇ မိူၼ် “သူပ်းၵိၼ်မၢၵ်ႇ ႁူထွမ်ႇၵၢင်ႇ” သေ ဢမ်ႇႁတ်းႁဵတ်း ၼႃႈၵၢၼ်ထၢင်ႇႁၢင်ႈ၊ ဢမ်ႇႁတ်းယူႇၵႂႃႇမႃးပႆ လွတ်ႈလႅဝ်းတႄႉတႄႉ ၼႆယဝ်ႉ။ 

တႅမ်ႈ – ၽူၺ်းၼုမ်ႇ