ၵူၼ်းမိူင်းၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵဵပ်းမၢၵ်ႇမႅင်းၾင်လိၼ် ၵႂႃႇၶၢႆ တႃႇၵႄႈလိတ်ႈပၼ်ႁႃ ၵၢၼ်ႁႃၵိၼ်လဵင်ႉတွင်ႉ ။
တႄႇႁူဝ်ပီ 2025 ၼႆႉမႃး ၵၢၼ်ႁႃၵိၼ်လဵင်ႉတွင်ႉယၢပ်ၽိုတ်ႇလိူဝ်ႁႅင်း ၊ ၼႂ်းၼႃႈလိၼ်ပၢင်တိုၵ်း မိူင်းတႆးပွတ်းႁွင်ႇၼၼ်ႉ မၢၵ်ႇမႅင်းၾင်လိၼ်ပဵၼ်ၽေးၼႆႁူႉၵၼ်ယူႇသေတႃႉ ဢမ်ႇမီးတၢင်းလိူၵ်ႈလႄႈ ၵူၼ်းဝၢၼ်ႈၵႂႃႇႁႃၵဵပ်းမႃးၶၢႆ ပိူဝ်ႈတႃႇလႆႈငိုၼ်းမႃးလဵင်ႉၵၼ် ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ဝၢႆးပဵၼ်ပၢင်တိုၵ်းၼႆႉ ၵူၼ်းဝၢၼ်ႈၶဝ် ဢမ်ႇမီးၵၢၼ်ႁႃၵိၼ်လဵင်ႉတွင်ႉသင်ယဝ်ႉ ၊ လႆႈႁဵတ်းၵၢၼ် ႁႃၸဝ်ႉၵိၼ်ၶမ်ႈၸိူင်ႉၼၼ်ၵူၺ်းယဝ်ႉ ၊ မၢၵ်ႇမႅင်းၾင်လိၼ်ဢၼ်ပႆႇတႅၵ်ႇၸိူဝ်းၼၼ်ႉ ပဵၼ်ၽေးတေႃႇ သၢႆၸႂ်သေတႃႉ ဢမ်ႇၸၢင်ႈႁဵတ်းၸိူင်ႉႁိုဝ် ၵႂႃႇႁႃသေ ၶၢႆပၼ်ၸုမ်းယိပ်းၵွင်ႈၵၢင်ႇ ၊ လႆႈၵႃႈၶၼ်ယႂ်ႇယူႇ”- ဝႃႈၼႆ။
မၢၵ်ႇမႅင်းဢၼ်ပႆႇတႅၵ်ႇၼႆႉ လႆႈၵႃႈၶၼ်တီႈဢေႇသုတ်း 15 သႅၼ်ပျႃး ၊ ယူႇတီႈသႅၼ်းမၢၵ်ႇသေ လႆႈၵႃႈမၼ်း ။ မၢၵ်ႇမႅင်းၸိူဝ်းၼႆႉ ၵႂႃႇၶၢႆလႆႈတီႈ ၸုမ်းယိပ်းၵွင်ႈၵၢင်ႇ သိုၵ်းတဢၢင်းTNLA လႄႈ သိုၵ်း SSPP ၼႆ – ၵူၼ်းပိုၼ်ႉတီႈလၢတ်ႈ ။
ယွၼ်ႉၵူၼ်းမိူင်းႁႃၵဵပ်းမၢၵ်ႇမႅင်းၾင်လိၼ်ၸိူင်ႉၼႆလႄႈ ၵူၼ်းမိူင်းဢၼ်ၺႃးမၢၵ်ႇမႅင်းသေ လူႉတၢႆမၢတ်ႇၸဵပ်းမီးတင်းၼမ် ဝႃႈၼႆ ။
“ၵူၼ်းမိူင်းၶဝ်ႁူႉဝႃႈပဵၼ်ၽေးၵေႃႈ ၶႆႈလႆႈငိုၼ်းၼၼ်ႉၶႃႈၼႃႇ ၊ မၢၵ်ႇမႅင်းၸိူဝ်းၼႆႉ ပေႃးဢမ်ႇသၢင်ႇတေႃႇ ၵႆႉတႅၵ်ႇ ၊ ၵူၼ်းဢၼ်ၵႂႃႇၵဵပ်းသေ မၢၵ်ႇတႅၵ်ႇ လူႉတၢႆ မၢတ်ႇၸဵပ်းၵေႃႈ မီးၼမ်ၼႃႇ ”- ဝႃႈၼႆ ။
မိူၼ်ၼင်ၼႆ တီႈဝဵင်းသႅၼ်ဝီၸိုင်ႈတႆးပွတ်းႁွင်ႇၵေႃႈ ၵူၼ်းမိူင်း ႁႃၵဵပ်းမၢၵ်ႇမႅင်းၾင်လိၼ်သေ ၶၢႆ တႃႇႁႃၵိၼ်လဵင်ႉတွင်ႉ ဝႃႈၼႆ ။
ၼၢင်းယိင်းပိုၼ်ႉတီႈဝဵင်းသႅၼ်ဝီ လၢတ်ႈၽူႈတွႆႇႁွၵ်ႈဝႃႈ-“တီႈသႅၼ်ဝီၵေႃႈ ပေႃးပဵၼ်မၢၵ်ႇမႅင်းဢၼ်ပႆႇတႅၵ်ႇၸိူဝ်းၼၼ်ႉ ၶဝ်သိုဝ်ႉၶိုၼ်း ၊ မၼ်းယူႇတီႈသႅၼ်းမၼ်းသေ ၶဝ်ပၼ်ၵႃႈၶၼ်မၼ်း ၊ ၵူၼ်းႁႃမၢၵ်ႇမႃးၶၢႆၸိူဝ်းၼႆႉ ၵမ်ႈၼမ်ပဵၼ် ၵူၼ်းႁႃၸဝ်ႉၵိၼ်ၶမ်ႈ”- ဝႃႈၼႆ ။
ၼႂ်းဝၼ်းတီႈ 6/2/2025 ယၢမ်းႁူဝ်ၶမ်ႈ ၽူႈၸၢႆးၵေႃႉၼိုင်ႈ ယဵပ်ႇၺႃးမၢၵ်ႇတႅၵ်ႇတိူဝ်ႉသႂ်ႇတီႈ ပွၵ်ႉရူတ်ႉၾႆး (မီးရထားရပ်ကွက်) ႁိမ်းၶၢင်ႈဝတ်ႉမျႃႉသူၺ်ႇၵူႇ (မြရွှေဂူ)၊ တိူဝ်ႉသႂ်ႇ မိုဝ်းပုတ်းၵႂႃႇတင်းသွင်ၶွၼ် တၢႆထင်တီႈ။
တႄႇဢဝ် ၼႂ်းဝၼ်ႈတီႈ 13/10/2024 ၼၼ်ႉမႃး သိုၵ်းတဢၢင်း TNLA ယိုတ်းၵုမ်းလႆႈတပ်ႉသိုၵ်းမၢၼ်ႈ ၼႂ်းဝဵင်းသီႇပေႃႉမႃး။ ဝၢႆးၼၼ်ႉ မၢၵ်ႇမႅင်း ဢၼ်ပႆႇတႅၵ်ႇ ၸိူဝ်းၼၼ်ႉၵေႃႈၵိုတ်း ၶၢင်ႉဝႆႉတင်းၼမ် ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ