ၵူၼ်းဢမ်ႇႁူႉၾၢႆႇ 3 ၵေႃႉယိပ်းၵွင်ႈ ၶဝ်ႈၸူၼ် ႁၢၼ်ႉၶၢႆၶူဝ်းၵုၼ်ႇ တီႈဝၢၼ်ႈလွႆသထူင်ႇ ဢိူင်ႇဝၢၼ်ႈလူင် ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။
မိူဝ်ႈဝႃး ဝၼ်းတီႈ3/3/2025 ယၢမ်းႁူဝ်ၶမ်ႈ 8 မူင်းၵူၼ်းယိပ်းၵွင်ႈ 3 ၵေႃႉ ၶဝ်ႈၸူၼ် ႁၢၼ်ႉၵုၼ်ႇ ၸိုဝ်ႈႁၢၼ်ႉႁွင်ႉၵေးသီး ( ကျေးသီး ကုန်စုံဆိုင် ) တီႈဝၢၼ်ႈလွႆသထူင်ႇတၢင်းၵႂႃႇဝၢၼ်ႈယၢင်းၶၢဝ် ဢဝ်ၵႂႃႇငိုၼ်း 7000 ဝၢတ်ႇလႄႈ ၵႃးၸဝ်ႈႁၢၼ်ႉ ဝႃႈၼႆ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵၢင်ၶမ်ႈ 8 မူင်း တၢင်းဝၢၼ်ႈလွႆသထူင်ႇ တင်းၵႂႃႇဝၢၼ်ႈယၢင်းၶၢဝ် ၼၼ်ႉ ၵူၼ်း 3 ၵေႃႉ ဢဝ်ၵွင်ႈ ဢွၵ်ႇငႃ လွၵ်ႇၸဝ်ႈႁၢၼ်ႉသေဢဝ် ငိုၼ်းၼႂ်းႁၢၼ်ႉၵႂႃႇ 7000 ဝၢတ်ႇလႄႈ ၵႃးၸဝ်ႈႁၢၼ်ႉလမ်းၼိုင်ႈၵႂႃႇ”- ဝႃႈၼႆ ။
ၵူၼ်းၸၢႆး 3 ၵေႃႉ ၼၼ်ႉ ၶီႇၵႃးလမ် ၶဝ်ႈမႃးၼႂ်းႁၢၼ်ႉသေဢဝ်ၵွင်ႈလွၵ်ႈငိူတ်ႈငႃၸဝ်ႈႁၢၼ်ႉယဝ်ႉ ဢဝ်ငိုၼ်းလႄႈၵႃးၵႂႃႇ ဝႃႈၼႆ ။
“ၵူၼ်းလၵ်ႉၵူၼ်းၸူၼ်တီႈဝဵင်းတႃႈၶီႈလဵၵ်းၼႆႉၵႆႉၶဝ်ႈၸူၼ်ၼႂ်းႁၢၼ်ႉၶမ်း ၊ ႁၢၼ်ႉၽူၼ်း ၊ ပေႃးပဵၼ်ပၼ်ႁႃမႃး ၸဝ်ႈၼႃႈတီႈၶဝ် ႁဵတ်းၵႅင်ႈတူင်ႉၼိုင်ၵႂႃႇမႃး။ ၵူၼ်းလၵ်ႉ ၵူၼ်းၸူၼ်ၵေႃႈ ယဵၼ်ၵႂႃႇၵမ်းၼိုင်ႈသေ ၶိုၼ်းမီးမႃးထႅင်ႈ။ ပဵၼ်မႃးၸိူင်ႉၼႆ ႁိုင်ၼႃႇယဝ်ႉ”- ဝႃႈၼႆ ။
ယၢမ်းလဵဝ်တီႈဝဵင်းတႃႈၶီႈလဵၵ်း ၵူၼ်းလၵ်ႉၵူၼ်းၸူၼ် ၼမ် ၊ ရူတ်ႉၶိူင်ႈၵႆႉႁၢႆ ၊ ပေႃးဢွၵ်ႇၽွင်းၵၢင်ၶမ်ႈ ၵၢင်ၶိုၼ်းၵေႃႈလႆႈၾၢင်ႉ ယွၼ်ႉၵူၼ်းလၵ်ႉ ၵူၼ်းၸူၼ် ၼမ်ႁႅင်းၼႆ ၵူၼ်းပိုၼ်ႉတီႈလၢတ်ႈၼင်ၼႆ ။
“ပေႃးၵၢင်ၶမ်ႈ 8-9 မူင်း ဢမ်ႇႁတ်းဢဝ်ရူတ်ႉၶိူင်ႈဢွၵ်ႇ ၊ လႆႈဢဝ်ၵႃးသေၵႂႃႇၵူၺ်းဢေႃႈ လႆႈၾၢင်ႉၼႃႇ ၊ပေႃးဢမ်ႇၾၢင်ႉၵူၺ်းၸိူင်ႉၼၼ်ၵေႃႈ ဢမ်ႇမီးၸဝ်ႈၼႃႈတီႈၵေႃႉလႂ်မႃးဢဝ်ပၼ်ပုၼ်ႈၽွၼ်းပၼ် ၊ တီႈဝဵင်းတႃႈၶီႈလဵၵ်းၼႆႉ ၵႆႉလၵ်ႉ ၵႆႉ ၸူၼ်ၵၼ်ၼႃႇ ”- ဝႃႈၼႆ ။
ဝဵင်းတႃႈၶီႈလဵၵ်းၼႆႉ ၵူၼ်းမိူင်းတၢင်ႇတီႈတၢင်ႇလႅၼ် မႃးယူႇသဝ်းၼမ်လိူင်ႇ မၢင်ၸိူဝ်း ယွၼ်ႉႁႃၵိၼ်လဵင်ႉတွင်ႉယၢပ်ႇလႄႈ ႁဵတ်းမူႇႁဵတ်းၸုမ်း ၸၵ်ႉၶုတ်ႈႁိမ်ၸူၼ်၊ မၢင်ၸိူဝ်း ႁဵတ်းၵၢၼ်လႅၼ်ငိုၼ်းဢွၼ်ႊလၢႆႊ။ လိူဝ်ၼၼ်ႉ ၼႂ်းဝတ်ႉၼႂ်း ၵျွင်းၵေႃႈဢမ်ႇဝႆႉ ၸဝ်ႈငိုၼ်းသႃးၶဝ် ဢွၼ်ပိုတ်ႇပၢင်တေႃႇလွင်း ဢူၼ်ဢၢၼ်မေႃးပၼ်း ႁဵတ်းႁႂ်ႈၵူၼ်းမိူင်းပိုၼ်ႉတီႈ ယၢပ်ႇၽိုတ်ႇလၢႆလွင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ