ပွႆးလိူၼ်သီႇမူၼ်း ဢၼ်တေၸတ်းႁဵတ်း တီႈဝဵင်းလႃႈသဵဝ်ႈ ပီၼႆႉ ၾၢႆႇသိုၵ်းၵဝ်ႈၵၢင်ႉ MNDAA ပၼ်ၶႂၢင်ႉ ပိုတ်ႇပႃးပၢင်တေႃႇလွင်း တႃႇၶၢဝ်းတၢင်း 10 ဝၼ်း ဝႃႈၼႆ။

ပွႆးလိူၼ်သီႇၼႆႉ တေၸတ်းႁဵတ်း ၼႂ်းဝၼ်းတီႈ 07-13/03/2025 တီႈဝတ်ႉမၢၼ်ႈသူႈ (မၢၼ်ႈ) ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ၼႂ်းဝၼ်းတီႈ 4 – 5 ၼႆႉ ၽူႈမီးပုၼ်ႈၽွၼ်းၶဝ် တေၸတ်းၵၢၼ် ပၼ်ဢွင်ႈတီႈပိုတ်ႇ ႁၢၼ်ႉၶၢႆၶူဝ်းၵုၼ်ႇလႄႈ ဢွင်ႈတီႈပိုတ်ႇပၢင်တေႃႇလွင်း ၸိူဝ်းၼႆႉ။  

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ဢၼ်တေၸတ်းႁဵတ်း ပွႆးၾိင်ႈထုင်း ၸိူင်ႉၼႆတႄႉ ႁၼ်လီၸွမ်းယူႇ၊ ပဵၼ်လွင်ႈထိင်းသိမ်း ၾိင်းငႄႈၾိင်ႈထုင်း။ ၵူၺ်းၵႃႈ ဢမ်ႇထုၵ်ႇလီမီးပႃးပၢင်တေႃႇပၢင်လွင်း၊ လိူဝ်သေယႃႉ ၾိင်ႈငႄႈၾိင်ႈထုင်းယဝ်ႉ တေႁဵတ်းႁႂ်ႈၾိင်ႈယၢမ်ႈၵူၼ်းမိူင်းႁဝ်း လူႉပႃးၵွၼ်ႇဢေႃႈ”- ဝႃႈၼႆ။

ပူၼ်ႉမႃး မိူဝ်ႈႁၢင်လိူၼ်ၾႅပ်ႊပိဝ်ႊရီႊ ပီ 2025 ၼႆႉ ၽွင်းပီမႂ်ႇၶႄႇၼၼ်ႉ မီးပၢင်တေႃႇပၢင်လွင်း ၼႂ်းသူၼ်မွၵ်ႇ ဝဵင်းလႃႈသဵဝ်ႈ။ ပၢင်တေႃႇလွင်းၼၼ်ႉ ပိုတ်ႇမႃးၶၢဝ်းတၢင်းၸမ်လိူၼ် တိုၵ်ႉပိၵ်ႉဢိုတ်းၵႂႃႇ မိူဝ်ႈလိူၼ် ၾႅပ်ႊပိဝ်ႊရီႊ သဵင်ႈၼႆႉၵူၺ်း။  

ဝၢႆးသိုၵ်းၵဝ်ႈၵၢင်ႉ MNDAA ၵုမ်းထိင်းလႆႈ ၼႂ်းဝဵင်းလႃႈသဵဝ်ႈၼႆႉမႃး ပၢင်တေႃႇလွင်းၸိူဝ်းၼႆႉ လိူင်ႇၼမ်မႃး ႁႅင်း။ ယွၼ်ႉပၢင်တေႃႇပၢင်လွင်းၼမ်သေ ၽွၼ်းယွၼ်ႈဢၼ်မႃးၸွမ်းတင်းလင်တႄႉ – ပဵၼ်ၽူႈလၵ်ႉၸၵ်ႉၶုတ်ႈ ၵူၼ်းႁၢႆႉၵူၼ်းၸူၼ်ၸိူဝ်းၼႆႉ လိူင်ႇၼမ်မႃး။ လွင်ႈၼႆႉ ႁဵတ်းႁႂ်ႈၵူၼ်းမိူင်း ဢွၼ်ၵၼ်မႆႈၸႂ် လွင်ႈႁူမ်ႇလူမ်ႈသၢႆၸႂ် ၶူဝ်းၶွင်ႁိူၼ်းယေး ၸိူဝ်းၼႆႉ။