ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတႃႈၵုင်ႈ ဢွၼ်ႁူဝ်ၸတ်းႁဵတ်း ပၢင်သွၼ်လိၵ်ႈတႆးၶၢဝ်းမႆႈ တီႈၵျွင်းတႆးၵဝ်ႈလၵ်း ဝဵင်းတႃႈၵုင်ႈ တႃႇၶၢဝ်းတၢင်းႁိုင် ၼိုင်ႈလိူၼ်ပၢႆ ၼႆယဝ်ႉ။

ပၢင်သွၼ်လိၵ်ႈတႆးၼႆႉ တႄႇပိုတ်ႇဝၼ်းတီႈ 01/03/2025 တေႃႇ 05/04/2025 သေ ၼိုင်ႈဝူင်ႈၼႆႉ တေပိုတ်ႇပၼ်သွင်ဝၼ်း။ ပဵၼ်ဝၼ်းသဝ်လႄႈ ဝၼ်းဢႃးတိတ်ႉ ၼႆယဝ်ႉ။

ၼႂ်းဝၼ်းပၢင်သွၼ်ၼၼ်ႉ ၶၢဝ်းယၢမ်းဝၢႆးဝၼ်း 1 မူင်း တေႃႇထိုင် 3 မူင်း တေသွၼ်ပၼ်လိၵ်ႈတႆး၊ ၶၢဝ်း ယၢမ်းဝၢႆးဝၼ်း 3 မူင်းတေႃႇထိုင် 4 မူင်းသမ်ႉ တေလႅၵ်ႈလၢႆႈပိုၼ်ႉႁူႉၵၼ်လႄႈ ၼႄပၼ်ပိုၼ်ႉထၢၼ်တၢင်း ၵႃႈတႆး ဢိၵ်ႇပႃး လွင်ႈၶူဝ်းၼုင်ႈတၢင်းဝႆ ပႃးၸဵမ်လၢႆးၶဵၼ်းႁူဝ်တႆး ၸၢႆး/ယိင်း ၸဵမ်ၸိူဝ်းၼႆႉ ဝႃႈၼႆ။

ၸၢႆးၶိူဝ်းလႅင်း ၽူႈၼမ်းၼႂ်း ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတႃႈၵုင်ႈ လၢတ်ႈၼႄၽူႈတွႆႇႁွၵ်ႈဝႃႈ -“ယိူင်းဢၢၼ်း ဢၼ်လႆႈသႂ်ႇပႃး ၶၵ်ႉၵၢၼ်သွၼ်ပၼ် လၢႆးၶဵၼ်းႁူဝ်တႆးလႄႈ ၶူဝ်းၼုင်ႈတၢင်းဝႆ ပေႃးမီးပွႆး ၵိၼ်ပွႆးလူႇ တႆးႁဝ်းၵေႃႈ ႁႂ်ႈၶဝ်လႆႈမေႃၶဵၼ်းႁင်းၵူၺ်းသေ ပေႃးမီးပွႆးတႆးႁဝ်းၵေႃႈ မီးၵွင်မွင်းသိူင်း ၽွမ်ႉ ၵၼ် ႁႂ်ႈမေႃၵႃႈပၼ်ႇၵွင်ၵႂႃႇၼၼ်ႉၶႃႈဢေႃႈ” – ဝႃႈၼႆ။

ပၢင်သွၼ်လိၵ်ႈတႆးၶၢဝ်းမႆႈ တီႈၵျွင်းတႆးၵဝ်ႈလၵ်းၼႆႉ ၸတ်းႁဵတ်းမႃး ပီယၢဝ်းၶၢဝ်းႁိုင်။ လႆႈဢိုတ်းၵႂႃႇၶိုၼ်း ဝၢႆးလင် တၢင်းပဵၼ်ၶူတ်ႊဝိတ်ႉ 19 ၼၼ်ႉသေ ၸင်ႇလႆႈၶိုၼ်းတႄႇပိုတ်ႇမႃး ၼႂ်းပီ 2025 ၼႆႉ ဝႃႈၼႆ။

ၸၢႆးၶိူဝ်းလႅင်း သိုပ်ႇလၢတ်ႈၼႄဝႃႈ – “ႁဝ်းၶႃႈ လႆႈလိုဝ်ႈ ပၢင်သွၼ်လိၵ်ႈတႆးၶၢဝ်းမႆႈမႃး မီးႁႃႈပီယဝ်ႉ။ ၼႂ်းပၢင်သွၼ် လိၵ်ႈတႆးႁဝ်းပီၼႆႉ မီးၵူၼ်းမႃးၶိုၼ်ႈႁွတ်ႈ သၢမ်ပၢၼ်ၸဵတ်းသႅၼ်း။ မိူဝ်ႈတႄႇဝူင်ႈၼႆႉတႄႉ ႁဝ်း သွၼ်ႁူမ်ႈၵၼ်မူတ်းဢေႃႈ။ ပႂ်ႉတူၺ်းၸိူဝ်းဢၼ် လမ်းၶိုတ်းလိၵ်ႈၼၼ်ႉသေ ၸင်ႇၶိုၼ်းၸႅၵ်ႇသွၼ်ပၼ် Class A ၊ Class B ၊ Class C” – ဝႃႈၼႆ။

လႆႈႁူႉဝႃႈ ၼႂ်းပၢင်သွၼ်ၼၼ်ႉ မီးပီႈၼွင်ႉၸၢဝ်းၶိူဝ်းတႆး ဢၼ်ယူႇသဝ်းၼႂ်းဝဵင်းတႃႈၵုင်ႈလႄႈ တႆးလုၵ်ႈ ၶိုင်ႈ တႆးၶမ်းတီႈ ၶဝ်ၵေႃႈ မႃးႁဵၼ်းသွၼ်ဢဝ်ၸွမ်း ၼႆယဝ်ႉ။

တႅမ်ႈ – ၽူၺ်းၼုမ်ႇ