မိူဝ်ႈၼႆႉ ဝၼ်းတီႈ 26 လိူၼ်မၢတ်ႉၶျ် ယၢမ်းၵၢင်ၼႂ် မွၵ်ႈ 10 မူင်းပၢႆ ၽူႈႁွင်ႉၵႂၢမ်း ဢူးပတ်ႉထရိတ်ႉ (ႁိုဝ်) တိၼ်ႇထုၼ်း ၵေႃႉၶၢတ်ႈၵႃးပိူၼ်ႈသေၵိၼ်ၸၢင်ႈႁေႃႈရူတ်ႉ ၼႂ်းဝဵင်းလူင်တႃႈၵုင်ႈ ၵႂႃႇၶဝ်ႈထႅဝ်ပႂ်ႉသႂ်ႇၼမ်ႉမၼ်းတီႈႁၢၼ်ႉၶၢႆၼမ်ႉမၼ်း ပဵၼ်လူမ်းတၢႆၶမ်ရူတ်ႉ ယွၼ်ႉၾိင်ႈၾႃႉလႅတ်ႇမႆႈႁႅင်းဢႃးလႃးဝႃႈၼႆ။

သိုဝ်ႇၶၢဝ်ႇမၢၼ်ႈတႅမ်ႈတၢင်ႇဝႆႉဝႃႈ မိူဝ်ႈၼႆႉယွၼ်ႉဝႃႈလႅတ်ႇမႆႈလႄႈ ႁႅင်းလူမ်းမႆႈ လိူတ်ႇမႆႈႁႅင်းဢႃးလႃး ႁဵတ်းႁႂ်ႈ သဵၼ်ႈလိူတ်ႈၼႂ်းဢွၵ်းဢေႃမၼ်းၵိုင်ႉၵၢင်ႉၶၢတ်ႇ Heat Stroke သေ ထိုင်တီႈလူႉတၢႆထင်တီႈ ဝႃႈၼႆ။

မၼ်းၸၢႆးၼႆႉ ဢဝ်ရူတ်ႉသေၵႂႃႇၶဝ်ႈထႅဝ်ပႂ်ႉသႂ်ႇၼမ်ႉမၼ်းတီႈႁၢၼ်ႉၶၢႆၼမ်ႉမၼ်းဢၼ်မီး တီႈႁူဝ်တၢင်းမႁႃၸီႇ သႃႇသၼႃႉယဵၵ်ႉတႃႇလၢၼ်း (မဟာစည်သာသနာ့ရိပ်သာလမ်းထိပ်) ၼိူဝ်သဵၼ်ႈတၢင်းလူင်ၵပႃႇဢေး ဝဵင်းတႃႈၵုင်ႈ ၼႆယဝ်ႉ။

ၽူႈမီးပုၼ်ႈၽွၼ်း ၼႂ်းၸုမ်းၸွႆႈထႅမ်ၵူၼ်း “မႅတ်ႉတႃႇဢလိၼ်း” လၢတ်ႈၼႄဝႃႈ “ၵႃးဢၼ်မၼ်းႁေႃႈၵႂႃႇၼၼ်ႉ ပဵၼ်ၵႃးဢၼ်ၸႂ်ႉ ၵႅတ်ႉသ်။ ပဵၼ်ၵႂႃႇ မိူဝ်ႈၽွင်းမၼ်းၵႂႃႇပႂ်ႉၶဝ်ႈထႅဝ်သႂ်ႇၼမ်ႉမၼ်း တီႈႁၢၼ်ႉၶၢႆၼမ်ႉမၼ်း Max ထၢင်ႇဝႃႈမၼ်းပဵၼ်လူမ်းၵူၺ်းၼႆႁႄ ႁွင်ႉၵႂႃႇႁူင်းယႃ ၽိူဝ်ႇထိုင်ႁူင်းယႃ မေႃယႃဝႃႈ မၼ်းသဵင်ႈၸဵမ်မိူဝ်ႈၼႂ်းရူတ်ႉၼၼ်ႉဝႆႉယဝ်ႉ” ဝႃႈၼႆ။

ဢူးပတ်ႉထရိတ်ႉ (ႁိုဝ်) တိၼ်ႇထုၼ်းၼႆႉ ဢႃႇယု 60 ပီပၢႆ ပဵၼ်ၽူႈႁွင်ႉၵႂၢမ်းၵေႃႉၼိုင်ႈ ၼႂ်းၸုမ်းပၢႆးမွၼ်းမိူင်းမၢၼ်ႈ။

ယၢမ်းလဵဝ် ၽူႈမီးပုၼ်ႈၽွၼ်းၶဝ် လႆႈဢဝ်တူဝ်တၢႆမၼ်းၸၢႆး ၵႂႃႇဝႆႉတီႈႁူင်းယႃလူင် ဝဵင်းတႃႈၵုင်ႈ ဝႃႈၼႆ။

မိူၼ်ၼႆၼင်ႇၵဝ်ႇ မိူဝ်ႈပူၼ်ႉမႃး ဝၼ်းတီႈ 23 လိူၼ်မၢတ်ႉၶျ်ၼႆႉၵေႃႈ ၵူၼ်းၸၢႆးၵေႃႉၼိုင်ႈ ဢၼ်ၵိၼ်ၸၢင်ႈ ႁေႃႈၵႃး ၼႂ်းဝဵင်းၶျွင်းသူင်ႇ ၸႄႈမိူင်းမွၼ်း ၵႂႃႇပႂ်ႉၶဝ်ႈထႅဝ် သႂ်ႇၼမ်ႉမၼ်းရူတ်ႉသေ မႆႈႁႅင်းပူၼ်ႉလိူဝ်လႄႈ ၽွင်းပွၵ်ႈၽႅဝ်ႁိူၼ်းယဝ်ႉၵေႃႈ ၵိုင်ႉၵၢင်ႉလူႉသဵင်ႈၵႂႃႇ ၼႆယဝ်ႉ။

ၼႂ်းၶၢဝ်းတၢင်း လိူၼ်မၢတ်ႉၶျ် လႄႈ လိူၼ်ဢေႊပရႄႊၼႆႉ တၢင်ႉႁႅင်းလူမ်းမႆႈ ၵိုင်ႉၵၢင်ႉၶိုၼ်ႈမႃးႁႅင်းသေ ၸၢင်ႈတုမ်ႉတိူဝ်ႉပၢႆးယူႇလီ ၵူၼ်းမိူင်းလႄႈ ႁႂ်ႈဢွၼ်ၵၼ်ၾၢင်ႉယူႇၾၢင်ႉ ၵိၼ်ၼႆ ႁွင်ႈၵၢၼ်ၾၢႆႇပၢႆးယူႇလီၶဝ် ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ် ၼင်ႇၼႆ။