ၵူၼ်းမိူင်းဝဵင်းတႃႈၵုင်ႈ တၢင်ႇလိၵ်ႈထိုင်တီႈၽူႈၵွၼ်းပွၵ်ႉယွမ်ႇ ႁႂ်ႈယွၼ်းယိုတ်ႈၶၢဝ်းယၢမ်း တႃႇၾိုၵ်းၵၢၼ်သိုၵ်း ပၼ် တီႈသိုၵ်းမၢၼ်ႈ ၾၢႆႇၽွင်းငမ်း ယွၼ်းငိုၼ်း 50 သႅၼ်ပျႃး ဝႃႈၼႆ။

ၽွင်းႁၢင်လိူၼ်ၵျႅၼ်ႊၼိဝ်ႊရီႊၼၼ်ႉ ၵူၼ်းၼုမ်ႇၸႄႈဝဵင်းမယၢၼ်းၵူင်း ၵေႃႉၼိုင်ႈ ဢႃယု 29 ပီ ဢၢၼ်း တေၵႂႃႇႁဵတ်း ၵၢၼ်မိူင်းၵျပၼ်ႊ၊ ၵူၼ်းၼုမ်ႇ ၸႄႈဝဵင်းၻၵူင်ႇဝဵင်းမႂ်ႇ ၵေႃႉၼိုင်ႈ ဢႃယု 21 ပီ ဢၢၼ်းတေ ၵႂႃႇၶိုၼ်ႈႁူင်းႁဵၼ်း တီႈမိူင်းထႆး ၸိူဝ်းၶဝ်ၵႂႃႇယွၼ်းတီႈၾၢႆႇၽွင်းငမ်းၸႄႈဝဵင်း၊ ၾၢႆႇၽွင်းငမ်းလၢတ်ႈဝႃႈ သင်ၸိူဝ်ႉၶႂ်ႈလူတ်းယွၼ်ႇၶၢႆႉယိုတ်ႈၶၢဝ်းယၢမ်း တႃႇၾိုၵ်းၵၢၼ်သိုၵ်းၸိုင် တၵ်းတေလႆႈပၼ်ငိုၼ်း 50 သႅၼ်ပျႃး – ဝႃႈၼႆ။

ပေႃႈမႄႈလုၵ်ႈႁဵၼ်း လၢတ်ႈတီႈသိုဝ်ႇၶၢဝ်ႇမၢၼ်ႈတႃႈၵုင်ႈဝႃႈ – “တေလႆႈပၼ်ပႃး ဝႂ်ၵမ်ႉတီႈၵူၼ်းလူင်ပွၵ်ႉ၊ ၽိုၼ်မိူၼ်မၢႆႁၢပ်ႇၵၢၼ်သိုၵ်း ဢၼ်ၾၢႆႇတပ်ႉသိုၵ်းသူင်ႇမႃးလႄႈ တႃႇလုမ်းၽွင်းငမ်းၸႄႈဝဵင်း 30 သႅၼ်ပျႃး၊ တႃႇလုမ်းၵွၼ်းပွၵ်ႉ 20 သႅၼ်ပျႃး တင်းမူတ်း တေလႆႈပၼ် 50 သႅၼ်ပျႃး။ လိူဝ်ၼၼ်ႉ တေလႆႈပၼ်ပႃး လိၵ်ႈဢၼ်တူဝ်ပေႃႈမႄႈလုၵ်ႈ ဢွၼ်ႇတႅမ်ႈဝႆႉ တႃႇယွၼ်းယိုတ်ႈၶၢဝ်းယၢမ်းႁၢပ်ႇၵၢၼ်သိုၵ်း၊ လိၵ်ႈႁပ်ႉပၢၵ်ႇပေႃႈမႄႈ၊ ၽိုၼ်မိူၼ်သဵၼ်ႈမၢႆႁူဝ်ႁိူၼ်း၊ ၽိုၼ်မိူၼ်မၢႆၾၢင် ၸိူဝ်းၼႆႉ – ၼႆဝႃႇ”- ဝႃႈၼႆ။

ၵူၼ်းၼႂ်းၸႄႈဝဵင်းၻၵူင်ႇဝဵင်းမႂ်ႇ ၵေႃႉၼိုင်ႈတႄႉလၢတ်ႈဝႃႈ – ၵူၼ်းၵၢင်/ ၼၢႆးၼႃႈ (ပွႆးၸႃး) ၵွင်ႉပၼ်တၢင်း လုမ်း ၵွၼ်းၸႄႈဝဵင်းသေ ယွၼ်းငိုၼ်း 60 သႅၼ်ပျႃး။ ၾၢႆႇလုမ်းၵွၼ်းၸႄႈဝဵင်း တေၶိုင်ပၼ်တင်းမူတ်း။ တူဝ်ၵူၼ်းၼုမ်ႇလႄႈ ပေႃႈမႄႈ ဢမ်ႇတၢပ်ႈလူဝ်ႇၸွမ်း – ပေႃးပၼ်ငိုၼ်း 60 သႅၼ်ပျႃးၵေႃႈ လႆႈဝႂ်တီႈလုမ်း ၵွၼ်းၸႄႈဝဵင်းမႃးၵမ်းလဵဝ် – ဝႃႈၼႆ။

ဢိင်ၼိူဝ် ၶေႃႈပိုၼ်ၽၢဝ်ႇသိုၵ်းမၢၼ်ႈ ဢၼ်ဝႃႈၵူၼ်းၼုမ်ႇ ဢႃယု 18 ထိုင် 35 ပီ တေလႆႈႁၢပ်ႇၵၢၼ်သိုၵ်း ၵူႈၵေႃႉၼႆ ၼၼ်ႉသေ ၵူၼ်းၼုမ်ႇၸဵမ်ယိင်းလႄႈ ၸၢႆး ၼႂ်းမိူင်းႁူမ်ႈတုမ် ဢွၼ်ၵၼ်ဢွၵ်ႇပၢႆႈၵႂႃႇယူႇၼွၵ်ႈမိူင်းလႄႈ မိူင်းႁိမ်းႁွမ်း။

ယၢမ်းလဵဝ် သိုၵ်းမၢၼ်ႈ ပိုၼ်ၽၢဝ်ႇ သင်ႇႁၢမ်ႈၵူၼ်းၼုမ်ႇ ၵႂႃႇႁဵတ်းၵၢၼ်ၼွၵ်ႈမိူင်း ၵူၺ်းဢမ်ႇၵႃး ၸိူဝ်းတေ ၵႂႃႇဢႅဝ်ႇယဵမ်ႈၵေႃႈ ထုၵ်ႇသိုၵ်းမၢၼ်ႈ ၵူတ်ႇထတ်းထဵတ်ႈထၢမ် ႁၢဝ်ႈႁႅင်း။

ၵူၺ်းၵႃႈ ပေႃးမီးလွင်ႈတၢင်းယၢပ်ႇၽိုတ်ႇတႄႉတႄႉၸိုင် သိုၵ်းမၢၼ်ႈဝႃႈ – ယွၼ်းႁႂ်ႈပွႆႇဝၢင်းပၼ် ဢမ်ႇၼၼ် လူတ်းယွၼ်ႇပၼ်လႆႈယူႇ။ ၵူၺ်းၵႃႈ လုမ်းၵွၼ်းၸႄႈဝဵင်း တၵ်းတေလႆႈၵူတ်ႇထတ်း ၶဵင်ႈၶႅင်ႁၢဝ်ႈႁႅင်း ဝႃႈၼႆပႃး။

ၵူၼ်းၸိူဝ်း ဢၼ်တေယွၼ်းလူတ်းယွၼ်ႇလႆႈၼႆႉတႄႉ တေပဵၼ်ၵူၼ်းၸိူဝ်းပၢႆးယူႇလီဢမ်ႇၶႅမ်ႉ (တေလႆႈ ဢဝ်ဝႂ်ၵမ်ႉထႅမ် တီႈၾၢႆႇပၢႆးယူႇလီ တပ်ႉသိုၵ်းဢွၵ်ႇလိၵ်ႈၵမ်ႉထႅမ်ဝႆႉ) ၊ ၶႃႈႁၢပ်ႇၵၢၼ်ၶုၼ်၊ လုၵ်ႈႁဵၼ်း၊ ၵူၼ်းႁဵတ်းၵၢၼ် ႁႃလဵင်ႉပေႃႈမႄႈထဝ်ႈၵႄႇ၊ ၵူၼ်းတိုၵ်ႉယူတ်းယႃတူဝ် တႃႇတတ်းယိၼ်ႉယႃႈမဝ်းၵမ်လႄႈ ၵူၼ်းၸိူဝ်းတိုၵ်ႉတူၵ်းၶွၵ်ႈၶင်ဝႆႉၸိူဝ်းၼႆႉ – ဝႃႈၼႆ။

ၾၢႆႇ ၼိုင်ႈ ၵူၼ်းၸိူဝ်းလႆႈႁပ်ႉလိၵ်ႈသၢင်ႉ သင်ႇမႃးတႃႇႁၢပ်ႇၵၢၼ်သိုၵ်းၼၼ်ႉ – ၽွင်းတိုၵ်ႉပႂ်ႉၶၢဝ်းယၢမ်း တႃႇလၢႆးငၢၼ်းတူဝ် တႃႇႁၢပ်ႇၵၢၼ်သိုၵ်းၼၼ်ႉ သင်ဝႃႈ ပေႃႈမႄႈ/ လုၵ်ႈလၢင်း/ ၼၢင်းမေး – လူႉတၢႆ၊ မၢတ်ႇၸဵပ်းႁၢဝ်ႈႁႅင်း ၶႅၼ် ၶႃပုတ်း ဢမ်ႇၼၼ် ၺႃးတီႉၺွပ်း ယွၼ်ႉၽိုတ်းမၢႆမီႈၸိုင်ႈမိူင်း/ ထုၵ်ႇဢဝ်လိူင်ႈၸွႆး တြႃး၊ ဢမ်ႇၼၼ် တိုၵ်ႉ ႁဵၼ်းဢဝ်လိၵ်ႈလၢႆးပၢႆးပၺ်ႇၺႃႇ တႃႇပူၵ်းပွင်ဝၢၼ်ႈမိူင်း၊ ၵူၼ်းၸိူဝ်း မီးလွင်ႈတၢင်း လမ်ႇလွင်ႈ ဢမ်ႇယိုတ်ႈဢမ်ႇၶၢႆႉဢမ်ႇလႆႈ ၼၼ်ႉတႄႉ ႁႂ်ႈယွၼ်းမႃးတႃႇယိုတ်ႈၶၢဝ်းယၢမ်းလႆႈယူႇ ဝႃႈၼႆဝႆႉ။

ၵူၺ်းၵႃႈ ပေႃးယွၼ်းယိုတ်ႈၶၢႆႉၶၢဝ်းယၢမ်းသမ်ႉ ၾၢႆႇၽွင်းငမ်း ယွၼ်းငိုၼ်းၼပ်ႉႁူဝ်သိပ်းသႅၼ် ၸိူင်ႉၼႆလႄႈ တေႃႇထိုင်ယၢမ်းလဵဝ် ပႆႇမီးၽႂ်ယွၼ်းမႃးပဵၼ်တၢင်းၵၢၼ်။

တီႈမိူင်းတႆးတႄႉ ဝၼ်းတီႈ 04/02/2025 ယၢမ်းၵၢင်ၼႂ် 7 မူင်း ၵူၼ်းၼုမ်ႇၸၢႆး ၵေႃႉၼိုင်ႈ ဢႃယု 19 ပီ ယူႇဝဵင်းသူၺ်ႇ ၺွင်ႇ ဢၼ်ပႃးသဵၼ်ႈၸိုဝ်ႈ တႃႇႁၢပ်ႇၵၢၼ်သိုၵ်းၼၼ်ႉ ၽႅၼ်ၶေႃးတၢႆ တႂ်ႈတူၼ်ႈမႆႉၺွင်ႇ ႁိမ်းႁူင်းၸၢၵ်ႈသလီႇၽႃးတူင်း ဢၼ်မီးႁိမ်းႁူင်းႁေႃၶႃႈႁၢပ်ႇၵၢၼ်ၶုၼ် တီႈၶဝ်ယူႇသဝ်းဝႆႉၼၼ်ႉ ဝႃႈၼႆ။