တွၼ်ႈတႃႇ ပၢင်သွၼ်လိၵ်ႈလၢႆးတႆး ၶၢဝ်းမႆႈၼႆသေ တီႈဝဵင်းလၢႆးၶႃႈ ၸတ်းႁဵတ်းပၢင်ၾိုၵ်းၽွၼ်ႉ ၶူးသွၼ်/ မေႃသွၼ် ၾိင်ႈငႄႈပုတ်ႉထလႄႈ လိၵ်ႈလၢႆးတႆး ပွၵ်ႈၵမ်း 10 ပီၼႆႉ မီးလုၵ်ႈႁဵၼ်းမႃးၶိုၼ်ႈပၢင်ၾိုၵ်းၽွၼ်ႉ 150 ပၢႆ။
တႄႇဢဝ် ဝၼ်းတီႈ 02-06/03/2025 (လိူၼ်သီႇမႂ်ႇ 4 ၶမ်ႈတေႃႇထိုင် လိူၼ်သီႇမႂ်ႇ 8 ၶမ်ႈ) ၶၢဝ်းတၢင်း 5 ဝၼ်း ယူႇတီႈ ၸုမ်းသင်ႇၶၸဝ်ႈ ဢွၼ်ႁူဝ်သေ ပိုတ်ႇပၢင်ၾိုၵ်းၽွၼ်ႉၾိင်ႈငႄႈပုတ်ႉထလႄႈ လိၵ်ႈလၢႆးတႆး ၶၢဝ်းမႆႈ တီႈႁူင်းႁဵၼ်းပူၵ်းပွင်ၼမ်ႉၵတ်းၵူၼ်းၼုမ်ႇ CBY ဝဵင်းလၢႆးၶႃႈ ၸိုင်ႈတႆးပွတ်းၸၢၼ်း ၼႆယဝ်ႉ။
ၸဝ်ႈၶူး ၵေႃးသၼ်ႇလ ၽူႈမၢႆၾိင်ႈငႄႈပုတ်ႉထလႄႈ လိၵ်ႈလၢႆးတႆး လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ လၵ်းသုတ်ႇဢၼ်ပူင်သွၼ်ပၼ်ၼႆႉ ပဵၼ်လၵ်းသုတ်ႇမႂ်ႇ။ ဢၼ်လီၸႂ်လဵၵ်ႉတႄႉ ပီၼႆႉ လုၵ်ႈႁဵၼ်းယွမ်း ၼမ် ယွၼ်ႉဝႃႈဝၢၼ်ႈၼွၵ်ႈၼႃးပၢင်ႇ ၵမ်ႈၼမ် ဢွၼ်ၵၼ်ပၢႆႈ ဝၢၼ်ႈၸမ်ႁၢမ်း ၵူႈပီလုၵ်ႈႁဵၼ်းႁဝ်းမီး 200 ပၢႆ မၢင်ပီမီးထိုင် 400 ၵေႃႉ”- ဝႃႈၼႆ။
ပၢင်ၾိုၵ်းၽွၼ်ႉ ၶူးသွၼ်/ မေႃသွၼ် တူင်ႇဝဵင်းလၢႆးၶႃႈ ပွၵ်ႈၵမ်း 10 ၼႆႉ မီးၶူးပူင်သွၼ်ပၼ် 10 တူၼ် လုၵ်ႈႁဵၼ်းၶဝ်ႈႁူမ်ႈပၢင်ၾိုၵ်းၽွၼ်ႉ မီး 150 ပၢႆ ၼႂ်းၼၼ်ႉ တေမီးလုၵ်ႈႁဵၼ်းၸဝ်ႈသၢင်ႇ/ ၸဝ်ႈၶၢဝ်လႄႈ ၸၢႆး/ယိင်း ၸဵမ်ၸိူဝ်းၼႆႉ။
မိူဝ်ႈပီ 2024 ၼၼ်ႉ ပၢင်သွၼ်ၾိင်ႈငႄႈပုတ်ႉထလႄႈ လိၵ်ႈလၢႆးတႆး ၶၢဝ်းမႆႈ တီႈတူင်ႇဝဵင်းလၢႆးၶႃႈၼႆႉ မီး လုၵ်ႈႁဵၼ်း တင်းမူတ်း 3,790 ပၢႆ ၊ ပၢင်သွၼ်မီး 73 ပၢင်လႄႈ ၶူးသွၼ်/ မေႃသွၼ်မီး 220 တူၼ်/ ၵေႃႉ ၼႆ ယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ