မိူဝ်ႈၼႆႉ ဝၼ်းတီႈ 03/03/2025 ယၢမ်းၵၢင်ၼႂ် 10 မူင်း သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ ၼိုင်ႈလုၵ်ႈ ၼႂ်းၵႄႈတပ်ႉၵွင် 501- 502 (၂ မိုင်ကုန်းရပ်ကွက်) ၼႃႈတီႈတပ်ႉသိုၵ်းပူတ်းပွႆႇၸိူဝ်ႉၸၢတ်ႈတ ဢၢင်း TNLA ၵုမ်းၵမ်ဝႆႉ ၼႂ်းၸႄႈဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇ။

လႆႈႁူႉဝႃႈ သိုၵ်းမၢၼ်ႈ မႃးပွႆႇမၢၵ်ႈပွၵ်ႈၼႆႉ တုမ်ႉတိူဝ်ႉႁူင်းသဝ်း ဢၼ်မီးၼႂ်းၵႄႈၵၢင်တပ်ႉၵွင် 501 တင်း 502 ၼၼ်ႉ လႆႈလူႉၵွႆၵႂႃႇသေတႃႉ လွင်ႈတိူဝ်ႉမၢတ်ႇၺႃးၵူၼ်းမိူင်းတႄႉ ဢမ်ႇမီး ဝႃႈၼႆ။

ၵဵဝ်ႇလူၺ်ႈ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်း ၵုမ်းၵမ်ဝႆႉၼၼ်ႉ လႆႈႁူႉဝႃႈ ၶၢဝ်းတၢင်းၼိုင်ႈလိူၼ်ၵူၺ်း ၵူၼ်းမိူင်းလူႉတၢႆ 13 ၵေႃႉ မၢတ်ႇၸဵပ်း 36 ၵေႃႉ ၼႆယဝ်ႉ။

ဝၢႆးလင် ၽႅၼ်ယၼ်ႇသိုၵ်း 1027 ၼႆႉ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း ၵုမ်းၵမ်လႆႈဝႆႉ မိူင်းၵုတ်ႈ၊ မိူင်းမိတ်ႈ၊ သီႇပေႃႉ၊ ၵျွၵ်ႉမႄး၊ ၵူတ်ႉၶၢႆ၊ ၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉၶမ်း ၸဵမ်ၸိူဝ်းၼႆႉ။

တႅမ်ႈ – မူၺ်ၶမ်း