သိုၵ်းၵဝ်ႈၵၢင်ႉ ပိုၼ်ၽၢဝ်ႇ ႁႂ်ႈၸဝ်ႈၵုၼ်ႇၸိူဝ်းႁဵတ်းၵၢၼ်ၵႃႉၶၢႆ ၼႂ်းဝဵင်းဢၼ်ၶဝ်ၵုမ်းၵမ်ဝႆႉၼၼ်ႉ ႁႂ်ႈတေႃႇဢႃယု ၵႃႈၶၢတ်ႈႁွင်ႈ ဝႃႈၼႆ။

ဝၼ်းတီႈ 27/02/2025 ၼၼ်ႉ သိုၵ်းၵဝ်ႈၵၢင်ႉ MNDAA တႄႇပိုၼ်ၽၢဝ်ႇ ၵဵပ်းၶွၼ်ႇၵႃႈၶၢတ်ႈႁွင်ႈ ႁၢၼ်ႉၶၢႆ ၵုၼ်ႇၵူႈၸိူဝ်းၸိူဝ်း၊ ႁူင်းႁႅမ်းဢိၵ်ႇပႃး ႁၢၼ်ႉၶႃႇရႃႇဢူဝ်ႇၶေႇ KTV ၸဵမ်ၸိူဝ်းၼႆႉ ၼႂ်းၸႄႈဝဵင်း ၸိူဝ်းၵုမ်းၵမ်ဝႆႉ ဝၢႆးလင် ၽႅၼ်ယၼ်ႇသိုၵ်း 1027 ၸိုင်ႈတႆးပွတ်းႁွင်ႇ ၼႆယဝ်ႉ။

ၸဝ်ႈၵုၼ်ႇၵႃႉၶၢႆ ၸိူဝ်းႁဵတ်းၵၢၼ်ၵႃႉၶၢႆ ၼႂ်းမိူင်းတႆးပွတ်းႁွင်ႇ ၼႃႈတီႈၵုမ်းၵမ် သိုၵ်းၵဝ်ႈၵၢင်ႉၼၼ်ႉ ပေႃး ထိုင် 01/06/2025 တေလႆႈၶိုၼ်း တႄႇပၼ်ၵႃႈၶၢတ်ႈဢွင်ႈတီႈႁၢၼ်ႉ ၶၢႆၵုၼ်ႇ။ ဢႃယုလိၵ်ႈၵိၼ်ၵႅၼ်ႇ ၵႃႈၶၢတ်ႈဢွင်ႈတီႈ/ ႁွင်ႈၼႆႉ ၸႂ်ႉတိုဝ်းပဵၼ်တၢင်းၵၢၼ်လႆႈ ၼိုင်ႈပီတေႃႇသၢမ်ပီ ၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇ ၾၢႆႇၽႃႇသႃႇၶႄႇၼၼ်ႉ ပႃးဝႆႉဝႃႈ သင်ပဵၼ်ႁၢၼ်ႉႁၢင်ႈၶိူင်ႈ၊ ႁၢၼ်ႉ KTV လႄႈ ႁူင်းႁႅမ်း (ႁူင်းလိုဝ်ႈသဝ်း) ၸိူဝ်းၼႆႉၸိုင် တေလႆႈသႂ်ႇပၼ်ၵႃႈၶၢတ်ႈ(ၶွၼ်ႇ) ၼပ်ႉပဵၼ်လိူၼ်မၼ်းၵႂႃႇ။ သင်ပဵၼ် ႁၢၼ်ႉၶၢႆၵုၼ်ႇတၢင်ႇၸိူဝ်းၼႆၸိုင် တေၼပ်ႉဢဝ်ၵႃႈၶၢတ်ႈဢွင်ႈတီႈ/ ႁွင်ႈ ၼိုင်ႈပီလႂ် ၼိုင်ႈပွၵ်ႈ ၼႆယဝ်ႉ။

ၵဵဝ်ႇလူၺ်ႈလွင်ႈ ၵႃႈၶၢတ်ႈႁွင်ႈ တႃႇၵႃႉၶၢႆ ၼႂ်းဝဵင်းလႃႈသဵဝ်ႈၼၼ်ႉ ၼၢင်းလဵၵ်ႉ ၵူၼ်းၼႂ်းပိုၼ်ႉတီႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈႁူဝ်လိူၼ်ၾႅပ်ႊပိဝ်ႊရီႊၼၼ်ႉ ဢူၺ်း ၵေႃႉၶႃႈ ၵႂႃႇထၢမ်ၶၢတ်ႈဢွင်ႈတီႈ တႃႇပိုတ်ႇၵႃးၵဵတ်ႉ တီႈပွၵ်ႉ 7 ၼၼ်ႉ ၶဝ်ယွၼ်းၵႃႈၶၢတ်ႈမၼ်း ၼိုင်ႈလိူၼ် 9 သႅၼ်ပျႃး။ ၵႃႈၶၢတ်ႈမၼ်း ၵႃႈႁႅင်းၼႃႇလႄႈ ႁဝ်းၵေႃႈဢမ်ႇပဵၼ်ၶၢတ်ႈ” – ဝႃႈၼႆ။

မၼ်းၼၢင်းသိုပ်ႇလၢတ်ႈၼႄထႅင်ႈဝႃႈ – “လွင်ႈၶွၼ်ႇ တႃႇၵူၼ်းပိုတ်ႇႁၢၼ်ႉၶၢႆၵုၼ်ႇယွႆႈ ၸိူဝ်းၼႆႉ ၶဝ်တိုၵ်ႉ မႃးလၢတ်ႈၼႂ်းပွၵ်ႉႁဝ်း မိူဝ်ႈလိူၼ်ၾႅပ်ႊပိဝ်ႊရီႊ ဝူင်ႈတီႈသွင်ၼၼ်ႉ။ ဝႃႈတေလႆႈၵႂႃႇသႂၢင်းၶွၼ်ႇတီႈၶဝ် ၼိုင်ႈလိူၼ်ဢေႇသုတ်း ႁႃႈသႅၼ်ၼႆဝႃႇ။ မၢင်ၸိူဝ်းၵေႃႈ ၵႂႃႇသႂၢင်းယဝ်ႉ။ မၢင်ၸိူဝ်းၵေႃႈ ပႆႇလႆႈၵႂႃႇသႂၢင်း” –ဝႃႈၼႆ။

လိူဝ်ၼၼ်ႉ ၵႃႈၶၢတ်ႈဢွင်ႈတီႈ/ ႁွင်ႈႁၢၼ်ႉၶၢႆၵုၼ်ႇၵူႈၸိူဝ်းၸိူဝ်းၼႆႉ တေပဵၼ်ၼိုင်ႈလိူၼ်ၵႃႈႁိုဝ် ၼိုင်ႈပီ ၵႃႈႁိုဝ်ၼႆၼၼ်ႉ ဢိင်ၼိူဝ်တၢင်းယႂ်ႇ၊ တၢင်းၵႂၢင်ႈႁွင်ႈသေ ၾၢႆႇၽူႈမီးပုၼ်ႈ ၽွၼ်းၶဝ် တေတႅပ်းတတ်းၵႂႃႇ။ ၵူၼ်းၸိူဝ်းပၼ်ဝႆႉၵႃႈၶၢတ်ႈဢွင်ႈတီႈ/ ႁွင်ႈ ပွၵ်ႈၵမ်းဢွၼ်တၢင်း ၸိူဝ်းၼၼ်ႉၵေႃႈ ပေႃးထိုင်မႃး ၼႂ်းလိူၼ်ၵျုၼ်ႊၸိုင် တေလႆႈပၼ်ၵႃႈၶၢတ်ႈႁွင်ႈ ၸွမ်းၼင်ႇၾၢႆႇၽူႈမီးပုၼ်ႈၽွၼ်းၶဝ် တႅပ်းတတ်းဝႆႉၶၼ်မႂ်ႇ ၼႆ ယဝ်ႉ။  

ၶွၼ်ႇႁၢၼ်ႉၶၢႆၵုၼ်ႇၵူႈၸိူဝ်းၸိူဝ်းၼႆႉ ၼွၵ်ႈလိူဝ် သိုၵ်းၵဝ်ႈၵၢင်ႉ ၵဵပ်းဢဝ်တီႈၵူၼ်းမိူင်း ၼႂ်းၸႄႈဝဵင်းလႃႈ သဵဝ်ႈယဝ်ႉ လႆႈႁူႉဝႃႈသိုၵ်းတဢၢင်း TNLA ၵေႃႈ ၼင်ႇႁိုဝ် တေပဵၼ်ငိုၼ်းၵွင်ၵၢင် မုၵ်ႉၸုမ်းၼႆသေ လူင်းၵဵပ်းတီႈၵူၼ်းမိူင်း ၼႂ်းၸႄႈဝဵင်းၼမ်ႉၶမ်းယူႇမိူၼ်ၵၼ်။

ၵူၼ်းမိူင်း ၵေႃႉပိုတ်ႇႁွင်ႈယႃ ဝႆႉၼႂ်းၸႄႈဝဵင်းၼမ်ႉၶမ်း လၢတ်ႈၼႄၽူႈတွႆႇႁွၵ်ႈဝႃႈ -“ပေႃးပဵၼ်သႅင်ႇၶၢႆ တၢင်းၶၢႆ သျေးၶၢၼ်း(ဆေးခန်း) ၼႆ ႁဝ်းလႆႈပၼ် ၶွၼ်ႇၶဝ်ၼိုင်ႈလိူၼ်သိပ်းသႅၼ်၊ ၵႃႈပႅတ်ႈယုၵ်းယၵ်းၵေႃႈ လႆႈပၼ်ၼိုင်ႈလိူၼ်သၢမ်မိုၼ်ႇ။ ဢမ်ႇယွမ်းပၼ်ႁႄပႅၵ်ႉႁႄပျႃး။ ယွၼ်းသဵတ်ႈၵေႃႈ ဢမ်ႇလႆႈ”- ဝႃႈၼႆ။

လႆႈႁူႉဝႃႈ ၵူၼ်းၸိူဝ်း ပႆႇလႆႈတေႃႇဢႃယု ၵႃႈၶၢတ်ႈႁွင်ႈၶၢႆၵုၼ်ႇၼၼ်ႉၵေႃႈ ပေႃးထိုင် ဝၼ်းတီႈ 01/06/2025 ႁႂ်ႈၵႂႃႇသိုပ်ႇႁဵတ်းလိၵ်ႈၵိၼ်ႇၵႅၼ်ႇၵၼ်ၶိုၼ်း။ သင်လုတ်ႈႁၢမ်းၵၢၼ်တေႃႇဢႃယု လိၵ်ႈ ၵိၼ်ႇၵႅၼ်ႇ ၵၢၼ်ၵႃႉၶၢႆၼႆၸိုင် တေဢမ်ႇမီးသုၼ်ႇလႆႈၶၢႆၵုၼ်ႇ တီႈႁွင်ႈၶၢတ်ႈၼၼ်ႉ ၼႆယဝ်ႉ။

တႅမ်ႈ – မူၺ်ၶမ်း