ဢွၼ်ႇယိင်းၼုမ်ႇ 3 ၵေႃႉ ၺႃးၶႃႈႁႅမ်တၢႆ ပႅတ်ႈဝႆႉႁိမ်းဝၢၼ်ႈၼႃးမၢၵ်ႇၶေႃ ၸႄႈဝဵင်းသီႇပေႃႉ ပဵၼ်ၼမ်ႉ မိုဝ်းၽႂ် ၸုမ်းလႂ်ႁဵတ်းတႄႉ ပႆႇႁူႉ ဝႃႈၼႆ။

ပူၼ်ႉမႃး ဝၼ်းတီႈ 23/02/2025 ၼၼ်ႉ ၵူၼ်းဝၢၼ်ႈထူပ်းႁၼ် ၶၢပ်ႈတူဝ်တၢႆ ဢွၼ်ႇယိင်းၼုမ်ႇ 3 ၵေႃႉ ၺႃးၶႃႈႁႅမ်တၢႆ ပႅတ်ႈဝႆႉၾၢႆႇတူၵ်းဝၢၼ်ႈၼႃးမၢၵ်ႇၶေႃ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ထိုင်မႃးဝၼ်းတီႈ 25 ယူႇတီႈ ၵၢင်ႉၵႄႇ သိုၵ်းၵဝ်ႈၵၢင်ႉၶဝ် လႆႈပူၼ်ႉၶၢပ်ႈတူဝ် (ၽဝ်ၾႆး) ၵႂႃႇ ဝႃႈၼႆ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈၽူႈတွႆႇႁွၵ်ႈဝႃႈ – “ပဵၼ်ၼၢင်းယိင်းၼုမ်ႇ 3 ၵေႃႉ ဢႃယုတေမီးမွၵ်ႈ 14 – 18 ပီၼႆႉၵူၺ်း ၺႃးၶႃႈႁႅမ်တၢႆသေ ပႅတ်ႈဝႆႉၾၢႆႇတူၵ်းဝၢၼ်ႈၼႃးမၢၵ်ႇၶေႃ တၢင်းလူင်းၵႂႃႇ တႃႇလူင်ၼၼ်ႉ။ ၼၢင်းယိင်း 3 ၵေႃႉၼၼ်ႉ ၺႃးပွႆႇပူၺ် သႂ်ႇၵူၼ်ပွတ်း၊ သိူဝ်ႈပိတ်းသေ ပႅတ်ႈဝႆႉႁိမ်းၶၢင်ႈတၢင်း ၸိူင်ႉၼႆ။ ယဝ်ႉၵေႃႈ တီႈတူဝ်ၶဝ်ၼၼ်ႉ မီးႁွႆးမၢတ်ႇၸဵပ်းဝႆႉ”- ဝႃႈၼႆ။

ဢိင်ၼိူဝ် လွင်ႈဢွၼ်ႇယိင်းၼုမ်ႇ 3 ၵေႃႉ ဢၼ်ၺႃးၶႃႈႁႅမ်တၢႆၸိူင်ႉၼႆၼႆႉ ႁၢၼ်ႉတေႃႇထိုင်ယၢမ်းလဵဝ် ပဵၼ်ၼမ်ႉမိုဝ်းၽႂ် ၸုမ်းလႂ်ႁဵတ်းတႄႉ ယင်းပႆႇႁူႉ။ ယဝ်ႉၵေႃႈ ဢွၼ်ႇယိင်းၼုမ်ႇ ၸိူဝ်းၼၼ်ႉ ပဵၼ်လုၵ်ႈ လၢင်းၽႂ် ယူႇတီႈလႂ် ၸိူဝ်းၼႆႉၵေႃႈ ပႆႇႁူႉ ဝႃႈၼႆ။

“လုၵ်ႈဢွၼ်ႇယိင်း 3 ၵေႃႉ ဢၼ်ၺႃးၶႃႈႁႅမ်တၢႆၼႆႉ ဢမ်ႇၸႂ်ႈလုၵ်ႈဢွၼ်ႇ ၼႂ်းဢိူင်ႇၼႃးမၢၵ်ႇၶေႃ ၵူၼ်း ဝၢၼ်ႈဢွၼ်ၵၼ်ထၢမ်ၵၼ်ယူႇ လုၵ်ႈဢွၼ်ႇၽႂ်ႁၢႆ ၸဵမ်ၸိူဝ်းၼႆႉ ၽႂ်ၵေႃႈဝႃႈ ဢမ်ႇႁၢႆၼႆၶႃႈ။ ပေႃးၼႆ လုၵ်ႈဢွၼ်ႇၼႆႉ လႅပ်ႈတေပဵၼ်ၵူၼ်းတၢင်ႇတီႈၵူၺ်း။ ယၢမ်းလဵဝ် ယွၼ်ႉငဝ်းလၢႆးၵၢၼ်မိူင်း ၵၢၼ်ႁႃၵိၼ်လဵင်ႉတွင်ႉယၢပ်ႇသေ ၼၢင်းယိင်းဢွၼ်ႇၶဝ် ၶၢႆတူဝ်ပၼ် ၸုမ်းယိပ်းၵွင်ႈၵၢင်ႇ ၸိူဝ်းမီးငိုၼ်းၶဝ်။ သိုၵ်းၸိူဝ်းၼၼ်ႉသမ်ႉ ႁူမ်ႈၵၼ်သေ ၼွၼ်းၸွမ်းၸိူင်ႉၼႆၵေႃႈ မီးတင်းၼမ်ၶႃႈယဝ်ႉ။ ယဝ်ႉၵေႃႈ ၵူၼ်းၼုမ်ႇ ၸိူဝ်းလဵၼ်ႈယႃႈမဝ်းၵမ် K ၸိူဝ်းၼႆႉၵေႃႈ ၼမ်ဝႃႈၼမ်ယဝ်ႉ”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။

ဢွၼ်ႇယိင်းၼုမ်ႇ 3 ၵေႃႉ ဢၼ်ၺႃးၶႃႈတၢႆပႅတ်ႈၼႆႉ ၺႃးၶႃႈတၢႆပႅတ်ႈဝႆႉဝၼ်းလႂ် ယွၼ်ႉသင်လႄႈ ၺႃး ၶႃႈတၢႆ ပႅတ်ႈဝႆႉၸိူင်ႉၼႆၼႆႉ ၽႂ်ၵေႃႈ ပႆႇႁူႉငဝ်ႈႁၢၵ်ႈလွင်းတၢင်းမၼ်းလီလီ ဝႃႈၼႆ။

တီႈဢိူင်ႇၼႃးမၢၵ်ႇၶေႃတင်း ဝၢၼ်ႈၵွင်းႁၵ်းၼႆႉ သိုၵ်းၵဝ်ႈၵၢင်ႉ MNDAA တူင်ႉၼိုင်ယူႇဝႆႉ။ ယဝ်ႉၵေႃႈ ၼႂ်းၸႄႈဝဵင်းသီႇပေႃႉၼႆႉ သိုၵ်းတဢၢင်း TNLA ၊ သိုၵ်းတႆး SSPP ၸိူဝ်းၼႆႉ ၵေႃႈ တူင်ႉၼိုင်ယူႇဝႆႉ မိူၼ်ၵၼ် ဝႃႈၼႆ။