မၢၵ်ႇလူင် တူၵ်းတႅၵ်ႇ ၼႂ်းတပ်ႉသိုၵ်းမၢၼ်ႈ 354 ဢၼ်ပၵ်းဝႆႉတီႈ ဝၢၼ်ႈတွင်းၶမ်း ၼႂ်းၸႄႈဝဵင်းၼွင်ၶဵဝ် ႁဵတ်းႁႂ်ႈသဵင်မၢၵ်ႇတႅၵ်ႇ လင်မေႃးလၢႆလၢႆၵမ်းသေ ထုၵ်ႇၾႆးလုၵ်ႉမႆႈႁၢဝ်ႈႁႅင်း ဝႃႈၼႆ။

ဝၼ်းတီႈ 25/02/2025 ယၢမ်းၵၢင်ၼႂ် သိုၵ်းတဢၢင်း TNLA ႁၢင်းႁႅၼ်း လေႃႇတိုၵ်း တပ်ႉသိုၵ်းမၢၼ်ႈ ငဝ်ႈငုၼ်းၾၢႆႇၵုမ်းၵမ်ယၼ်ႇသိုၵ်း ၶိူင်ႈၵွင်ႈလူင် မၢႆ 902 ဢၼ်ပၵ်းဝႆႉ တီႈဝၢၼ်ႈတွင်းၶမ်း ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ႁၢဝ်ႈႁႅင်း ၼႆယဝ်ႉ။

ထိုင်မႃးယၢမ်းဝၢႆးဝၼ်း မၢၵ်ႇလူင်သိုၵ်းတဢၢင်း တူၵ်းတႅၵ်ႇ ၼႂ်းတပ်ႉသိုၵ်းမၢၼ်ႈ 354 ၼၼ်ႉသေ ထုၵ်ႇၾႆးမႆႈၼႂ်းတပ်ႉၼၼ်ႉ ႁၢဝ်ႈႁႅင်း ဝႃႈၼႆ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈၽူႈတွႆႇႁွၵ်ႈဝႃႈ -“သဵင်ၵွင်ႈၼႆႉ တႄႇတႅၵ်ႇ ယၢမ်းၵၢင်ၼႂ်မႃးယဝ်ႉ ပၢင်တိုၵ်းၼႆႉပဵၼ်ႁႅင်း ၶႂ်ႈဝႃႈတင်းဝၼ်းယဝ်ႉ။ ထိုင်မႃး ယၢမ်းဝၢႆးဝၼ်းမၢၵ်ႇလူင် တူၵ်းတႅၵ်ႇတီႈတပ်ႉသိုၵ်းမၢၼ်ႈ 354 ၼၼ်ႉသေ ၾႆးမႆႈႁၢဝ်ႈႁႅင်း။ သင်ဝႃႈ တပ်ႉသိုၵ်းမၢၼ်ႈ တီႈဝၢၼ်ႈတွင်းၶမ်းၼၼ်ႉ တူၵ်းသုမ်းၵႂႃႇတႄႉၸိုင် တၢင်းၾၢႆႇၵျွၵ်ႉမႄး၊ သီႇပေႃႉၵေႃႈ ထုၵ်ႇလီၾၢင်ႉသတိၶိူင်ႈမိၼ်သိုၵ်းမၢၼ်ႈဝႆႉယူႇ”- ဝႃႈၼႆ။

တီႈထုင်ႉတွင်းၶမ်းၼၼ်ႉ မီးဝႆႉ တပ်ႉငဝ်ႈငုၼ်းၾၢႆႇၵုမ်းၵမ်ယၼ်ႇသိုၵ်း ၶိူင်ႈၵွင်ႈလူင်မၢႆ 902 ၊ လိူဝ်ၼၼ်ႉ တေမီးထႅင်ႈတပ်ႉၵွင်ႈလူင် 354 ၊ 206 လႄႈ 406 ဢၼ်မီးၾၢႆႇတႂ်ႈ တပ်ႉၵွင်ႈလူင် 902 ။

ဝၢႆးလင် ပၢင်ဢုပ်ႇဢူဝ်း သိုၵ်းမၢၼ်ႈတင်း သိုၵ်းတဢၢင်း TNLA ဢမ်ႇလႆႈၶေႃႈတူၵ်းလူင်းသင်သေ သုတ်းယဝ်ႉၵႂႃႇၼၼ်ႉ ၶိူင်ႈမိၼ်သိုၵ်းမၢၼ်ႈ တိူဝ်းပွႆႇမၢၵ်ႇမႃး ၼႂ်းၼႃႈတီႈသိုၵ်းတဢၢင်း။ ထႅင်ႈၾၢႆႇ ၼိုင်ႈၵေႃႈ ၾၢႆႇသိုၵ်းတဢၢင်း TNLA ၵေႃႈ လေႃႇတိုၵ်းတပ်ႉသိုၵ်းမၢၼ်ႈ တီႈထုင်ႉတွင်းၶမ်း ဢၼ်မီးၼႂ်းၵႄႈ ၼွင်ၶဵဝ် – လွၵ်ႉၸွၵ်ႇ ႁၢဝ်ႈႁႅင်းၶိုၼ်း။

ပူၼ်ႉမႃး ဝၼ်းတီႈ 24 ၼႆႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ တီႈတၢင်းၽႄဝၢၼ်ႈတီး (ဢုမ်ႇမတီး) တႅၵ်ႇတိူဝ်ႉႁိူၼ်းယေးၵူၼ်းမိူင်း လူႉၵွႆထႅင်ႈ။ ပၢင်တိုၵ်း သိုၵ်းမၢၼ်ႈ တင်း TNLA ၼႂ်းၸႄႈဝဵင်းၼွင်ၶဵဝ်ၼႆႉ သိုၵ်းမၢၼ်ႈ တိူဝ်ႉၸႂ်ႉၶိူင်ႈၻရူၼ်ႊ ၼမ်မႃးလိူဝ်ၵဝ်ႇ ဝႃႈၼႆ။

ပူၼ်ႉမႃး ဝၼ်းတီႈ 23 ပၢင်တိုၵ်းၼႂ်းၸႄႈဝဵင်းၼွင်ၶဵဝ်ၼၼ်ႉ သိုၵ်းမၢၼ်ႈ ဢဝ်ၶိူင်ႈၻရူၼ်ႊ ပွႆႇမၢၵ်ႇသႂ်ႇ မၢၵ်ႇၵွင်ႉငူၼ်ႉထၢတ်ႈ ၾၢႆႇၸုမ်းလုၵ်ႉၽိုၼ်ႉ လူႉတၢႆ 8 ၵေႃႉ၊ ၸိူဝ်းမၢတ်ႇၸဵပ်း မဝ်းႁၢၵ်ႈသေ လႆႈႁၢမ်သူင်ႇ ယူဝ်းယႃတူဝ်ဝႆႉ မီးထႅင်ႈလၢႆလၢႆၵေႃႉၼႆ ၽူႈတူင်ႉၼိုင်ၵၢၼ်သိုၵ်းၼႂ်းပိုၼ်ႉတီႈ လၢတ်ႈၼင်ႇၼႆ။

ပၢင်တိုၵ်း တီႈထုင်ႉတွင်းၶမ်း ၸႄႈဝဵင်းၼွင်ၶဵဝ်ၼႆႉ ႁိုင်မႃးၶၢဝ်းတၢင်း 6 လိူၼ်ပၢႆယဝ်ႉသေတႃႉ ပၢင်တိုၵ်းပႆႇယဵၼ်၊ ၵူၼ်းပိုၼ်ႉတီႈၵေႃႈ ပႆႇၸၢင်ႈပွၵ်ႈယူႇၶိုၼ်းႁိူၼ်းယေး။

တႅမ်ႈၸၢႆးၶႂၼ်မိူင်း – ၸၢႆးသုၼ်ႁၵ်ႉ ပိၼ်ႇၽႃႇသႃႇ