ႁႅင်းၵၢၼ်မိူင်းမၢၼ်ႈ ၸၢႆးယိင်း 2 ၵေႃႉ ၶၢႆၶူဝ်းႁၢင်ႈၶိူင်ႈၼိူဝ်ဢွၼ်ႊလၢႆႊသေ ၺႃးၸဝ်ႈၼႃႈတီႈထႆး ၵူတ်ႇ ထတ်းတီႉၺွပ်းလႆႈ ၼႂ်းၸႄႈတွၼ်ႈရၼွင်း မိူင်းထႆးပွတ်းၸၢၼ်း မိူဝ်ႈဝၼ်းတီႈ 25/02/2025 ပူၼ်ႉမႃးၼႆႉ ဝႃႈၼႆ။

သိုဝ်ႇၶၢဝ်ႇထႆး ဢွၵ်ႇဝႆႉဝႃႈ – ယွၼ်ႉမီးလွင်ႈတိူင်ႇၸႅင်ႈလႄႈ ပလိၵ်ႈၼႂ်းပိုၼ်ႉတီႈ လႆႈလူင်းၵႂႃႇၵူတ်ႇထတ်း။ ထူပ်းႁၼ် ၶူဝ်းႁၢင်ႈၶိူင်ႈလႄႈ ယႃႈယႃ 5,000 သႅၼ်းပၢႆ ၼႂ်းၵႃးလမ်းၼိုင်ႈ ဢၼ်ၵိုတ်းဝႆႉ ၾၢႆႇၼႃႈႁိူၼ်း။ ၶူဝ်းႁၢင်ႈၶိူင်ႈမၢင်သႅၼ်း ပႃးၼႂ်းသဵၼ်ႈမၢႆ ဢၼ်မိူင်းထႆးႁၢမ်ႈဝႆႉ ဢမ်ႇပၼ်ၶႂၢင်ႉသိုဝ်ႉၶၢႆ။ ၵႃႈၶၼ်ၶူဝ်းၶွင် ဢၼ်တီႉၺွပ်းလႆႈတင်းသဵင်ႈ မႅၼ်ႈငိုၼ်းထႆး 12 လၢၼ်ႉဝၢတ်ႇ – ဝႃႈၼႆ။

ႁႅင်းၵၢၼ်မိူင်းမၢၼ်ႈ 2 ၵေႃႉ ဢၼ်ၺႃးၸဝ်ႈၼႃႈတီႈထႆး တီႉၺွပ်းလႆႈၼႆႉ မီးဢႃယု 21 ပီတင်း 24 ပီ။ ၸဝ်ႈၼႃႈတီႈပလိၵ်ႈထႆး ယိုတ်းၵႂႃႇပႃး ၶိူင်ႈၶူဝ်းၸႂ်ႉတိုဝ်း ၼႂ်းၵၢၼ်ၶၢႆၶူဝ်းၶွင်ဢွၼ်ႊလၢႆႊ။ လိူဝ်ၼၼ်ႉ ၵူတ်ႇထတ်းႁၼ်ပႃး ၼႂ်းပပ်ႉယေးငိုၼ်းၶဝ်သွင်ၵေႃႉ 1 ဝၼ်းလႂ်မီးငိုၼ်းၶဝ်ႈဢွၵ်ႇ 3 မိုၼ်ႇထိုင် 4 မိုၼ်ႇ ဝၢတ်ႇ။

ၶဝ်သွင်ၵေႃႉၼႆႉ ယိုၼ်ယၼ်လၢတ်ႈတီႈ ပလိၵ်ႈဝႃႈ – ၶူဝ်းၶွင်ၵမ်ႈၽွင်ႈ လႆႈတေႃႉဢဝ်ၼႂ်းမိူင်းမၢၼ်ႈမႃး လူၺ်ႈဢမ်ႇမႅၼ်ႈတၢင်းၵၢၼ်သေ သိုပ်ႇၶၢႆတီႈၼိူဝ်ဢွၼ်ႊလၢႆႊ ဝႃႈၼႆ။

ယၢမ်းလဵဝ် ႁႅင်းၵၢၼ်မိူင်မၢၼ်ႈ 2 ၵေႃႉၼႆႉ ၺႃးဢဝ်လိူင်ႈလူၺ်ႈတၢင်းၽိတ်း ႁဵတ်းၵၢၼ် ဢၼ်ဢမ်ႇမီး သုၼ်ႇႁဵတ်းလႄႈ ၵႃႉၶၢႆၶူဝ်းၶွင် – သိုဝ်ႇၶၢဝ်ႇ Dawei Watch ဢွၵ်ႇဝႆႉၼင်ႇၼႆ။