ဢိင်ၼိူဝ် လွင်ႈႁဵတ်းဢွၵ်ႇႁႅင်းထၢတ်ႈၾႆးၾႃႉ တီႈမိူင်းမၢၼ်ႈၼႆႉသေ ယူႇတီႈ မိူင်းရတ်ႉသျႃး တူဝ်ႈတၼ်းဝႆႉ တႃႇတေလူင်းတိုၼ်းလၢင်းယူႇ ဝႃႈၼႆ။

ပူၼ်ႉမႃး ဝၼ်းတီႈ 23/02/2025 ၼႆႉ ယူႇတီႈ သိုဝ်ႇၶၢဝ်ႇတႂ်ႈသိုၵ်းမၢၼ်ႈ ၵုမ်းၵမ်ဝႆႉၼၼ်ႉ ႁၢႆးငၢၼ်းဝႆႉဝႃႈ –  ၽွင်းလူင် H.E Maxim RESHETNIKOV ႁွင်ႈၵၢၼ် ၾၢႆႇႁုၼ်ႈမုၼ်း ၶိုၼ်ႈယႂ်ႇ ၵၢၼ်ပၢႆးမၢၵ်ႈမီး မိူင်းရတ်ႉ သျႃး လၢတ်ႈၵႂႃႇ မိူဝ်ႈၽွင်းႁူပ်ႉၵၼ်တင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇၼၼ်ႉဝႃႈ တူဝ်ႈတၼ်းဝႆႉ တႃႇတေလူင်းတိုၼ်းလၢင်း ၼႂ်းၵၢၼ် ႁဵတ်းဢွၵ်ႇၾႆးၾႃႉ၊ ၾုၼ်ႇထၢတ်ႈ (မျေႇဢေႃးၸႃႇ) လႄႈ ၼမ်ႉမၼ်းမဵၼ် ၸိူဝ်းၼႆႉ။

လိူဝ်သေ သွင်ၸိုင်ႈမိူင်း (မိူင်းရတ်ႉသျႃး – မိူင်းမၢၼ်ႈ) ႁူမ်ႈၵၼ်ႁဵတ်းသၢင်ႈယဝ်ႉ တွၼ်ႈတႃႇ ၵၢၼ်လူင်းတိုၼ်းလၢင်သုၼ်ႇတူဝ် (သုၼ်ႇလဵဝ်) ၸိူဝ်းၼႆႉၵေႃႈ တေတိူဝ်းႁဵတ်းသၢင်ႈၵႂႃႇ ဝႃႈၼႆ။

ၵဵဝ်ႇလူၺ်ႈ မိူင်းရတ်ႉသျႃး တေမႃးလူင်းတိုၼ်းလၢင်း ၼႂ်းၶၵ်ႉတွၼ်ႈႁဵတ်းဢွၵ်ႇၾႆးၾႃႉ ၼႂ်းမိူင်းမၢၼ်ႈ ၼႆႉသေ ၸဝ်ႈၵၢၼ်ပၢႆးမၢၵ်ႈမီး ဝဵင်းတႃႈၵုင်ႈၵေႃႉၼိုင်ႈ လၢတ်ႈဝႃႈ – ယၢမ်းလဵဝ် မိူင်းရတ်ႉသျႃးတင်း မိူင်း မၢၼ်ႈ လႆႈႁူပ်ႉပၼ်ႁႃပၢင်တိုၵ်းဝႆႉယူႇႁင်းၽႂ်မၼ်း။ ၵွပ်ႈၼၼ်လႄႈ လိူဝ်သေ ၵၢၼ်ပၢႆးမၢၵ်ႈမီးယဝ်ႉ သွင်ၸိုင်ႈမိူင်း တေဢဝ်ၵၢၼ်မိူင်း ၊ ၵၢၼ်သိုၵ်းပဵၼ်ယႂ်ႇသေ ႁဵတ်းၵႂႃႇၵူၺ်း – ဝႃႈၼႆ။

မိူဝ်ႈၼႂ်းလိူၼ်သႅပ်ႊထႅမ်ႊပိူဝ်ႊ ပီ 2024 ပူၼ်ႉမႃးၼၼ်ႉၵေႃႈ ရတ်ႉသျႃးတင်း မိူင်းမၢၼ်ႈ လႆႈႁူမ်ႈၵၼ်လူင်းလၢႆးမိုဝ်း (MoC) တႃႇတေၵေႃႇသၢင်ႈ ႁူင်းၸၢၵ်ႈႁဵတ်းဢွၵ်ႇ ၾုၼ်ႇထၢတ်ႈ ၼႂ်းမိူင်းမၢၼ်ႈ။

လိူဝ်ၼၼ်ႉ တႄႇဢဝ်ပီ 2024 တေႃႇထိုင် ပီ 2027 ၼႆႉ သိုၵ်းမၢၼ်ႈ ႁပ်ႉပုၼ်ႈၽွၼ်း ပဵၼ်ၽူႈငူပ်ႉငီႉ တႃႇလွင်ႈၵပ်းသၢၼ် ၼႂ်းၵႄႈဢႃႊသီႊယၼ်ႊ – ရတ်ႉသျႃးၼႆ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။