သိုၵ်းမၢၼ်ႈ ယိုတ်းမိူင်း တင်ႈၸႂ် ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇႁိမ်းမၢၼ်ႈဝဵင်းလူင် ယၢၼ်ၼမ်ႉၶမ်းမွၵ်ႈ 13 လၵ်း တင်းမူတ်း  2 လုၵ်ႈ ဝႃႈၼႆ။

ဝၼ်းတီႈ 23/02/2025 ယၢမ်းၵၢင်ၶိုၼ်း 11:20 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတီႈဝၢၼ်ႈပၢင်ႇၵွင်းမူး (ဝၢၼ်ႈတႆး) ယၢၼ်မၢၼ်ႈဝဵင်းလူင် မွၵ်ႈ 6 လၵ်း ဢၼ်မီးဝႆႉၼႂ်းၸႄႈဝဵင်းမၢၼ်ႈၸေႊ ၸႄႈမိူင်းၶၢင် ဝႃႈၼႆ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈၽူႈတွႆႇႁွၵ်ႈဝႃႈ – “တၢင်းသၢႆၼၼ်ႉ ပဵၼ်ဝၢၼ်ႈတႆးႁဝ်းမူတ်းဢေႃႈ။ ဝၢၼ်ႈပၢင်ႇၵွင်းမူးၼၼ်ႉၵေႃႈ ပဵၼ်ဝၢၼ်ႈတႆးဢေႃႈ။ ယၢမ်းလဵဝ်တႄႉ ႁၢမ်းဝႆႉယဝ်ႉ ဝၢၼ်ႈၼၼ်ႉ တေယၢၼ်မၢၼ်ႈဝဵင်းလူင်မွၵ်ႈ 6 လၵ်း၊ ယၢၼ်ၼမ်ႉၶမ်းမွၵ်ႈ 13 လၵ်း။ မၢၵ်ႇဢၼ်ၶဝ်မႃးပွႆႇ မိူဝ်ႈဝႃးၼႆႉ ယွၼ်ႈထိုင်ဝဵင်းၼမ်ႉၶမ်း ႁႅင်းတႄႉႁႅင်းဝႃႈ လိၼ်ပေႃးသၼ်ႇဢေႃႈ”- ဝႃႈၼႆ။

မိူဝ်ႈဝႃး ယၢမ်းၵၢင်ၶိုၼ်းၼႆႉ သိုၵ်းမၢၼ်ႈ ဢဝ်ၶိူင်ႈမိၼ် မႃးပၼ်ႇလဵပ်ႈၸွမ်းၾၢႆႇၸၢၼ်းဝဵင်းၼမ်ႉၶမ်းသေ ယဝ်ႉၵေႃႈ ၵႂႃႇပွႆႇတၢင်းဝၢၼ်ႈပၢင်ႇၵွင်းမူး ႁိမ်းမၢၼ်ႈဝဵင်းလူင်ၼၼ်ႉ တၢင်းပွတ်းတွၼ်ႈၼၼ်ႉ ယွၼ်ႉမီးသိုၵ်းၶၢင် KIA တူင်ႉၼိုင်ယူႇဝႆႉ ဝႃႈၼႆ။

“လႆႈငိၼ်းဝႃႈ တီႈဝၢၼ်ႈပၢင်ႇၵွင်းမူးၼၼ်ႉ ပဵၼ်ဢွင်ႈတီႈ သိုၵ်းၶၢင်ၶဝ် ၾိုၵ်းသိုၵ်းဝႆႉ ပႆႇႁိုင်သင်။ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။ ယွၼ်ႉဝႃႈၵူၼ်းသိုၵ်းၶဝ်သမ်ႉ ၼွၼ်းဝႆႉတီႈၼိုင်ႈ။ မၢၵ်ႇဢၼ်မႃးတူၵ်းသႂ်ႇသမ်ႉ ထႅင်ႈတီႈၼိုင်ႈ ႁဵတ်းၼၼ်ၶႃႈဢေႃႈ ဢၼ်လႆႈႁူႉမႃးတႄႉ”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

ဝၢၼ်ႈပၢင်ႇၵွင်းမူးၼႆႉ ပဵၼ်ဝၢၼ်ႈတႆး ယၢမ်းလဵဝ် ပဵၼ်ဝၢၼ်ႈႁၢမ်းဝႆႉ ႁိမ်းၼၼ်ႉ တေမီးဝၢၼ်ႈတႆးထႅင်ႈ မိူၼ်ၼင်ႇ – မၢၼ်ႈမႂ်ႇ၊ မၢၼ်ႈမွၼ်း၊ မၢၼ်ႈႁူၺ်ႈ ၸိူဝ်းၼႆႉ။ မိူဝ်ႈၽွင်းၼၼ်ႉ ယွၼ်ႉသိုၵ်းမၢၼ်ႈတင်း သိုၵ်းၶၢင် ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ႁဵတ်းႁႂ်ႈၵူၼ်းဝၢၼ်ႈလႆႈငိူင်ႉပၢႆႈ။ ဝၢႆးၼၼ်ႉ သိုၵ်းမၢၼ်ႈ ၶဝ်ႈယူႇၼႂ်းဝၢၼ်ႈသေ ဢမ်ႇပၼ်ၵူၼ်းဝၢၼ်ႈၶဝ်ႈယူႇ ၶိုၼ်း။ ဝၢႆးသိုၵ်းမၢၼ်ႈထွႆယဝ်ႉ သိုၵ်းၶၢင်ၶဝ်ႈယူႇ ၼၼ်ႉၵေႃႈ ဢမ်ႇပၼ်ၵူၼ်းဝၢၼ်ႈၶဝ်ႈမိူၼ်ၵၼ် ႁၢၼ်ႉတေႃႉထိုင်ယၢမ်းလဵဝ် – ၵူၼ်းပိုၼ်ႉတီႈလၢတ်ႈ။