တႃႇၵူၼ်းပၢႆႈၽေးသိုၵ်း ဢၼ်မႃးသွၼ်ႈယူႇဝႆႉ တီႈမိူင်းၵိုင် ၼပ်ႉႁူဝ်ပၢၵ်ႇၼႆႉ ၼင်ႇႁိုဝ် ပေႃးတေလႆႈၶၢႆၶူဝ်း ၵုၼ်ႇၶွင်ၵိၼ်ယႅမ်ႉ တႃႇငိုၼ်းၶဝ်ႈလဵင်ႉလူ ၼႂ်းၼႃႈႁိူၼ်းၽႂ်မၼ်းၵႂႃႇၼႆသေ ပွႆးလိူၼ်သီႇ ပီၼႆႉ တေၸတ်း ႁဵတ်းတီႈၵႅပ်းဢဝ် – လုင်းၸၢႆးလူင် ႁူဝ်ပဝ်ႈ တီႈထၢတ်ႈမူၺ်ႇတေႃႇလူင် မိူင်းၵိုင်လၢတ်ႈ။
“မိူဝ်ႈဝၼ်းတီႈ 19 ၼႆႉ ႁဝ်းၶႃႈ ၵေႃၵမ်ၵၢၼ် ႁဵတ်းပၢင်ၵုမ်သေ ဢုပ်ႇဢူဝ်းၵၼ် တႄႉတႄႉဝႃႈဝႃႈ။ ႁဝ်း ဢွၼ်ၵၼ် မႃးထတ်းသၢင်တူၺ်း လၢႆၾၢႆႇလၢႆတၢင်းသေ ၵူၼ်းပၢႆႈၽေးသိုၵ်း ဢၼ်ပၢႆႈမႃးယူႇဝႆႉတီႈမိူင်းၵိုင် ၼပ်ႉႁူဝ်ပၢၵ်ႇၼႆႉ ၶဝ်ၵေႃႈထၢမ်ယူႇယႅၼ်ႈယႅၼ်ႈ ပွႆးလိူၼ်သီႇ ပီၼႆႉ ၸွင်ႇတေပဵၼ် တေပဵၼ်မိူဝ်ႈလႂ်ၼႆ တိၵ်းတိၵ်း ပဵၼ်တၢင်းမုင်ႈမွင်းၶဝ် ဢၼ်ၼိုင်ႈ တႃႇတေလႆႈၶၢႆၶူဝ်းၵုၼ်ႇၶွင်ၵိၼ်ယႅမ်ႉၶဝ် ႁႂ်ႈပေႃးမီးငိုၼ်း ၶဝ်ႈတႃႇလဵင်ႉၼႂ်းၼႃႈႁိူၼ်းၶဝ်လႄႈ ၵွပ်ႈၼႆ ၸင်ႇဢုပ်ႇၵၼ်ဝႃႈ ပွႆးလိူၼ်သီႇပီၼႆႉ ႁဝ်းတေဢမ်ႇၸတ်း ယႂ်ႇယဝ်ႉ တေၸတ်းႁဵတ်းတီႈၵႅပ်ႈမၼ်းၵူၺ်း”- ဝႃႈၼႆ။
ဢိင်ၼိူဝ် လွင်ႈၽႅၼ်ယၼ်ႇသိုၵ်း 1027 ၼၼ်ႉသေ ႁဵတ်းႁႂ်ႈၵူၼ်းမိူင်းတႆးတၢင်းပွတ်းႁွင်ႇ ဢွၼ်ၵၼ်ပၢႆႈ မႃးသွၼ်ႈယူႇဝႆႉ တီႈဝဵင်းမိူင်းၵိုင်ၼႆႉ မီးၼပ်ႉႁူဝ်ပၢၵ်ႇ ၵမ်ႈၼမ် ပဵၼ်ၵူၼ်းဝဵင်းလႃႈသဵဝ်ႈ။ ယၢမ်းလဵဝ် တႃႇ တေယူႇလွတ်ႈလႆႈၼႆႉ ၵူၼ်းပၢႆႈၽေး ၵမ်ႈၼမ် ဢွၼ်ၵၼ်ႁဵတ်းတၢင်းၶၢႆ ၶွင်ၵိၼ်ယႅမ်ႉသေ ဝၢင်းၶၢႆ ၸွမ်း ၵိဝ်ႇဝဵင်းမိူင်းၵိုင် သွင်ၾၢၵ်ႇၶၢင်ႈတၢင်းၼႆႉ ပေႃးၵိုၼ်းၶွၼ်ႈ ၵူႈၼႂ်ဝၼ်းၶမ်ႈယဝ်ႉ – ၵူၼ်းမိူင်းၵိုင်လၢတ်ႈ။
ပွႆးလိူၼ်သီႇ မိူင်းၵိုင် ပီၼႆႉ တေၸတ်းႁဵတ်းတီႈၵႅပ်ႈမၼ်းၵူၺ်း မိူၼ်ၼင်ႇ – ပၢင်မူၼ်ႈသိူဝ်း ႁွင်ႉၽဵင်းၵႂၢမ်း၊ ၸၢတ်ႈသႅင်းတႆး ၸိူဝ်းၼႆႉတႄႉ တေဢမ်ႇမီး မိူၼ်မိူဝ်ႈၵူႈပီယဝ်ႉ။ ၵူၺ်း ၵႃႈ ဢၼ်တေမီးတႄႉ တၢင်ႇသွမ်း တေႃႇ လူႇတၢၼ်းယၢတ်ႈၼမ်ႉ ၸိူင်ႉၼၼ်ၵူၺ်း ဝႃႈၼႆ။
“ႁဝ်းၶႃႈ ပွင်ႇၸႂ်ယူႇ ယၢမ်းလဵဝ် ၵူၼ်းမိူင်းႁဝ်း လႆႈပၢႆႈၽေးသိုၵ်းၵၼ်သေ ပဵၼ်ၼမ်ႉႁူၼမ်ႉတႃယူႇလႄႈ ၵွပ်ႈၼႆ ပွႆးလိူၼ်သီႇ ပီၼႆႉ ႁဝ်းၶႃႈ တေဢမ်ႇမီးပၢင်မူၼ်ႈသိူဝ်း ပၢၼ်မႂ်ႇ၊ ပၢၼ်ၵဝ်ႇ (ၸၢတ်ႈသႅင်း) သင်၊ ပၢင်တေႃႇလွင်း ၸိူဝ်းၼႆႉ ႁဝ်းၶႃႈ တိုၼ်းတေဢမ်ႇႁႂ်ႈမီး။ ႁႂ်ႈပီႈၼွင်ႉႁဝ်း လႆႈလူႇလႆႈတၢၼ်းၵၼ်ၵႂႃႇၸိူင်ႉ ၼၼ်ၵူၺ်း”- လုင်းၸၢႆးလူင် သိုပ်ႇလၢတ်ႈၼႄၼင်ႇၼႆ။
ပွႆးလိူၼ်သီႇ မိူင်းၵိုင် ပီၼႆႉ ပေႃးထိုင်မႃး ဝၼ်းတီႈ 09/03/2025 (လိူၼ်သီႇမႂ်ႇ 11 ၶမ်ႈ) ပဵၼ်ဝၼ်းသင်ၶႃ ႁွတ်ႈထိုင် (ၸုၼ်ႇ) ၵၼ်၊ ဝၼ်းတီႈ 10 -11 (လိူၼ်သီႇမႂ်ႇ 12-13 ၶမ်ႈ) တေတၢင်ႇသွမ်းတေႃႇလူင် လွတ်ႈ ဝၼ်းပရိတ်ႈ။ ဝၼ်းတီႈ 12 – 13 (လိူၼ်သီႇမႂ်ႇ 14 ၶမ်ႈ – လိူၼ်သီႇမူၼ်း) တႄႉ တေလူႇတၢၼ်းယၢတ်ႇၼမ်ႉၵႂႃႇ ၼႆယဝ်ႉ။
ထၢတ်ႈမဵတ်ႈ ဢၼ်ၵိုၵ်းပိုၼ်း ၸိုဝ်ႈသဵင်ယႂ်ႇ ၼႂ်းမိူင်းတႆး ဢၼ်ၸတ်းႁဵတ်း ပွႆးလိူၼ်သီႇမူၼ်းမႃး ၵူႈပီၼႆႉ မိူၼ်ၼင်ႇ ထၢတ်ႈမူၺ်ႇတေႃႇ မိူင်းၵိုင်၊ သီႇပေႃႉ၊ ႁူဝ်လိုင်း၊ ထမ်ႈပၢင်းတရႃႉ၊ ၵွင်းမူးၵၢတ်ႇၵူႇ၊ ၵဵင်းလိူၼ် ဢိၵ်ႇထႅင်ႈလၢႆလၢႆတီႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ