ဝၢႆးသိုၵ်းမၢၼ်ႈတင်း သိုၵ်းတဢၢင်း ႁူပ်ႉထူပ်းဢုပ်ႇဢူဝ်းၵၼ် တီႈမိူင်းၶႄႇ မိူဝ်ႈၵၢင်လိူၼ်ၼႆႉယဝ်ႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇတီႈဝဵင်းၼွင်ၶဵဝ် တိူဝ်ႉၺႃးၵူၼ်းမိူင်းလူႉတၢႆ 3 ၵေႃႉ မၢတ်ႇၸဵပ်း 4 ၵေႃႉ။

ဝၼ်းတီႈ 19/02/2025 ယၢမ်းၵၢင်ၶမ်ႈ 8 မူင်းပၢႆ ဢမ်ႇပဵၼ်ပၢင်တိုၵ်းသင် ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း (Jet Fighter) မႃးပွႆႇမၢၵ်ႇ တီႈပွၵ်ႉပူႇတႃႇလႄႈ တီႈႁူင်းယႃလူင် ၼႂ်းဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈဝႃႈ – “ဢၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇၼႆႉ ပဵၼ်ယၢမ်းၵၢင်ၶမ်ႈ တီႈပွၵ်ႉပူႇတႃႇၼႆႉ တိူဝ်ႉၺႃးၵူၼ်းပိုၼ်ႉတီႈ လူႉတၢႆ 2 ၵေႃႉ၊ မၢတ်ႇၸဵပ်း 3 ၵေႃႉ။ လိူဝ်ၼၼ်ႉ တီႈႁူင်းယႃလူင်ထႅင်ႈ ၼၼ်ႉၵေႃႈ တိူဝ်ႉ ၺႃး ၵူၼ်းလူႉတၢႆ 1 ၵေႃႉ မၢတ်ႇၸဵပ်း 1 ၵေႃႉ။ ဢၼ်သိုၵ်းမၢၼ်ႈ မႃးပွႆႇမၢၵ်ႇပွၵ်ႈၼႆႉ ပဵၼ်ဝၢႆးၶဝ်ၵႂႃႇဢုပ်ႇၵုမ်ၵၼ် တီႈမိူင်းၶႄႇၼၼ်ႉ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 16-17 ၼႆႉ ယူႇတီႈ မိူင်းၶႄႇပဵၼ်ၵၢင်သေ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ႁူပ်ႉဢုပ်ႇၵၼ် တီႈဝဵင်းၶုၼ်ႊမိင်ႊ။ ၼႂ်းပၢင်ဢုပ်ႇဢူဝ်းၼၼ်ႉ ၾၢႆႇသိုၵ်းတဢၢင်းၶဝ် တုၵ်း ယွၼ်းႁႂ်ႈဢဝ်ပိုၼ်ႉတီႈ ဢၼ် ၶဝ် တိုၵ်းပေႉၵုမ်းၵမ်ဝႆႉၸိူဝ်းၼၼ်ႉ ႁႂ်ႈမၵ်းမၼ်ႈပဵၼ်ၸႄႈမိူင်းတဢၢင်း ဝႃႈၼႆ။

ၾၢႆႇသိုၵ်းမၢၼ်ႈသမ်ႉ ဢဝ်ပိူင်ငဝ်ႈပိုင်းမိူင်း 2008 ၼၼ်ႉသေလၢတ်ႈဝႃႈ ၸၢင်ႈဢဝ်ဝဵင်းမၢၼ်ႈတူင်ႈတင်း ဝဵင်းၼမ်ႉသၼ်ႇ မၵ်းမၼ်ႈပဵၼ်ပိုၼ်ႉတီႈ ၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းတဢၢင်းၵႂႃႇၼႆသေ လွင်ႈၼႆႉ ႁဵတ်းႁႂ်ႈတင်းသွင်ၾၢႆႇ ဢုပ်ႇဢူဝ်းၵၼ်ယၢပ်ႇလႄႈ ပၢင်ၵုမ်ပွၵ်ႈၼႆႉ ယဝ်ႉၵႂႃႇလူၺ်ႈဢမ်ႇမီးၶေႃႈ တူၵ်းလူင်သင်။

လိူဝ်ၼၼ်ႉ ၾၢႆႇသိုၵ်းတဢၢင်း တုၵ်းယွၼ်းထႅင်ႈ 3 ၶေႃႈ မိူၼ်ၼင်ႇ – ႁႂ်ႈၵိုတ်းတိုၵ်းသေ သိုပ်ႇၵုမ်းၵမ် ၸွမ်းၼင်ႇ ဢၼ်သိုၵ်းၶဝ်တိုၵ်းပေႉလႆႈဝႆႉ၊ ႁႂ်ႈသိုၵ်းမၢၼ်ႈ ၵိုတ်းယိုတ်း လွင်ႈၸႂ်ႉတိုဝ်းၶိူင်ႈမိၼ်တိုၵ်း၊ ၸႂ်ႉ Drone ပွႆႇမၢၵ်ႇသႂ်ႇလႄႈ လွင်ႈပိုတ်ႇပၢင်တိုၵ်း ၸိူဝ်းၼႆႉ။ ၶေႃႈလိုၼ်းသုတ်းသမ်ႉ ၸွမ်းပိုၼ်ႉတီႈ ဢၼ်သိုၵ်းၶဝ်ၵုမ်းၵမ်ဝႆႉ ၸိူဝ်းၼၼ်ႉ ႁႂ်ႈၸၢင်ႈတေႃႉၶူဝ်းၵုၼ်ႇၶွင်ၵိၼ်ယႅမ်ႉလႄႈ ယႃႈယႃ ၸိူဝ်းၼႆႉ လႆႈၶိုၼ်းမိူၼ်ၵဝ်ႇ ဝႃႈၼႆ။

ယွၼ်ႉပၢင်ႁူပ်ႉထူပ်းပွၵ်ႈၼႆႉ ဢမ်ႇလႆႈၶေႃႈတူၵ်းလူင်းသင်လႄႈ ယူႇတီႈ တူဝ်တႅၼ်းၶိုၵ်ႉတွၼ်း ၽွင်းလူင် ၾၢႆႇၼွၵ်ႈမိူင်း မိူင်းၶႄႇ တိူင်ႉသျီႊၵျုၼ်ႊ (Deng Xijun) မွၵ်ႇလၢတ်ႈတီႈၼႂ်းပၢင်ႁူပ်ႉထူပ်းၼၼ်ႉဝႃႈ ၼင်ႇႁိုဝ် တေလႆႈႁူပ်ႉထူပ်း ဢုပ်ႇၵၼ်ထႅင်ႈ ပွၵ်ႈၵမ်းသွင်ၼၼ်ႉ ႁႂ်ႈတင်းသွင်ၾၢႆႇႁၢင်ႈႁႅၼ်းဝႆႉ ဝႃႈၼႆ။  

ပၢင်ႁူပ်ႉထူပ်းဢုပ်ႇၵၼ် တီႈမိူင်းၶႄႇၼၼ်ႉ ယူႇတီႈ ၾၢႆႇသိုၵ်းတဢၢင်း TNLA ဢွၼ်ႁူဝ်ၶဝ်ႈႁူမ်ႈသမ်ႉ ပဵၼ်ၸွမ်သိုၵ်း တႃႉၵျူၵ်ႉၵျႃး။ ၾၢႆႇသိုၵ်းမၢၼ်ႈသမ်ႉ ပဵၼ်ၸွမ်သိုၵ်း ၵူဝ်ႇၵူဝ်ႇဢူး ၽူႈၵွၼ်းၵုမ်းၵမ်ယၼ်ႇသိုၵ်း ၶိုၵ်ႉတွၼ်းမၢႆ (1) ။