ၵူၼ်းၼုမ်ႇမိူင်းမၢၼ်ႈ ၸိူဝ်းဢွၵ်ႇႁဵတ်းၵၢၼ်ၼွၵ်ႈမိူင်းသေ ပွၵ်ႈမိူဝ်းၸႂ်းႁိူၼ်းၼၼ်ႉ သင်ဢႃယုၶဝ်ႈပႃး ၼႂ်းသႅၼ်း ႁၢပ်ႇၵၢၼ်သိုၵ်းၸိုင် ႁွင်ႈၵၢၼ်ၽွင်းလူင် ၾၢႆႇၵူၼ်းႁဵတ်းၵၢၼ် တႂ်ႈသိုၵ်းမၢၼ်ႈ ႁႄႉႁၢမ်ႈဢမ်ႇပၼ်ဢွၵ်ႇၼွၵ်ႈမိူင်းၶိုၼ်း ဝႃႈၼႆ။

ၵူၼ်းၼုမ်ႇ ၸိူဝ်းၺႃးႁႄႉႁၢမ်ႈၼႆႉ ပဵၼ်ၵူၼ်းၸၢႆး ဢႃယု ၼႂ်းၵႄႈ 18 – 35 ပီ။ ၸိူဝ်းယိပ်းဝႂ်ၶၢမ်ႈမိူင်း  PJ (Passport for Job) သေ ဢွၵ်ႇႁဵတ်းၵၢၼ်ၼွၵ်ႈမိူင်းလႄႈ ၸိူဝ်းယိပ်းဝႂ်ၶၢမ်ႈမိူင်းဢႅဝ်ႇလႄႇ PV (Passport for Visit) ၸိူဝ်းၼႆႉ။  

လွင်ႈၼႆႉ ႁွင်ႈၵၢၼ်ၽွင်းလူင် ၾၢႆႇၵူၼ်းႁဵတ်းၵၢၼ် တႂ်ႈသိုၵ်းမၢၼ်ႈ ၸီႉသင်ႇလၢတ်ႈၵႂႃႇ တီႈၸုမ်းႁႃပၼ် ၵၢၼ်ၼွၵ်ႈမိူင်းၵူၺ်း၊ ဢမ်ႇလႆႈပိုၼ်ၽၢဝ်ႇဝႆႉပဵၼ်တၢင်းၵၢၼ်ၼႆ – ၸုမ်းႁႃပၼ်ၵၢၼ်ၼွၵ်ႈမိူင်း တီႈဝဵင်းတႃႈၵုင်ႈ လၢတ်ႈတီႈသိုဝ်ႇ RFA ၼႂ်းဝၼ်းတီႈ 17/02/2025 ၼႆႉၼင်ႇၼႆ။

ဝၢႆးလင် သိုၵ်းမၢၼ်ႈ ပိုၼ်ၽၢဝ်ႇ ပၵ်းပိူင်ၵူၼ်းမိူင်းႁၢပ်ႇၵၢၼ်သိုၵ်း (နည်းဥပဒေ) ၼႂ်းဝၼ်းတီႈ 23 လိူၼ်ၵျႅၼ်ႊၼိဝ်ႊရီႊယဝ်ႉ သိုၵ်းမၢၼ်ႈ တိူဝ်းႁႄႉႁၢမ်ႈ လွင်ႈၵူၼ်းၼုမ်ႇဢွၵ်ႇၼွၵ်ႈမိူင်း။

တီႈၼႂ်း (ၼီးဢုပတေႇ) မတ်ႉတႃ – 51 ၼၼ်ႉ လၢတ်ႈဝႆႉဝႃႈ – ၵူၼ်းၼုမ်ႇ ၸိူဝ်းလႆႈႁပ်ႉလိၵ်ႈမွၵ်ႇႁွင်ႉ တႃႇၵႂႃႇႁၢပ်ႇ ၵၢၼ်သိုၵ်းၼၼ်ႉ သင်ဢမ်ႇလႆႈၶႂၢင်ႉၸိုင် တေဢမ်ႇလႆႈဢွၵ်ႇၼွၵ်ႈမိူင်း ဝႃႈၼႆဝႆႉ။

လိူဝ်ၼၼ်ႉ မိူၼ်ၼင်ႇ တီႈမတ်ႉတႃ – 50 ၵေႃႈ ပႃးဝႆႉဝႃႈ ၵူၼ်းၼုမ်ႇ ၸိူဝ်းၵူတ်ႇထတ်းပၢႆးယူႇလီဝႆႉ ၶႅမ်ႉလႅပ်ႈၼၼ်ႉ သင်တၢင်ႇၶႂၢင်ႉဝႆႉ ႁႂ်ႈလူတ်းယွၼ်ႇပၼ် ၶၢဝ်းယၢမ်းႁၢပ်ႇၵၢၼ်သိုၵ်း၊ ၶႂ်ႈသုတ်ႉၶၢႆႉၶၢဝ်းယၢမ်း ၸိူဝ်းၼႆႉၸိုင် ဢမ်ႇလႆႈၶႂၢင်ႉသေ တေဢမ်ႇလႆႈဢွၵ်ႇၼွၵ်ႈမိူင်း ၼႆယဝ်ႉ။