ၼႂ်းဝၼ်းတီႈ 14/2/2025 ဝၼ်း Valentine Day ၼၼ်ႉ လုၵ်ႈႁဵၼ်းတႆးၵေႃႉၼိုင်ႈ ၺႃးတႅင်းတၢႆ တီႈႁၢၼ်ႉတၢင်းၵိၼ် ႁိမ်းႁူင်းပလိၵ်ႈမႄႈၸူဝ်ႉ ၸႄႈဝဵင်းသၼ်သၢႆး ၸႄႈတွၼ်ႈၵဵင်းမႆႇ မိူင်းထႆး ။
ၸၢႆးတႆးထိူၼ်ႇ ၽူႈၸွႆႈထႅမ် ႁႅင်းၵၢၼ်တႆး ဝဵင်းၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ- “ ၶမ်ႈၼၼ်ႉ လုၵ်ႈဢွၼ်ႇၸၢႆးၸုမ်း ၼိုင်ႈ ၼင်ႈၵိၼ်တၢင်းၵိၼ်ၸွမ်းၵၼ်တီႈႁၢၼ်ႉ ဢၼ်မီးတင်းလင်ႁူင်းပလိၵ်ႈ မႄႈၸူဝ်ႉ ၊ သမ်ႉမီးၼၢင်းယိင်းဢွၼ်ႇ ၵေႃႉၼိုင်ႈ ဢဝ်ၵွၵ်းလဝ်ႈမၼ်းမႃးလေႃႇၵွၵ်း ၸၢႆးၼုမ်ႇၵေႃႉၼိုင်ႈ ၼႂ်းၸုမ်းၶဝ်။ ၵမ်းၼႆႉ ၸူႉၼၢင်းၼၼ်ႉသမ်ႉၶႅၼ်တေႃႇၸုမ်းၼုမ်ႇၸၢႆးၸိူဝ်းၼၼ်ႉသေ ထဵင်မေႃးၵၼ်။ ၸူဝ်းၵၼ်ဢွၵ်ႇၵႂႃႇၼႃႈႁၢၼ်ႉတၢင်းၵိၼ်ၼၼ်ႉ။ ဢမ်ႇတၼ်းလၢတ်ႈသင်ၵၼ် ၸူႉၼၢင်းၼၼ်ႉ ဢဝ်မိတ်ႈမႃးတႅင်းပၼ် တိူဝ်ႉသႂ်ႇၸၢႆးဢွၼ်ႇၵေႃႉတၢႆၼႆႉ။ တိူဝ်ႉၺႃး သဵတ်ႈလိူတ်ႈယႂ်ႇမၼ်း။ ဢမ်ႇႁၢမ်ႈလိူတ်ႈလႆႈလႄႈမၼ်းၸၢႆး ၵႂႃႇတၢႆတီႈႁူင်းယႃ သၼ်သၢႆး”- ဝႃႈၼႆ။
ၵေႃႉၺႃးတႅင်းတၢႆၼႆႉ ပဵၼ်လုၵ်ႈႁဵၼ်းတႆး ၸိုဝ်ႈၸၢႆးလဝ်း ဢႃယု 20 ပီ ယူႇဝၢၼ်ႈပုင်းၼွႆႉ၊ ဝဵင်းမိူင်းငေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ မၼ်းၸၢႆး တိုၵ်ႉႁဵၼ်းလိၵ်ႈဝႆႉ ၾၢႆႇပၢႆးၸၢၵ်ႈ Technology ပီသွင် တီႈၸၼ်ႉၸွမ် Payap တီႈဝဵင်းၵဵင်းမႆႇ ဝႃႈၼႆ။
ၸၢႆးၼုမ်ႇဢၼ်ဢဝ်မိတ်ႈတႅင်းၸၢႆးလဝ်းၼႆႉ ပဵၼ်ၵူၼ်းမိူင်းထႆး ၸိုဝ်ႈႁွင်ႉ ၼၢႆးသႃႇၵလဵၼ်း ၸႂ်ၼူ ဢႃယု 21 ပီ၊ ဝၢႆးတႅင်းၸၢႆးလဝ်းယဝ်ႉ မၼ်းၸၢႆးလႅၼ်ႈပၢႆႈ ၊ ထိုင်မႃးဝၼ်းတီႈ 15/2/2025 ယၢမ်းၵၢင်ၶမ်ႈ မၼ်းၸၢႆးၸင်ႇမႃးတီႈ ႁူင်းပလိၵ်ႈသေ ယွမ်းႁပ်ႉတၢင်းၽိတ်းႁင်းၵူၺ်း။ ပေႃႈမႄႈမၼ်းၸၢႆး ၵႂႃႇယွၼ်းၼွမ်း ပၼ်ငိုၼ်းႁပ်ႉႁွင်း သႅၼ်ႁႃႈမိုၼ်ႇဝၢတ်ႇ ႁပ်ႉပၢၵ်ႇသေ ဢွၵ်ႇမႃးယူႇၼွၵ်ႈၶွၵ်ႈ ႁၢင်ႈႁႅၼ်းတူဝ် တႃႇၶိုၼ်ႈလုမ်းတြႃး – ၼႆ ၽူႈၸွႆႈထႅမ်ပၼ်ၾၢႆႇၽူႈတၢႆ လၢတ်ႈၼင်ႇၼႆ။
ၶၢပ်ႈတူဝ်တၢႆ ၸၢႆးလဝ်းတႄႉၸုမ်းၸွႆႈထႅမ် ႁႅင်းၵၢၼ်တႆး ၸွႆႈဢဝ်ၵႂႃႇပူၼ်ႉၶၢပ်ႈတူဝ် ယဝ်ႉ လီငၢမ်းမိူဝ်ႈဝၼ်းတီႈ 17/2/2025 ၼၼ်ႉယဝ်ႉဝႃႈၼႆ။
လွင်ႈၼႆႉ ၽူႈၸွႆႈထႅမ် ႁႅင်းၵၢၼ်တႆး ဝဵင်းၵဵင်းမႂ်ႇပၼ်ၾၢင်ႉလၢတ်ႈပႃးဝႃႈ -“ ပေႃးဢွၵ်ႇ လႄႇယၢမ်းၵၢင်ၶမ်ႈၵၢင်ၶိုၼ်း ၶႂ်ႈႁႂ်ႈၾၢင်ႉ။ ယွၼ်ႉဝႃႈပေႃးႁဝ်းဢမ်ႇၵႂႃႇၽိတ်းပိူၼ်ႈၵေႃႈ ၊ ပိူၼ်ႈၸၢင်ႈမႃးၽိတ်းႁဝ်း မီးၽေးၼမ် တွၼ်ႈတႃႇ တူဝ်ၵဝ်ႇ” – ဝႃႈၼႆ ။
မိူဝ်ႈၼႂ်းဝၼ်းတီႈ 14/2/2025 ၼၼ်ႉၼင်ႇၵဝ်ႇ ၼုမ်ႇယိင်းၵူၼ်းမိူင်းဝဵင်းမိူင်းၼၢႆး ၸိုင်ႈတႆးပွတ်းၸၢၼ်း ၼၼ်ႉၵေႃႈ ၺႃးၵူၼ်းဢမ်ႇႁူႉၾၢႆႇ ၶႃႈႁႅမ်သေ ပွႆႇတူဝ်တၢႆမူၵ်းယုမ်းဝႆႉ တီႈဝဵင်းၼမ်ႉၸၢင် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ