ယိင်းသၢဝ်ဢွၼ်ႇ ဝဵင်းမိူင်းၼၢႆး ၸိုင်ႈတႆးပွတ်းၸၢၼ်း ထုၵ်ႇၵူၼ်းဢမ်ႇႁူႉၾၢႆႇၶႃႈႁႅမ်တၢႆ ၼႂ်းဝၼ်းတၢင်းႁၵ်ႉလုမ်ႈၾႃႉ ဝႃႈၼႆ။

ဝၼ်းတီႈ 14/02/2025 (ဝၼ်းတၢင်းႁၵ်ႉ – Valentine Day) ယၢမ်းႁူဝ်ၶမ်ႈ 5 မူင်း ယိင်းသၢဝ်ဢွၼ်ႇ 2 ၵေႃႉ ၵူၼ်းမိူင်း ၼၢႆး ႁွင်ႉၵၼ်ၵႂႃႇဢႅဝ်ႇတၢင်းၼွၵ်ႈသေ တႃႇၵေႃႉၼိုင်ႈႁၢႆၵႂႃႇပႅတ်ႈ ဢမ်ႇပွၵ်ႈႁိူၼ်း ၶိုၼ်းထႅင်ႈဝၼ်းၼိုင်ႈ ၸင်ႇႁၼ်တူဝ်တၢႆမၼ်းၼၢင်း တီႈတၢင်းၶဝ်ႈဝၢၼ်ႈလွႆသၢႆး (ႁိမ်းႁၢၼ်ႉၶၢႆၼိူဝ်ႉမူ) ဝဵင်းၼမ်ႉၸၢင်။ 

ၼၢင်းယိင်း ၵူၼ်းမိူင်းၼၢႆး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ယိင်းသၢဝ်ဢွၼ်ႇ ၵေႃႉၼိုင်ႈ ၵူၼ်းမိူင်းၼၢႆး ထုၵ်ႇၶႃႈ ႁႅမ်တၢႆ မိူဝ်ႈဝၼ်း Valentine ၼၼ်ႉသေ ပႅတ်ႈတူဝ်တၢႆဝႆႉ တီႈတၢင်းၶဝ်ႈဝၢၼ်ႈလွႆသၢႆး ႁိမ်းပိူၼ်ႈၶၢႆၼိူဝ်ႉမူ။ မၼ်းၼၢင်း ၺႃးပေႃႉထုပ်ႉဝႆႉတီႈၵွၵ်းႁူဝ် တိၼ်မိုဝ်းၶႃသမ်ႉ ပေႃးႁၵ်းလူႉၵွႆမူတ်း၊ ၶူဝ်းၶွင်ၵႃႈ ၶၼ်ယႂ်ႇဢၼ်ၵပ်းတူဝ်ၵေႃႈ ဢမ်ႇ ၵိုတ်းသင် ႁၢႆမူတ်း”- ဝႃႈၼႆ။

ၼၢင်းယိင်း ဢၼ်ထုၵ်ႇၶႃႈႁႅမ်ၼႆႉ ၸိုဝ်ႈႁွင်ႉ ၼၢင်းသႅင်ဢွင်ႇ (ဢီႇၶႄႇ) ဢႃယု 18 ပီ။ ႁဵၼ်းလိၵ်ႈ ၸၼ်ႉၸဵတ်း ယူႇပွၵ်ႉဢူးယဵၼ်ႇ ဝဵင်းမိူင်းၼၢႆး ။ မၼ်းၼၢင်း ဢမ်ႇမီးမႄႈယဝ်ႉ လႆႈယူႇၸွမ်းပေႃႈ။

ၸုမ်းၸွႆႈထႅမ်တူင်ႇဝူင်းၵူၼ်း ပရႁိတဝဵင်းမိူင်းၼၢႆး ၸွမ်းၸွႆႈႁႃသေ ထူပ်းႁၼ်တူဝ်တၢႆ မၼ်းၼၢင်း မိူဝ်ႈဝၼ်းတီႈ 15/02/2025 ယၢမ်းၵၢင်ၼႂ် 10 မူင်း။

ၵူၼ်းႁူႉၸၵ်း ၸမ်ၸႂ်မၼ်းၼၢင်း လၢတ်ႈၽူႈတွႆႇႁွၵ်ႈဝႃႈ – “ဢူၺ်းၵေႃႉမၼ်းၼၢင်း မႃးႁွင်ႉဢွၵ်ႇၵႂႃႇၸဵမ် မိူဝ်ႈဝၢႆးဝၼ်း 5 မူင်းၼၼ်ႉ ထိုင်မႃး 6 မူင်း ဢူၺ်းၵေႃႉမၼ်း မႃးသူင်ႇမၼ်းၼၢင်း တီႈပၢမ်ႉၼမ်ႉမၼ်း။ လုၵ်ႉတီႈၼၼ်ႉသေ ႁၢႆၵႂႃႇ။ ၸဝ်ႈၼႃႈတီႈၵႂႃႇယွၼ်းတူၺ်းၵွင်ႈထၢႆႇ CCTV လႄႈလႆႈႁၼ်ရူတ်ႉၵႃး Crown သီၶၢဝ် မႃးႁွင်ႉဢဝ်မၼ်းၼၢင်းၵႂႃႇ၊ သိုပ်ႇၵႂႃႇတၢင်းလႂ်သေ ပဵၼ်ႁိုဝ်လႄႈ ထိုင်တီႈၶႃႈႁႅမ်ၵၼ်တၢႆတႄႉ ဢမ်ႇႁူႉ၊ ဢူၺ်းၵေႃႉ ဢၼ်မႃးႁွင်ႉဢဝ်မၼ်းဢွၵ်ႇၵႂႃႇ ၼၼ်ႉၵေႃႈ ယၢမ်းလဵဝ် ပလိၵ်ႈၵုမ်း တူဝ်ဝႆႉတီႈမိူင်းၼၢႆးယဝ်ႉ”- ဝႃႈၼႆ။

ၵူၼ်းဢၼ်ႁူႉၸၵ်း ၵၼ်တင်းၵေႃႉတၢႆၼႆႉ လၢတ်ႈဝႃႈ – ၼၢင်းသႅင်ဢွင်ႇၼႆႉ ပဵၼ်ၵူၼ်းၵႆႉၵႂႃႇဢွင်ႈတီႈၵိၼ်ၵျေႃႇ ႁွင်ႉၽဵင်းၵႂၢမ်း KTV ။ တူဝ်တၢႆမၼ်းၼၢင်းၼႆႉၵေႃႈ မီးႁိမ်းၸမ် KTV တူၺ်း။ ထုၵ်ႇၶႃႈႁႅမ်တၢႆႁိုဝ် ဢမ်ႇၼၼ် ထုၵ်ႇရူတ်ႉၵႃးၽႃႇၺႃးသေ လူႉတၢႆတႄႉ ဢမ်ႇပႆႇႁူႉတႅတ်ႈတေႃး ပလိၵ်ႈတိုၵ်ႉၵူတ်ႇထတ်းယူႇ – ဝႃႈၼႆ။

ၵူၼ်းမိူင်းၼၢႆး ၵေႃႉဢၼ်ႁူႉၸၵ်းၸမ်ၸႂ် မၼ်းၼၢင်း လၢတ်ႈၽူႈတွႆႇႁွၵ်ႈဝႃႈ -“မိူဝ်ႈလႆႈငိၼ်းၶၢဝ်ႇၼႆႉ တူၵ်းၸႂ်ႁႅင်း ၼႃႇ၊ လုၵ်ႈဢွၼ်ႇၵေႃႉၼၼ်ႉ ၵႆႉၵႂႃႇ KTV ၼႃႇ၊ ပလိၵ်ႈတႄႉ ပႆႇပိုၼ်ၽၢဝ်ႇယိုၼ်ယၼ် ၸိူင်ႉႁိုဝ်။ ၵူၼ်းပိုၼ်ႉတီႈတႄႉ လိုဝ်းၵၼ်ဝႃႈ ပဵၼ်ၸူႉၸူဝ်းၵၼ်ထဵင်မေႃးၵၼ်သေ ႁဵတ်းတီႈၵၼ်ႁိုဝ်။ ဢမ်ႇၼၼ် ၺႃးရူတ်ႉၵႃးၽႃႇၺႃးတၢႆႁိုဝ် ၼႆယူႇ။ တီႈႁိမ်းတူဝ်တၢႆမၼ်းၼၢင်းၼၼ်ႉၵေႃႈ မီးသိုၵ်းမၢၵ်ႇၵႅင်း ၼႃးယႆး ပႂ်ႉယၢမ်းဝႆႉယူႇ။ ပေႃးၵႃးၽႃႇၺႃးတႄႉ သိုၵ်း ၼၼ်ႉ တၢၼ်ႇလႆႈငိၼ်းယူႇၼႃ။ ၽိူဝ်ႇပိူၼ်ႈမႃးထၢမ်ၼႆ မၼ်းဝႃႈဢမ်ႇလႆႈငိၼ်းသင်”- ဝႃႈၼႆ။

တီႈဝဵင်းၼမ်ႉၸၢင်ၼႆႉ မီးႁၢၼ်ႉတၢင်းၵိၼ်ၵျေႃႇ မူၼ်ႈသိူဝ်း  KTV – Bar ၸိူဝ်းၼႆႉ ဢမ်ႇယွမ်း 30 ႁၢၼ်ႉ။ ၵူၼ်းၼုမ်ႇ ၵႂႃႇမူၼ်ႈသိူဝ်းၵိၼ်ၵျေႃႇၵၼ် မီးၵူႈၶမ်ႈၶိုၼ်း။ လႆႈၸႂ်ႉၸၢႆႇငိုၼ်းတွင်းၼပ်ႉ ႁူဝ်သႅၼ်တႃႇၶဝ်ႈ ၵႂႃႇမူၼ်ႈသိူဝ်း။ ယႃႈမႃႉယႃႈမဝ်းၵမ်ၵေႃႈလိူင်ႇၼမ်လႄႈ ပဵၼ်ဢၼ်လီမႆႈၸႂ် တွၼ်ႈတႃႇၵူၼ်းၼုမ်ႇတႄႉတႄႉ – ၵူၼ်းပိုၼ်ႉတီႈ လၢတ်ႈၼင်ႇ ၼႆ။