ပွႆးလိူၼ်သီႇ တီႈဝဵင်းသႅၼ်ဝီ ပီၼႆႉ တေၸတ်းယႂ်ႇႁိုင် 10 ဝၼ်း ယွၼ်ႉဢမ်ႇလႆႈၸတ်းႁဵတ်းမႃးမီးၶၢဝ်း တၢင်းလၢႆပီယဝ်ႉ တင်ႈတႄႇ တၢင်းပဵၼ်ၶူဝ်ႊဝိတ်ႉ 19 လၢမ်းၽႄႈၼၼ်ႉမႃး ဝႃႈၼႆ။

ပွႆးလိူၼ်သီႇၼႆႉ တေၸတ်းႁဵတ်း ၼႂ်းဝၼ်းတီႈ 10-19/03/2025 (လိူၼ်သီႇမႂ်ႇ 12 ၶမ်ႈ တေႃႇထိုင် လိူၼ်သီႇလွင်ႈ 6 ၶမ်ႈ) ယူႇတီႈ ၵူၼ်းပိုၼ်ႉတီႈ သြႃႇလႄႈတၵ်ႉၵႃႇ တေႁူမ်ႈၵၼ် ၸတ်းႁဵတ်းတီႈၵၢင်ဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။  

ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈၽူႈတွႆႇႁွၵ်ႈဝႃႈ – “ယၢမ်းလဵဝ် တႃႇႁဵတ်းသုမ်ႉပွႆးၼၼ်ႉ ၶဝ်ၶၢၼ်းၵၼ် ၼိုင်ႈဝၢၼ်ႈ မႆႉမွင် 5 လႅမ်ႈ။ ပွႆးတႄႉ တေႁဵတ်းႁိုင် 10 ဝၼ်း တီႈပၢင်ႇပွႆးလိူၼ်သီႇ ၾၢႆႇၼႃႈၵျွင်းၵၢင်ဝဵင်း။ ပွႆးလိူၼ်သီႇ တီႈဝဵင်းသႅၼ်ဝီၼႆႉ ဢမ်ႇလႆႈၸတ်းႁဵတ်းမႃး တေမီးမွၵ်ႈ 6 ပီယဝ်ႉ တင်ႈတႄႇ ၶူဝ်ႊဝိတ်ႉ 19 လၢမ်းၽႄႈၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်”- ဝႃႈၼႆ။

ပွႆးလိူၼ်သီႇ ပီၼႆႉ တေမီးပႃး ပၢင်ပွႆးပၢင်းၽြႃးလူင်းမိူင်း ၶိုၼ်းမိူၼ်ၵဝ်ႇ ယဝ်ႉၵေႃႈ တေမီးပႃးထႅင်ႈ ၸၢတ်ႈသႅင်း မွၵ်ႇၵွၼ်တႆး မႃးမူၼ်ႈၸႂ်ပၼ် ဝႃႈၼႆ။

ၵူၼ်းသႅၼ်ဝီ ၽူႈယိင်း ဢႃယု 30 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ပေႃးဢဝ်ၾၢႆႇၾိင်ႈထုင်းဝႃႈတႄႉ လႆႈၶိုၼ်း ၸတ်းႁဵတ်းပဵၼ်ပွႆး ဢၼ်ၵိုၼ်းၶွၼ်ႈယႂ်ႇလူင်ၸိူင်ႉၼႆၼႆႉ လီၸူမ်းသိူဝ်းၸွမ်းယူႇ။ ၵူၺ်းၵႃႈ ပေႃးဝူၼ်ႉၶိုၼ်းလၢႆလၢႆ ၾၢႆႇသမ်ႉ တေဢွၼ်ၵၼ်မႃးၸတ်းႁဵတ်းပွႆးယႂ်ႇပွႆးလူင် ၼႂ်းၵႄႈငဝ်းလၢႆးဝၢၼ်ႈမိူင်းဢမ်ႇၼိမ်သဝ်း ၵူၼ်းမိူင်းတူၵ်းၵိၼ်း ၽွင်းၶၢဝ်းတိုၵ်ႉလႆႈၶၢမ်ႇတၢမ်ႇသိုၵ်းသိူဝ်ယူႇၸိူင်ႉၼႆတႄႉ ပဵၼ်ဢၼ်လီ မႆႈၸႂ်ယူႇဝႆႉမဵဝ်းၼိုင်ႈ”- ဝႃႈၼႆ။

ယၢမ်းလဵဝ် တီႈဝဵင်းသႅၼ်ဝီၼႆႉ တပ်ႉသိုၵ်းၵဝ်ႈၵၢင်ႉ MNDAA ယိုတ်းၵုမ်းဝႆႉသေ ပိုတ်ႇပၢင်တေႃႇလွင်းဝႆႉ ထႅင်ႈလၢႆလၢႆတီႈ တင်ႈတႄႇႁၢင်လိူၼ်ၵျႅၼ်ႊၼိဝ်ႊရီႊၼႆႉမႃး ဝႃႈၼႆ။

“ဝၼ်းမိူဝ်ႈၼႆႉ ဢမ်ႇမိူၼ်မိူဝ်ႈဢွၼ်တၢင်းယဝ်ႉ တေမီးပႃးပၢင်တေႃႇလွင်း ၵူႈသႅၼ်းသႅၼ်း တေႁိုင်ပဵၼ် 10 ဝၼ်းၵမ်းလဵဝ်လႄႈ ၵူၼ်းမိူင်းတႄႉ တေဢမ်ႇလူႉယွၼ်ႉမၼ်းႁိုဝ်တေဝႃႈလႆႈ။ ပၢႆလိူဝ်ၵိၼ်းယဝ်ႉ သမ်ႉတေဢွၼ်ၵၼ် မိုင်ႉၸွမ်းလွင်ႈပျေႃႇမူၼ်း ၸွမ်းၼႂ်းပၢင်တေႃႇလွင်းတႄႉ ဢမ်ႇထုၵ်ႇလီပဵၼ် လွင်ႈၼႆႉ ပဵၼ်ဢၼ်လီမႆႈၸႂ် တႃႇၵူၼ်းမိူင်းတႄႉယဝ်ႉ”- ၵူၼ်းပိုၼ်ႉတီႈ ဝဵင်းသႅၼ်ဝီလၢတ်ႈ။

ဝၢႆးၽႅၼ်ယၼ်ႇသိုၵ်း 1027 မႃးၼႆႉ ယူႇတီႈ သိုၵ်းၵဝ်ႈၵၢင်ႉ MNDAA ယိုတ်းၵမ်းလႆႈဝႆႉ ဝဵင်းသႅၼ်ဝီ မႃးမိူဝ်ႈ ႁၢင်ပီ 2023 ၼၼ်ႉသေ ထိုင်မႃး ပီမႂ်ႇၶႄႇ 2024 ၼၼ်ႉ ယူႇတီႈ သိုၵ်းၶဝ် ဢွၼ်ႁူဝ်ပိုတ်ႇပၢင်တေႃႇလွင်း ၶိုၵ်ႉယႂ်ႇလူင်မႃး တီႈပၢင်ႇပွႆးလိူၼ်သီႇ ၵၢင်ဝဵင်းသႅၼ်ဝီ ၼၼ်ႉမႃး ႁၢၼ်ႉတေႃႇထိုင်လိူၼ်ႁႃႈ (သွၼ်းၼမ်ႉ) ၼၼ်ႉ ၵမ်းၼိုင်ႈ။

တႄႇဢဝ်ႁၢင်လိူၼ်ၵျႅၼ်ႊၼိဝ်ႊရီႊ ပီ 2025 ၼႆႉမႃး ၶိုၼ်းပိုတ်ႇပၢင်တေႃႇလွင်းမႃးထႅင်ႈ ပွၵ်ႈၼႆႉ တေ ဢၢၼ်းပိုတ်ႇတႃႇၶၢဝ်းတၢင်းၼိုင်ႈပီ ။ ဢွင်ႈတီႈ ပၢင်တေႃႇလွင်း ဢၼ်ပိုတ်ႇဝႆႉၼႂ်းၸႄႈဝဵင်းသႅၼ်ဝီၼႆႉ သမ်ႉ မိူၼ်ၼင်ႇ – တီႈပၢင်ႇပွႆးလိူၼ်သီႇ ၵၢင်ဝဵင်းသႅၼ်ဝီ၊ ဝၢၼ်ႈၼမ်ႉဢုၼ်ႇ၊ ဢိူင်ႇပၢင်ႇလေႃႉ၊ ဢိူင်ႇၸေႈ ဢူ၊ ဢိူင်ႇၼမ်ႉၸလၢပ်ႈ ဢိၵ်ႇတင်း ဢိူင်ႇမိူင်းပႃး ၸဵမ်ၸိူဝ်းၼႆႉ။