ပလိၵ်ႈမၢၼ်ႈ ဢၼ်ယူႇၾၢႆႇတႂ်ႈသိုၵ်းမၢၼ်ႈ ၵုမ်းၵမ် ႁႄႉႁၢမ်ႈၵူတ်ႇထတ်းႁႅင်း ဢမ်ႇပၼ်ၵူၼ်းၼုမ်ႇ ဢႃယု 18 ပီ – 35 ပီ လတ်းၶၢမ်ႈၵႂႃႇမႃး တီႈၽၵ်းတူမိူင်းလႅၼ်လိၼ်တႆး – ၶႄႇယဝ်ႉ ဝႃႈၼႆ။

တႄႇဢဝ် ဝၼ်းတီႈ 12/02/2025 ၼႆႉမႃး တီႈၽၵ်းတူမိူင်းလႅၼ်လိၼ်တႆး – ၶႄႇ ဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ သင်ပဵၼ်ၵူၼ်းၸၢႆးၼုမ်ႇ ဢႃယု 18 ပီ ထိုင် 35 ပီလႄႈ ၼၢင်းယိင်းၼုမ်ႇ ဢႃယု 18 ပီ ထိုင် 27 ပီ ၸိူဝ်းၼႆႉၸိုင် ပလိၵ်ႈမၢၼ်ႈတင်း ပလိၵ်ႈၶႄႇ တိုၼ်းဢမ်ႇပၼ်လတ်းၶၢမ်ႈၵႂႃႇမႃးယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈၽူႈတွႆႇႁွၵ်ႈဝႃႈ – “ၵူၼ်းၸႂ်ႉပပ်ႉလႅင် ၸူဝ်ႈၶၢဝ်း တႃႇၶၢမ်ႈလႅၼ်လိၼ် ၼႆႉ ယၢမ်းလဵဝ် ပေႃးပဵၼ်ၵူၼ်းၼုမ်ႇၼႆ လတ်းၶၢမ်ႈၵႂႃႇမႃးဢမ်ႇလႆႈယဝ်ႉ ပလိၵ်ႈဢၼ်ယူႇတႂ်ႈသိုၵ်းမၢၼ်ႈ ႁႄႉႁၢမ်ႈၵူၺ်းဢမ်ႇၵႃး ပလိၵ်ႈမိူင်းၶႄႇၵေႃႈ ႁႄႉႁၢမ်ႈဢမ်ႇပၼ်လတ်းၶၢမ်ႈမိူၼ်ၵၼ်။ ပေႃးမီးတၢင်းလူဝ်ႇႁႅင်းၼႃႇ တေလတ်းၶၢမ်ႈၼႆ တေလႆႈယွၼ်းဝႂ်ႁပ်ႉႁွင်း တီႈၽူႈမီးပုၼ်ႈၽွၼ်းယဝ်ႉ ၸင်ႇတေလတ်း ၶၢမ်ႈ ၵႂႃႇမႃးလႆႈ”- ဝႃႈၼႆ။

ဢိင်ၼိူဝ် လွင်ႈၼႆႉ ယွၼ်ႉႁႅင်းသိုၵ်းမၢၼ်ႈ လူတ်းယွမ်း ဢမ်ႇမီးႁႅင်းသိုၵ်း တႃႇသိုပ်ႇၽွင်းငမ်းဝၢၼ်ႈမိူင်း သေၵူၺ်းဢမ်ႇၵႃး ယွၼ်ႉသုမ်းပၢင်တိုၵ်းတင်းၼမ်လႄႈ လူဝ်ႇႁႅင်းသိုၵ်းဝႆႉ ၾၢႆႇသိုၵ်းမၢၼ်ႈ ၸင်ႇဢုပ်ႇဢူဝ်းတူၵ်းလူင်းတင်း ၽူႈမီးပုၼ်ႈၽွၼ်းၾၢႆႇမိူင်းၶႄႇသေ ၸင်ႇႁႄႉႁၢမ်ႈ။ ပိူင်လူင်တႄႉ ၼင်ႇႁိုဝ် ၵူၼ်းၸိူဝ်းပႃးသဵၼ်ႈၸိုဝ်ႈ တႃႇႁၢပ်ႇထၢမ်းၵၢၼ်သိုၵ်း တေဢမ်ႇပၢႆႈဢွၵ်ႇၼွၵ်ႈမိူင်းၼႆ – ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

မိူၼ်ၼႆ ၼင်ႇၵဝ်ႇ တီႈၶူဝ်မိုတ်ႈၵိုဝ်းမၢႆ (1) လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) ၵေႃႈ ၼႂ်းသွင် သၢမ်ဝၼ်းၼႆႉ ၵူၼ်းမိူင်းႁူမ်ႈတုမ် ၶဝ်ႈဢွၵ်ႇၵႂႃႇမႃးဢေႇလူင်းႁႅင်း – ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ၼင်ႇၼႆ။

“သွင်သၢမ်ဝၼ်းမႃးၼႆႉ ၵူၼ်းၵႂႃႇမႃး တီႈၶူဝ်မိုတ်ႈၵိုဝ်းမၢႆ 1 ၼႆႉ ဢေႇလူင်းႁႅင်းၶႃႈဢေႃႈ။ တီႈပွၵ်ႉၶႃႈၶဝ်ယူႇၼႆႉ လႆႈပၼ်ငိုၼ်း ၸၢင်ႈၵူၼ်းၵႂႃႇႁဵတ်းသိုၵ်းမၢၼ်ႈၼႆႉ မီး 2 ပွၵ်ႈယဝ်ႉ။ 1 ပွၵ်ႈလႂ် လႆႈပၼ် 1,000 ဝၢတ်ႇ။ ယဝ်ႉၵေႃႈ လႆႈၸၢင်ႈၵူၼ်းၵႂႃႇႁဵတ်းသိုၵ်း 1 ၵေႃႉလႂ် လႆႈပၼ် 120,000 ဝၢတ်ႇ”- ဝႃႈၼႆ။

ယွၼ်ႉပိူင်ႁၢပ်ႇထၢမ်းၵၢၼ်သိုၵ်း ဢၼ်သိုၵ်းမၢၼ်ႈ ပိုၼ်ၽၢဝ်ႇၼႆႉသေ ႁဵတ်းႁႂ်ႈၵူၼ်းၼုမ်ႇ ၼႂ်းမိူင်းမၢၼ်ႈ မိူင်းတႆး ပၢႆႈ ဢွၵ်ႇၼွၵ်ႈမိူင်းၼမ် ၵမ်ႈၽွင်ႈ လႆႈၶၢတ်ႇတိုဝ်းတၢင်းၵၢၼ်ႁဵၼ်း၊ လႆႈႁၢမ်ႈသုၼ်ႇတႃႇၵႂႃႇၶိုၼ်ႈ ႁဵၼ်းၼွၵ်ႈမိူင်းလႄႈ တႃႇ ႁႃၵိၼ်လဵင်ႉတွင်ႉ ၸိူဝ်းၼႆႉၵူၺ်းဢမ်ႇၵႃး ၵူၼ်းမိူင်းထုၵ်ႇတီႉၺွပ်းႁၢပ်ႇထၢမ်း ၵၢၼ်သိုၵ်းသေ လႆႈၶဝ်ႈပၢင်တိုၵ်းလူႉတၢႆၵေႃႈ မီးတင်းၼမ်ယဝ်ႉ ၵူၼ်းၼုမ်ႇ ဢၼ်တိုၵ်ႉၵိုတ်းယူႇ ၼႂ်းမိူင်း ၵမ်ႈၼမ် ဢွၼ်မႆႈၸႂ် ၵူဝ်လႆႈႁၢပ်ႇၵၢၼ်သိုၵ်း။