ၸွမ်းၼင်ႇ ၼႂ်းပိုၼ်ႉတီႈ တပ်ႉသိုၵ်းၵဝ်ႈၵၢင်ႉ ၵုမ်းၵမ်ဝႆႉ ၼႂ်းၸႄႈဝဵင်းမိူင်းယႆၼႆႉ ၶဝ်ဢွၼ်ႁူဝ်ပိုတ်ႇပၢင်တေႃႇလွင်းသေ ႁဵတ်းႁႂ်ႈၵူၼ်းမိူင်းမႆႈၸႂ်လွင်ႈႁူမ်ႇလူမ်ႈလႄႈ ၵူဝ်ဢၵျၢင်ႉတၢင်းယၢမ်းလူႉ ဝႃႈၼႆ။

တႄႇဢဝ် ဝၼ်းတီႈ 09/02/2025 ၼႆႉမႃး သိုၵ်းၵဝ်ႈၵၢင်ႉ MNDAA ဢွၼ်ႁူဝ်ပိုတ်ႇပၢင်တေႃႇလွင်း တီႈဝၢၼ်ႈလူင် ဝၢၼ်ႈပၢင်ႇၺွင်ႇ ၼႂ်းဢိူင်ႇႁူဝ်ယ ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းမိူင်းယႆ လၢတ်ႈၽူႈတွႆႇႁွၵ်ႈဝႃႈ – “သိုၵ်းၵဝ်ႈၵၢင်ႉ ပိုတ်ႇၶႃႈဢေႃႈ။ ပိုတ်ႇဝႆႉ 2 ဢွင်ႈတီႈ ဝၢၼ်ႈလူင်တင်း ဝၢၼ်ႈပၢင်ႇၺွင်ႇ။ မိူဝ်ႈလဵဝ်တႄႉ တိုၵ်ႉမီးၵူၼ်းသိုၵ်းၶဝ်လဵၼ်ႈဝႆႉၵူၺ်း။ ၼႂ်းပၢင်တေႃႇ လွင်းၼၼ်ႉ မီးသင်လၢႆလၢႆၼႆ ႁဝ်းၶႃႈ ပႆႇလႆႈႁူႉၸႅင်ႈလႅင်း ယွၼ်ႉပဵၼ်ဝႆႉၼႂ်းၵႄႈသိုၵ်းလႄႈ ၵူၼ်းမိူင်းတႄႉ ပႆႇႁူႉၵၼ်ၼမ်”- ဝႃႈၼႆ။

သိုပ်ႇလၢတ်ႈဝႃႈ – “ထႅင်ႈၾၢႆႇၼိုင်ႈၵေႃႈ ပၢင်တိုၵ်းတိုၵ်ႉဝၢႆးၵူၺ်း ၵူၼ်းမိူင်းတႄႉ ပႆႇမီးငိုၼ်းၵၼ် ပႆႇႁတ်းလဵၼ်ႈၵေႃႈ ပဵၼ်လႆႈ။ ဢၼ်ႁဝ်းၶႃႈမႆႈၸႂ်တႄႉ ၵူဝ်ဢၵျၢင်ႉတၢင်းယၢမ်ႈၵူၼ်းမိူင်းႁဝ်းလူႉသေဢမ်ႇၵႃး မႆႈၸႂ်ပႃးလွင်ႈႁူမ်ႇလူမ်ႈ ၸိူဝ်းၼႆႉဢေႃႈ”- ဝႃႈၼႆ။

ပၢင်တေႃႇလွင်း ဢၼ်သိုၵ်းၵဝ်ႈၵၢင်ႉ ဢွၼ်ပိုတ်ႇတီႈဢိူင်ႇႁူဝ်ယၼႆႉ တေပိုတ်ႇႁိုင် မွၵ်ႈႁိုဝ်တႄႉပႆႇႁူႉ ဝႃႈၼႆ။  

ဢိူင်ႇႁူဝ်ယၼႆႉ တင်းမူတ်း မီး 20 ဝၢၼ်ႈ မီးၾၢႆႇႁွင်ႇဝဵင်းမိူင်းယႆ ယၢၼ်ဝဵင်း 5 လၵ်း ဢၼ်ယူႇတီႈ သိုၵ်း ၵဝ်ႈၵၢင်ႉၶဝ် ၵုမ်းၵမ်ဝႆႉတႄႉ တင်းမူတ်းမီး 15 ဝၢၼ်ႈ။ ယဝ်ႉၵေႃႈ သိုၵ်းဝႃႉသမ်ႉ ၵုမ်းၵမ်ဝႆႉ ဝၢၼ်ႈၼႃးမူၼ်း။ ဝၢၼ်ႈၼွင်လူမ်ႇ၊ ဝၢၼ်ႈၵုင်းၵေႃႇ၊ ဝၢၼ်ႈၾႃႉၽႃႇ၊ ဝၢၼ်ႈၼႃးလၢင်း ၸိူဝ်းၼႆႉသမ်ႉ သိုၵ်းမၢၼ်ႈ ၵုမ်းၵမ်ဝႆႉ။

တႄႇဢဝ် ဝၼ်းတီႈ 07/07/2024 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းၵဝ်ႈၵၢင်ႉ ဢဝ်ဢဵၼ်ႁႅင်း တင်းၼမ် ၶဝ်ႈၵုမ်းၵမ် ၸွမ်းသၢပ်ႇဝဵင်းမိူင်းယႆ တႄႇဢဝ်ၾၢႆႇႁွင်ႇဝဵင်းထိုင် ၾၢႆႇတူၵ်းဝဵင်း ဝႃႈၼႆ။