ထဝ်ႈၸၢႆး ဢႃယု 77 ပီ ၵေႃႉၼိုင်ႈ ၺႃးပေႃႉထုပ်ႉၶႃႈတၢႆ ပႅတ်ႈတူၵ်းၼမ်ႉႁွင်ႉ ၼႂ်းၵႄႈမိူင်းငေႃႉ – ၵျွၵ်ႉမႄး ဝႃႈၼႆ။  

ဝၼ်းတီႈ 05/02/2025 ပူၼ်ႉမႃးၼႆႉ ထူပ်းႁၼ် တူဝ်တၢႆ လုင်းသၢင်ႇၶုၼ်ႇ ဢႃယု 77 ပီ တီႈၼႂ်းၼမ်ႉသိမ်ႇ ၼႂ်းၵႄႈမိူင်းငေႃႉ – ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ထဝ်ႈၸၢႆးၼႆႉ ႁၢႆတူဝ်ၵႂႃႇ ၸဵမ်မိူဝ်ႈဝၼ်းတီႈ 25 လိူၼ်ပူၼ်ႉ မၼ်းၸၢႆး တေ ဢၢၼ်းၵႂႃႇသိုဝ်ႉၶိူင်ႈၸၢၵ်ႈလုၺ်ၼဵင်ႈ ဝႃႈၼႆ။

ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ –“လႆႈႁူႉဝႃႈ လုင်းသၢင်ႇၶုၼ်ႇၼႆႉ ပႃးၸွၵ်းငိုၼ်းသေ တေ ဢၢၼ်းၵႂႃႇသိုဝ်ႉၶိူင်ႈၸၢၵ်ႈလုၺ်ၼဵင်ႈ မၼ်းၸၢႆး လုၵ်ႉတီႈဝၢၼ်ႈဢွၵ်ႇႁိူၼ်းၵႂႃႇၵေႃႉလဵဝ် ၵႂႃႇ တၢင်းၼမ်ႉမင်း မိူင်းငေႃႉ မိူဝ်ႈဝၼ်းတီႈ 25/01/2025 ၼၼ်ႉ။ ဝၢႆးၼၼ်ႉ ႁၢႆတူဝ်ၵႂႃႇတႃႇၶၢဝ်းတၢင်း 10 ဝၼ်းပၢႆ ပီႈၼွင်ႉၸိူဝ်ႉၶိူဝ်းမႆႈၸႂ်သေ ဢွၼ်ၵၼ်ၶႆႈႁႃ ၸင်ႇႁၼ်တူဝ်တၢႆလုင်းသၢင်ႇၶုၼ်ႇၼႆႉ တီႈၼႂ်းၼမ်ႉ သိမ်ႇၼၼ်ႉၶႃႈဢေႃႈ”- ဝႃႈၼႆ။

လုင်းသၢင်ႇၶုၼ်ႇၼႆႉ ပဵၼ်ၵူၼ်းဝၢၼ်ႈတူၼ်ႈႁိူၵ်ႈ ဢိူင်ႇႁူးသူၼ် ၸႄႈဝဵင်းၵျွၵ်ႉမႄး မီးလုၵ်ႈလၢင်းဝႆႉ 5 ၵေႃႉ ဝႃႈၼႆ။

“ၵမ်ႈၽွင်ႈ လၢတ်ႈဝႃႈ တီႈတူဝ်လုင်းသၢင်ႇၶုၼ်ႇၼၼ်ႉ မီးႁွႆးပေႃႉထုပ်ႉဝႆႉၼႆဢေႃႈ။ မၢင်ၸိူဝ်း လၢတ်ႈဝႃႈ လႆႈႁၼ်သိုၵ်းတဢၢင်း TNLA ႁွင်ႉၶိုၼ်ႈၵႃး ၽူဝ်းဝီးသီလမ်ၵႂႃႇ မိူဝ်ႈၽွင်းလုင်းသၢင်ႇၶုၼ်ႇ မႃးပႂ်ႉၶိုၼ်ႈၵႃး တီႈၶူဝ်ႁၢင်ႁွမ်း တၢင်းၽႄၶဝ်ႈမိူင်းငေႃႉၼၼ်ႉၼႆဢေႃႈ”- ၵူၼ်းပိုၼ်ႉတီႈ ဝဵင်းၵျွၵ်ႉမႄး သိုပ်ႇလၢတ်ႈၼႄ ၼင်ႇၼႆ။

ဢိင်ၼိူဝ် လွင်ႈၼႆႉ ပီႈၼွင်ႉၸမ်ၸႂ် လုင်းသၢင်ႇၶုၼ်ႇ လၢတ်ႈဝႆႉတီႈသိုဝ်ႇၶၢဝ်ႇ Shan State Channel News ၼၼ်ႉဝႃႈ – ဝၢႆးထူပ်းႁၼ်တူဝ်တၢႆ လုင်းသၢင်ႇၶုၼ်ႇယဝ်ႉ ၾၢႆႇၸုမ်းသိုၵ်း TNLA ၶဝ် မႃးႁူပ်ႉပီႈၼွင်ႉၸိူဝ်ႉၶိူဝ်းသေ လၢတ်ႈဝႃႈယႃႇပၼ်ၶၢဝ်ႇဢွၵ်ႇၵႂႃႇတၢင်းလႂ် တေၵူတ်ႇထတ်း လွင်ႈပိူင်ပဵၼ်လွင်ႈတႄႉမၼ်း ၵွၼ်ႇ။ ၵူၺ်းၵႃႈ တေႃႇထိုင်ဝၼ်းမိူဝ်ႈ ၼႆႉ ဢမ်ႇၵပ်းသိုပ်ႇပွင်ႇၶၢဝ်ႇသင်မႃး ယဝ်ႉၵေႃႈ ဢမ်ႇမႃးဢဝ်ပုၼ်ႈ ၽွၼ်းပၼ်သင် – ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇ ၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA ၵေႃႈ ဢမ်ႇလႆႈ။

ယၢမ်းလဵဝ် ၵူၼ်းမိူင်းတႄႉ ဢွၼ်ၵၼ်မႆႈၸႂ်ဝႆႉ သင်ၸုမ်းသိုၵ်း တေၸႂ်ႉလၢႆးမိူၵ်ႈမႂ်ႈ ၸိူင်ႉၼႆသေ ၽွင်းငမ်းဝၢၼ်ႈမိူင်းၵႂႃႇၼႆၸိုင် လွင်ႈႁူမ်ႇလူမ်ႈသၢႆၸႂ်တႄႉ ဢမ်ႇမီးယဝ်ႉ – ၵူၼ်းပိုၼ်ႉတီႈ ဝဵင်းၵျွၵ်ႉမႄးလၢတ်ႈ။

ၵိင်ႇၽႄၸႄႈဝဵင်းမိူင်းငေႃႉၼႆႉ ယူႇတီႈ တပ်ႉသိုၵ်းတဢၢင်း TNLA ပိုၼ်ၽၢဝ်ႇယိုတ်းၵုမ်းလႆႈဝႆႉ ၸဵမ်မိူဝ်ႈဝၼ်းတီႈ 01/01/2024 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်။