ၵူၼ်းလွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ ၵျႃးၽႅၼ်ႉ လိူင်ႇၼမ်တီႈဝဵင်းမိူင်းယႆ ၸိုင်ႈတႆးပွတ်းႁွင်ႇ သိုၵ်းမၢၼ်ႈၶဝ်ႈတီႉၺွပ်း လႆႈၵႂႃႇ 80 ပၢႆ ပႃးၵူၼ်းမိူင်းဝႅတ်ႉၼၢမ်ႊ Vietnam လႄႈ ၵူၼ်းမိူင်းၶႄႇ ၵမ်ႈၼမ်။

ဝၼ်းတီႈ 5 /2/2025 ထိုင် 7/2/2025 ၼႆႉ သိုၵ်းမၢၼ်ႈ ပိုၼ်ၽၢဝ်ႇဝႃႈ ၶဝ်ႈယိုဝ်းၸုမ်းၵျႃးၽႅၼ်ႉ 5 တီႈ တၢင်းထုင်ႉမိူင်းႁႃႉ ၼႂ်းၵႄႈမိူင်းယႆလႄႈ မိူင်းၵၢဝ်။ တီႉၺွပ်းလႆႈ ၵူၼ်းလွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ ၵျႃးၽႅၼ်ႉ 80 ပၢႆ ဝႃႈ ၼႆ။

“ၶဝ်ဢဝ်မၢၵ်ႇမႃးပွႆႇဢွၼ်တၢင်းယဝ်ႉ ၸင်ႇထူဝ်းသိုၵ်းမႃး သွင်တၢင်း။ လုၵ်ႉတၢင်းမိူင်းၵၢဝ်မႃး ၸုမ်းၼိုင်ႈလႄႈ လုၵ်ႉတၢင်းမိူင်းယႆမႃး ၸုမ်းၼိုင်ႈ၊ မိူဝ်ႈတႄႇမၼ်း ထၢင်ႇဝႃႈ ပဵၼ်ပၢင်တိုၵ်းၵၼ်တင်း သိုၵ်းၵဝ်ႈၵၢင်ႉ ၶဝ်ၼႆ။ ၶႄႇၶဝ်ၵေႃႈ မီးငိုၼ်းလႄႈ ၶဝ်ၵေႃႈယိပ်းၵွင်ႈ၊ ၶဝ်ယိုဝ်းၵၼ်ယူႇၵမ်ႉၼင်ႇၵဝ်ႇဢေႃႈ မီးၵူၼ်းမၢတ်ႇၸဵပ်းပႃးၼႆ”-  ၽူႈၸၢႆး ဢႃယုမွၵ်ႈ 40 ပီ ၵူၼ်းပိုၼ်ႉတီႈ လၢတ်ႈၼင်ႇၼႆ။

ၵဵဝ်ႇလွင်ႈၼႆႉ ၾၢႆႇတင်းသိုၵ်းမၢၼ်ႈ ပိုၼ်ၽၢဝ်ႇမိူဝ်ႈ 7/2/2025 ၼၼ်ႉဝႃႈ ၼႂ်းၶၢဝ်းတၢင်း 3 ဝၼ်း သိုၵ်းမၢၼ်ႈ ၺွပ်း ၵူၼ်းၼႂ်းႁူင်းၵျႃးၽႅၼ်ႉ တီႉလႆႈၵူၼ်းၸၢႆးမိူင်းၶႄႇ 27 ၵေႃႉ ၊ ယိင်း 2 ၵေႃႉ ၊ ၼၢင်းယိင်း ၵူၼ်းမိူင်း Vietnam 18 ၵေႃႉ ၊ ၵူၼ်းမိူင်းမၢၼ်ႈ ၸၢႆး 5 ၵေႃႉ ၊ ယိင်း 29 ၵေႃႉ တင်းမူတ်း 81 ၵေႃႉ ၵူတ်ႇထတ်းယဝ်ႉသေ ၵူၼ်းမိူင်း Vietnam လႄႈ ၵူၼ်းမိူင်းၶႄႇတႄႉ သူင်ၶိုၼ်းမိူင်းၽႂ်မိူင်းမၼ်းယဝ်ႉ ဝႃႈၼႆ။

ၵူၼ်းပိုၼ်ႉတီႈ သိုပ်ႇလၢတ်ႈထႅင်ႈဝႃႈ – “ၶဝ်ႈယိုဝ်း တီႈႁူင်းၵျႃးၽႅၼ်ႉ 4 ႁူင်း ။ ၶဝ်တီႉလႆႈၵူၼ်း တီႈ 2 ႁူင်း။ ႁိမ်းႁွမ်း ၼၼ်ႉ မီးႁူင်းၵျႃးၽႅၼ်ႉ ၼမ်ၼႃႇ။ ၵျႃးၽႅၼ်ႉၼႆႉ ၶဝ်ဢမ်ႇယူႇတီႈလဵဝ် ႁိုင်ႁိုင် ၊ ၵမ်းၵမ်းၶၢႆႉ ၊ မိူဝ်ႈဢွၼ်တၢင်းတႄႉ ၶဝ်ယူႇတင်းႁူင်းဢုတ်ႇ ၊ ၵမ်းၼႆႉ ၶဝ်ဢမ်ႇယူႇယဝ်ႉ ၊ ၶဝ်ဢဝ်မႆႉသၢင်ႈႁဵတ်း ႁူင်းယႂ်ႇယႂ်ႇသေယူႇ။ မၢင်ၸိူဝ်းၵေႃႈ မီးတၢင်းမိူင်းၵၢဝ် တၢင်းၼၼ်ႉၵေႃႈ မီးႁူင်းၵျႃးၽႅၼ်ႉ ဢၼ်ၵဝ်ႇမၼ်း”- ဝႃႈၼႆ။

ၽွင်းသိုၵ်းမၢၼ်ႈၶဝ်ႈယိုဝ်း ႁူင်းၵျႃးၽႅၼ်ႉ တီႈဝၢၼ်ႈၼွင်ႁၢၼ် (နောင်ဟန် ) ထုင်ႉမိူင်းႁႃႉ ၼႂ်းၸႄႈဝဵင်းမိူင်းယႆၼၼ်ႉ ပိုတ်းယိုဝ်းၵၼ်တင်း ၸုမ်းႁူမ်ႇလူမ်ႈၵျႃးၽႅၼ်ႉသေ တီႉၺွပ်းၵႂႃႇ 5 ၵေႃႉ၊ ၵွင်ႈ 6 လဝ်း၊ တူဝ်တၢႆ  2 ၵေႃႉၼႆ သိုၵ်းမၢၼ်ႈပိုၼ်ၽၢဝ်ႇ ဝႆႉၼင်ႇၼႆ။

ၾၢႆႇတင်းသိုၵ်းမၢၼ်ႈ ယိုတ်းလႆႈပႃး မိုဝ်းထိုဝ် ဢၼ်ၸႂ်ႉၼႂ်းၵၢၼ် လွၵ်ႇလႅၼ်ၵိၼ်ငိုၼ်း (260) လုၵ်ႈ၊ ၶွမ်ႊပိဝ်ႊတိူဝ်ႊ (120) လုၵ်ႈ၊ Star Link wifi (7) ၶျုတ်ႉ ၊ တူႈၵဵမ်းပႃ 5 လုၵ်ႈ၊ ၸၢၵ်ႈၾႆး ဢိၵ်ႇ ရူတ်ႉၵႃး 3 လမ်း ဝႃႈၼႆ။