မိူဝ်ႈၼႆႉ ဝၼ်းတီႈ 07/02/2025 ၵူၼ်းမိူင်းပိုၼ်ႉတီႈ ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ဢွၼ်ၵၼ် ပူၵ်းတုင်းၸိူဝ်ႉၸၢတ်ႈၸိုင်ႈတႆး တီႈၼႃႈႁိူၼ်းၽႂ်မၼ်း တႃႇမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 78 ပီ ဝႃႈၼႆ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ငဝ်းလၢႆး ၶႂ်ႈပဵၼ်သင်ပဵၼ် လွင်ႈႁဝ်းပူၵ်းတုင်း ၸိူဝ်ႉၸၢတ်ႈ ၼႆႉ မၼ်းဢမ်ႇၵႂႃႇတုမ်ႉတိူဝ်ႉၽႂ်။ ပေႃးႁဝ်းၼပ်ႉသွၼ်ႇမႃး ပီယၢဝ်းၶၢဝ်းႁိုင်ၸိုင် မၼ်းမီးတီႈ ႁဝ်းၶဝ်ႈၸႂ်ၶတ်းၸႂ် ႁဵတ်းသၢင်ႈတူင်ႉၼိုင်မႃးၵႃႈႁိုဝ်ၼႆၼၼ်ႉၵူၺ်း။ ဢၼ်ၵူၼ်းၼမ်ႉၶမ်းႁဝ်း တူင်ႉၼိုင်မႃး ၼႂ်းဝၼ်းၸိူဝ်ႉၸၢတ်ႈၼႆႉ တႄႇမႃးပၢၼ်သိုၵ်းမၢၼ်ႈ ၼဝတ/ ၼဢၽ ဢၼ်ၶဝ်ဢမ်ႇပၼ်ႁဵတ်းၼၼ်ႉ မႃးယဝ်ႉ။ ယွၼ်ႉၼၼ်လႄႈ ႁဝ်းၶႃႈ လၵ်ႉႁဵတ်းတူင်ႉၼိုင်မႃး တင်ႈတႄႇပီ 1961-62 ၼၼ်ႉယဝ်ႉ”- ဝႃႈၼႆ။
သိုပ်ႇလၢတ်ႈဝႃႈ – “ဝၼ်းၸိူဝ်ႉၸၢတ်ႈၸိုင်ႈတႆးၼႆႉ ပဵၼ်ဝၼ်းမၵ်းမၼ်ႈၵိုၵ်းပိုၼ်းမႃး ၼႂ်းၼၼ်ႉ ပႃးၽူႈဢွၼ်ႁူဝ် ၸၢဝ်းၶိူဝ်းတင်းၼမ်လႄႈ ယၢမ်းလဵဝ် ႁဝ်းၵပ်ႉၵိၼ်း ပဵၼ်ၸိူင်ႉႁိုဝ်ၵေႃႈယႃႇ၊ ယႃႇပေလူင်လိုမ်း ဢွၼ်ၵၼ်တူင်ႉတိုၼ်ႇပူၵ်းတုင်း ႁဵတ်းသၢင်ႈၵႂႃႇ သိုဝ်ႈၽႂ်မၼ်းတႃႉ”- ဝႃႈၼႆ။
ၽွင်းၽႅၼ်ယၼ်ႇသိုၵ်း 1027 ၼၼ်ႉ ယူႇတီႈ သိုၵ်းတဢၢင်း TNLA ႁူမ်ႈတင်း သိုၵ်းၵဝ်ႈၵၢင်ႉ MNDAA တင်း သိုၵ်းရၶႅင်ႇ AA ႁူမ်ႈၵၼ် လေႃႇတိုၵ်းတပ်ႉသိုၵ်းမၢၼ်ႈ ယိုတ်းမိူင်းမႃး ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇသေ ထိုင်မႃးဝၼ်းတီႈ 19/12/2023 ၼၼ်ႉ သိုၵ်းတဢၢင်း ပိုၼ်ၽၢဝ်ႇ ယိုတ်းလႆႈတပ်ႉသိုၵ်းမၢၼ်ႈ ၸၶၢၼ်းတိတ်ႉၵူင်း ဝဵင်းၼမ်ႉၶမ်းသေ ထိုင်မႃး ဝၼ်းတီႈ 22 တႄႇပူၵ်းတုင်းၶၢဝ်လႄႈ တုင်းၸိူဝ်ႉၸၢတ်ႈတဢၢင်း ၼႂ်းဝဵင်းၼမ်ႉၶမ်းမႃး ၼႆယဝ်ႉ။
“ၵဵဝ်ႇလူၺ်ႈ ႁဝ်းၶႃႈ ပူၵ်းတုင်းၸိူဝ်ႉၸၢတ်ႈၸိုင်ႈတႆး ၼႂ်းဝၼ်းတီႈ 7 ၼႆႉ သိုၵ်းလွႆၵေႃႈ ဢမ်ႇႁၢမ်ႈသင်ၶႃႈ လွင်ႈပူၵ်းတုင်း (ၸွမ်ပိဝ်) ဝၼ်းမိူဝ်ႈၼႆႉတႄႉ တေလႆႈဝႃႈ ယွမ်းၵႂႃႇဢိတ်းၼိုင်ႈယူႇ”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈ ၼႄၼင်ႇၼႆ။
ၵဵဝ်ႇလူၺ်ႈ လွင်ႈဝၼ်းၸိူဝ်ႉၸၢတ်ႈၸိုင်ႈတႆးၼႆႉသေ ဢမ်ႇၸႂ်ႈတႃႇတႆး ၶိူဝ်းလဵဝ် ပဵၼ်ဝၼ်းၵိုၵ်းပိုၼ်း တႃႇၵူၼ်းမိူင်းတႆး ၵူႈၸၢဝ်းၶိူဝ်းယဝ်ႉ – ၶိုၼ်းသႂ် ၸႂ်ယဵၼ် ၽူႈၵေႃႇတင်ႈ ၵေႃသိုဝ်ႇၶၢဝ်ႇၽူႈတွႆႇႁွၵ်ႈလၢတ်ႈ။
“ဝၼ်းၸိူဝ်ႉၸၢတ်ႈၸိုင်ႈတႆး ဢမ်ႇၼၼ် ဝၼ်းၸိူဝ်ႉၶိူဝ်းတႆးၼႆႉ ယူႇတီႈ ႁူဝ်ပဝ်ႈ ၶွင်ႇသီႇၸိုင်ႈတႆး ဢၼ်ပဵၼ်ၶိူဝ်းတဢၢင်း (ပလွင်ႈ) ၸဝ်ႈၶုၼ်ပၢၼ်းၸိင်ႇၼႆႉ ၵေႃႉလူင်းလၢႆးမိုဝ်း မၵ်းမၼ်ႈမႃးဢိူဝ်ႈ။ ဝၼ်းၸိူဝ်ႉၸၢတ်ႈၸိုင်ႈတႆးၼႆႉ တႃႇတႆးမဵဝ်းလဵဝ်ၵူၺ်းတႄႉ ဢမ်ႇၸႂ်ႈ၊ တႃႇၵူၼ်းမိူင်းတႆးတင်းမူတ်းဢိူဝ်ႈ”- ဝႃႈၼႆ။
ယဝ်ႉၵေႃႈ တီႈဝဵင်းမူႇၸေႊ ၸိုင်ႈတႆးပွတ်းႁွင်ႇၵေႃႈ ၸတ်းႁဵတ်းပၢင်ၵႅဝ်ႈ မၢႆတွင်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 78 ပီ ဢမ်ႇၼၼ် ဝၼ်းမိူင်းတႆး တီႈႁူင်းႁေႃ ၵေႃလိၵ်ႈလၢႆး မိူၼ်ၵၼ် မီးၽူႈၶဝ်ႈႁူမ်ႈၸမ် 500 ၵေႃႉ ဝႃႈၼႆ။
လိူဝ်ၼၼ်ႉ ယူႇတီႈ တပ်ႉသိုၵ်းၸိုင်ႈတႆး RCSS လႄႈ SSPP ၵေႃႈ ၸတ်းႁဵတ်းပၢင်ၵႅဝ်ႈ မၢႆတွင်းဝၼ်း ၸိူဝ်ႉၸၢတ်ႈၸိုင်ႈတႆး ၶိုၵ်ႉယႂ်ႇမိူၼ်ၵၼ်။ RCSS သမ်ႉ ၸတ်းႁဵတ်းတီႈ ၸႄႈဝဵင်းမိူင်းပၼ်ႇ SSPP သမ်ႉ ၸတ်းႁဵတ်းတီႈဝၢၼ်ႈႁႆး ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ