ၼႂ်းလိူၼ်ၾႅပ်ႊပိဝ်ႊရီႊ 2025 ၼႆႉ ႁွင်ႈၵၢၼ်ၾၢႆႇၵုမ်းရူတ်ႉၵႃး လူင်းတီႉရူတ်ႉၵႃး ၸိူဝ်းဢမ်ႇမီးဝႂ်လၢႆႊသိၼ်ႊ ၼႂ်းၸိုင်ႈတႆးပွတ်းဢွၵ်ႇ ႁဵတ်းႁႂ်ႈၵူၼ်းမိူင်း ၵႂႃႇမႃးယၢပ်ႇ။ ၵူၼ်းၸိူဝ်းလူဝ်ႇၵႃႉလူဝ်ႇၶၢႆၵေႃႈ ဢမ်ႇထၢင်ႈႁၢင်ႈ။ ဢၼ်ပၼ်ၶႂၢင်ႉ ဢ ၼုယၢတ်ႈဢဝ်ရူတ်ႉၵႃး ဢမ်ႇမီးဝႂ်ၶဝ်ႈၵေႃႈပဵၼ်ၶဝ်၊ ယၢမ်းလဵဝ် ဢၼ် လမ်းတီႉၶိုၼ်းၵေႃႈ ပဵၼ်ၶဝ်။ မိူၼ်တၢင်းၶႂ်ႈမိပ်ႇငႅၼ်းၵမ်ၵိၼ်းၵူၼ်းမိူင်းၵူၺ်း ဝႃႈၼႆ။    

ၼႂ်းလိူၼ်ၵျႅၼ်ႊၼိဝ်ႊရီႊ 2025 ၼၼ်ႉ ပလိၵ်ႈၾၢႆႇၵုမ်းရူတ်ႉၵႃး ၸႄႈတွၼ်ႈၵဵင်းတုင် ၸတ်းပၢင်ၵုမ်ယႂ်ႇသေ ဝၢင်း ၽႅၼ်တႃႇၽဵဝ်ႈရူတ်ႉၵႃး ၸိူဝ်းဢမ်ႇမီးဝႂ်လၢႆႊသိၼ်ႊ။ ဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ ဝၼ်း တီႈ 01/02/2025 ၼႆႉ တေတႄႇၵူတ်ႇထတ်းႁႄႉႁၢမ်ႈရူတ်ႉၵႃးလႄႈ ရူတ်ႉၶိူင်ႈ ၸိူဝ်းဢမ်ႇမီးဝႂ် ၼႆယဝ်ႉ ။

ဝၢႆးပိုၼ်ၽၢဝ်ႇယဝ်ႉ ပလိၵ်ႈမၢၼ်ႈ ၾၢႆႇၵုမ်းရူတ်ႉၵႃး ၼႂ်းၸိုင်ႈတႆးပွတ်းဢွၵ်ႇ မိူၼ်ၼင်ႇ – ၵဵင်းတုင်၊ မိူင်းၽျၢၵ်ႈ၊ တႃႈၶီႈလဵၵ်း၊ မိူင်းသၢတ်ႇ၊ မိူင်းတူၼ် ၸိူဝ်းၼႆႉ တႄႇလူင်းပိုၼ်ႉတီႈၵူတ်ႇထတ်း။

ၵူၼ်းမိူင်း ၸိူဝ်းပႆႇလႆႈႁဵတ်းဝႂ်လၢႆႊသိၼ်ႊ ဢွၼ်ၵၼ်ၵူဝ်ၺႃးယိုတ်းရူတ်ႉၵႃး။ ဝၼ်းတီႈ 03/02/2025 ဝၢႆးဝၼ်း 3 မူင်းထိုင် ၵၢင်ၶမ်ႈ 8 မူင်းပၢႆၼၼ်ႉ ပလိၵ်ႈၾၢႆႇၵုမ်းရူတ်ႉၵႃးဝဵင်းတႃႈၶီႈလဵၵ်း ႁႃသွၵ်ႈတဝ် ၸွမ်းႁၢၼ်ႉဝၢင်းၶၢႆၵႃး Car Showroom ၸိူဝ်းၼႆႉ။ မၢင်ႁၢၼ်ႉၵေႃႈ ၺႃးယိုတ်းၵႃးၵႂႃႇၵေႃႈမီး။ ပဵၼ်ၵၢင် ၶမ်ႈၵၢင်ၶိုၼ်းလႄႈ ယိုတ်းၵႂႃႇလၢႆလမ်းၵေႃႈ ၵူၼ်းပိုၼ်ႉတီႈ ဢမ်ႇၸၢင်ႈယိုၼ်ယၼ်။

ဢၼ်သွၵ်ႈတဝ်ႁႃ ယိုတ်းဢဝ်ရူတ်ႉၵႃး ၼႂ်းတႃႈၶီႈလဵၵ်းၼႆႉ ဢမ်ႇၸႂ်ႈၸုမ်းပလိၵ်ႈ ၼႂ်းတႃႈၶီႈလဵၵ်းၵူၺ်း။ ပဵၼ်ၽူႈမီးၸၼ်ႉၼႂ်းပလိၵ်ႈမၢၼ်ႈ ဢၼ်လုၵ်ႉမႃးတၢင်းဝဵင်းၵဵင်းတုင် ၸိူဝ်းၼႆႉ မႃးဢွၼ်ႁူဝ် ၼမ်းၼႃႈသေ လူင်းၵူတ်ႇထတ်း။ ပေႃးပဵၼ်ပလိၵ်ႈပိုၼ်ႉတီႈၵူၺ်းတႄႉ ဢမ်ႇသူႈႁဵတ်းၵၢၼ်သင်။ မိူဝ်ႈလဵဝ် ဢၼ်တေၸၢင်ႈၺႃးယိုတ်းၵေႃႈ ပဵၼ်ရူတ်ႉ ၵႃး၊ ရူတ်ႉၶိူင်ႈတႄႉ ပႆႇပေႃးၺႃးထတ်း ၵူၼ်းပိုၼ်ႉ တီႈလၢတ်ႈၼင်ႇၼႆ။

ၸဝ်ႈၶွင် Car Showroom ၸိူဝ်းမီးၼႂ်းဝဵင်းတႃႈၶီႈလဵၵ်းၼႆႉ ဢွၼ်ၵၼ်မႆႈၸႂ် ၵူဝ်ၺႃးၶဝ်ႈသွၵ်ႈထတ်း ယိုတ်းၼႆသေ ၸိူဝ်းပိၵ်ႉဝႆႉၵေႃႈမီး။ မိူၼ်ၼင်ႇ ႁၢၼ်ႉၶၢႆၵႃး IC Car Showroom ဢၼ်မီးႁိမ်းႁူင်းႁႅမ်း ရီႇၵျီးၼႃး ၸိူဝ်းၼႆႉၵေႃႈ ပလိၵ်ႈမၢၼ်ႈၶဝ်ႈတဝ်သေ ယိုတ်းၵႃးဢၼ်ဢမ်ႇမီးဝႂ်ၵႂႃႇ။ လိူဝ်ၼၼ်ႉ တေ ဢဝ်လိူင်ႈ ၸဝ်ႈၶွင်ႁၢၼ်ႉထႅင်ႈ။ ၼႂ်းတႃႈၶီႈလဵၵ်းၼႆႉ ၵႃးဢမ်ႇမီးဝႂ် တိုၼ်းမီးမႃးႁိုင်ယဝ်ႉ၊ ပလိၵ်ႈမၢၼ်ႈ ၸင်ႇႁႃမႃးတူင်ႉတိုၼ်ႇ တႃႇတီႉၺွပ်းယၢမ်းလဵဝ်။ မိူၼ်တၢင်း ႁႃလၢႆးထႆၵိၼ်ငိုၼ်း တီႈၵူၼ်းမိူင်း ၵူၺ်းၼႆ ၵူၼ်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄၼႆ –

“ႁႂ်ႈၶဝ်လႄႇႁႃတီႉၺွပ်း ၵူႈလမ်းတႄႉ ဢမ်ႇၸႂ်ႈၼင်ႇၵဝ်ႇ ၶဝ်တေလူင်းၵူတ်ႇထတ်း ၼႂ်းႁၢၼ်ႉၶၢႆရူတ်ႉၵႃး ဢၼ်ဢမ်ႇမီးဝႂ်ၶႂၢင်ႉၸိူဝ်းၼၼ်ႉလႄႈ ၶွမ်ႊမၼီႊၶၢႆရူတ်ႉၶၢႆၵႃး ၸိူဝ်းၼႆႉၵူၺ်း။ ပိူင်လူင်မၼ်း ၶဝ်တေႁႃတီႉရူတ်ႉၵႃး ဢၼ်ဢမ်ႇမီးဝႂ်သင်သေ ဝၢင်းၶၢႆဝႆႉ ၸိူဝ်းၼႆႉ။ ၶဝ်တေဢၢၼ်းသွၵ်ႈ ႁၢၼ်ႉသႅၼ်း ယႂ်ႇ ၶွမ်ႊပၼီႊသႅၼ်းယႂ်ႇ ၶဝ်ၸိူဝ်းၼႆႉ။ ၸွမ်းတႃႈၸွမ်းတၢင်းတႄႉ ပႆႇပေႃးထတ်းၵႃႈႁိုဝ်။ ပိူင်လူင်မၼ်း ၶဝ်ၶႂ်ႈလႆႈငိုၼ်းလႄႈ လူင်းထတ်းၵူၺ်း”- ဝႃႈၼႆ။  

ပေႃးမႃးတူၺ်း ၵူၼ်းၶီႇရူတ်ႉၵႃး ဢမ်ႇမီးဝႂ်ၶွၼ်ႇလၢႆႊသိၼ်ႊၼႆႉ ဢမ်ႇၵွမ်ႉၵူၼ်းပိုၼ်ႉတီႈၵူၺ်း။ ၸဵမ်ဢဝ်ၽူႈၵွၼ်းတပ်ႉပိဝ်ႇႁႃႇလႄႈ ၽူႈမီးၸၼ်ႉသိုၵ်းမၢၼ်ႈ ပလိၵ်ႈမၢၼ်ႈၸိူဝ်းၵေႃႈ ဢွၼ်ၵၼ်ၶီႇၵႃး ဢၼ်ဢမ်ႇမီးဝႂ်။ ပေႃးၶဝ်ၼင်ႇၵၼ်တႄႉ ဢမ်ႇၵူတ်ႇထတ်းသင် – ၵူၼ်းပိုၼ်ႉတီႈလၢတ်ႈၼင်ႇၼႆ။

ၵူၼ်းမိူင်း ဝဵင်းတႃႈၶီႈလဵၵ်း လၢတ်ႈဝႃႈ – ရူတ်ႉၵႃး တီႈတႃႈၶီႈလဵၵ်းၼႆႉ မွၵ်ႈ 95 % ၼႆႉ ပဵၼ်ရူတ်ႉၵႃး ဢမ်ႇမီးဝႂ်ၶွၼ်ႇ။ ပဵၼ်ရူတ်ႉၵႃး ဢၼ်တေႃႉဢဝ်တၢင်းၾင်ႇထႆးမႃးလွၼ်ႉလွၼ်ႉ။ လႆႈလတ်းၵဵတ်ႉ/ လၢၼ်ႇပဵၼ်တၢင်းၵၢၼ်၊ လႆႈပၼ်ငိုၼ်း ၾၢႆႇၵဵပ်းၶွၼ်ႇသိုၵ်းမၢၼ်ႈ ပလိၵ်ႈမၢၼ်ႈယူႇ – ဝႃႈၼႆ။

မိူၼ်ၼင်ႇတီႈ ဝဵင်းမိူင်းသၢတ်ႇၵေႃႈ ယၢမ်းလဵဝ် ၵူၼ်းမိူင်းဢမ်ႇႁတ်းႁေႃႈရူတ်ႉၵႂႃႇမႃးထၢင်ႇႁၢင်ႈ။ မိူဝ်ႈဢွၼ်တၢင်းၵေႃႈ ႁွင်ႈၵၢၼ်ၾၢႆႇၵုမ်းရူတ်ႉၶိူင်ႈ၊ ရူတ်ႉၵႃးၸိူဝ်းၼႆႉ ယၢမ်ႈပိုၼ်ၽၢဝ်ႇဝႃႈ တေတီႉတေၺွပ်းဢၼ်ဢမ်ႇမီးလၢႆႊသိၼ်ႊ ဝႃႈ ၼႆသေတႃႉ ဢမ်ႇလူင်းမိုဝ်းႁဵတ်းတႄႉတႄႉ။ ပေႃးၽႂ်ဢဝ်ငိုၼ်း မွၼ်ၵေႃႈလွတ်ႈ။ တႃႇတေႁဵတ်းလၢႆႊသိၼ်ႊၼိုင်ႈၵမ်း ၵေႃႈ ဢမ်ႇၸႂ်ႈလွင်ႈငၢႆႈ။ လႆႈၸႂ်ႉၶၢဝ်းယၢမ်း လႆႈၸႂ်ႉငိုၼ်းတွင်း တင်းၼမ်တင်းလၢႆ။ တႃႇတေၶဝ်ႈထိုင် ၸဝ်ႈၼႃႈတီႈ ၼႂ်းလုမ်းၼႂ်းၸႆးၵေႃႈ ဢမ်ႇငၢႆႈ။ ၸင်ႇဝႃႈ ဢွၼ်ၵၼ်ႁေႃႈၵႂႃႇမႃး၊ ၸႂ်ႉၼႂ်းၶူင်ႇၼႂ်းဝၢၼ်ႈၵူၺ်းၼႆ – ပေႃႈႁိူၼ်းၼုမ်ႇ မိူင်းသၢတ်ႇ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ပိူၼ်ႈၵေႃႈ မွၵ်ႇၵၼ်ဝႆႉသေ ရူတ်ႉၵႃးဢမ်ႇမီးဝႂ်ၵေႃႈ ဢွၼ်ၵၼ်ၵဵပ်းသိမ်းဝႆႉႁင်းၽႂ်မၼ်း။ ႁႂ်ႈဢဝ်ၵႂႃႇၵႂႃႇမႃးမႃး မိူၼ်ၵူႈပွၵ်ႈတႄႉ ဢမ်ႇႁတ်းယဝ်ႉ။ ဢၼ်ၵႂႃႇမႃး ယူႇၸိူဝ်းၼႆႉၵေႃႈ ပဵၼ်ရူတ်ႉဢၼ်မီးၶွၼ်ႇ ၵူၺ်းယဝ်ႉ။ ဢၼ်ယၢပ်ႇထႅင်ႈသမ်ႉ ပဵၼ်ၼမ်ႉမၼ်းၶိူင်ႈ မိူဝ်ႈလဵဝ် ပၢမ်ႉၼမ်ႉမၼ်းၵေႃႈ ပိၵ်ႉဝႆႉမူတ်း။ ၵူၼ်းလူင်သိုၵ်းမၢၼ်ႈတႄႉ ၸီႉသင်ႇ ႁႂ်ႈၸဝ်ႈ ႁၢၼ်ႉၼမ်ႉမၼ်းၶိူင်ႈ ၶၢႆပၼ်ၵူၼ်းႁဵတ်းၵၢၼ် ၼႂ်းလုမ်းၼႂ်းၸႆးလႄႈ ပေႃႈမႄႈၸိူဝ်းလူဝ်ႇႁပ်ႉသူင်ႇလုၵ်ႈႁဵၼ်း ၸိူဝ်းၼႆႉၼႆဢေႃႈ”- ဝႃႈၼႆ။

တီႈဝဵင်းမိူင်းတူၼ်ၵေႃႈ တေႃႈၼင်ႇၼၼ်။ ပလိၵ်ႈမၢၼ်ႈ သိုၵ်းမၢၼ်ႈ ၵူတ်ႇထတ်းထဵတ်ႈထၢမ် တီႉၺွပ်း ႁႅင်းလႄႈ လုၵ်ႈႁဵၼ်း ဢမ်ႇႁတ်းဢဝ်ရူတ်ႉဢဝ်ၵႃး ၵႂႃႇႁဵၼ်းလိၵ်ႈလၢႆး ၵူၼ်းပိုၼ်ႉတီႈ လၢတ်ႈၼင်ႇၼႆ။

ၵၢပ်ႈဝၢၼ်ႈပၢၼ်မိူင်း ယၢမ်ႈလဵဝ် ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႈ ပၢႆးမၢၵ်ႈမီးတူၵ်း၊ တႃႇတေသိုဝ်ႉ ရူတ်ႉၵႃးလႆႈၵေႃႈ ဢမ်ႇငၢႆႈလႄႈ ၽႂ်ၵေႃႈ ၵူဝ်ၺႃးပလိၵ်ႈမၢၼ်ႈ ယိုတ်းဢဝ်လၢႆရူတ်ႉၵႃး ၸဝ်ႈၵဝ်ႇ။ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၵုမ်ႇပိုၼ်ၽၢဝ်ႇမၢႆမီႈ၊ ၵုမ်ႇၵဵပ်းၶွၼ်ႇတီႈၵူၼ်းမိူင်း၊ ၵုမ်ႇ မိပ်ႇငႅၼ်းတဵၵ်းတဵင်ပေႉၵိၼ်ၵူၼ်းမိူင်း၊ ၵုမ်ႇႁၢင်ႈႁႅၼ်းသိုၵ်း ပိုတ်းယိုဝ်းသိုၵ်း ၼႂ်းမိူင်းယူႇၵူၺ်း၊ ဢမ်ႇမီးလွင်ႈတူၺ်းထိုင် လွင်ႈယူႇသႃႇလူမ်ၸႂ်ၵူၼ်းမိူင်း သင်သေၸိူဝ်ႉသေပိူင်။