ၽွင်းမိူင်းသႅၼ်ဝီ လူႉၵွႆ လူၺ်ႈၽႅၼ်ယၼ်ႇသိုၵ်း 1027 ၵူၼ်းမိူင်းသႅၼ်ဝီ ယၢပ်ႇၽိုတ်ႇၵိၼ်းၸႂ် လႆႈပၢႆႈ ၽေးသိုၵ်း ယင်းပႆႇၸၢင်ႈပွၵ်ႈၶိုၼ်းႁိူၼ်းယေး သိုၵ်းၵဝ်ႈၵၢင်ႉ MNDAA ပၼ်ၶႂၢင်ႉၸဝ်ႈငိုၼ်းသႃး ပိုတ်ႇပၢင်တေႃႇလွင်း ၸဵမ်မိူဝ်ႈၼႃႈပီမႂ်ႇၶႄႇၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်။
ပၢင်တေႃႇလွင်းၼႆႉ ၸတ်းတီႈပၢင်ႇပွႆးလိူၼ်သီႇ ၵၢင်ဝဵင်းသႅၼ်ဝီလႄႈ ၸတ်းႁဵတ်းပႃး ၼႂ်းဝၢၼ်ႈၼမ်ႉဢုၼ်ႇ၊ ၼႂ်းဢိူင်ႇပၢင်ႇလေႃႉ၊ ဢိူင်ႇၸေႈဢူ၊ ဢိူင်ႇၼမ်ႉၸလၢပ်ႈ ဢိၵ်ႇတင်း ဢိူင်ႇမိူင်းပႃး ၸဵမ်ၸိူဝ်းၼႆႉ။
ၸွမ်းၼင်ႇ ၸဝ်ႈတႅင်ႇပၢင်လွင်းၶဝ်လၢတ်ႈသေ လႆႈႁူႉဝႃႈ – ပၢင်တေႃႇလွင်း တီႈပၢင်ႇပွႆးလိူၼ်သီႇၼႆႉ တေၸတ်းႁဵတ်းၵႂႃႇ ၶၢဝ်းတၢင်းၼိုင်ႈပီသေ တၢင်ႇဢွင်ႈတီႈတႄႉ တေၸတ်းႁဵတ်းၵႂႃႇ ၶၢဝ်းတၢင်းၼိုင်ႈလိူၼ် ဝႃႈၼႆ။
ၼႂ်းပၢင်တေႃႇလွင်းၼၼ်ႉ မီးပၢင်လေးၵွင်ႇၵျိၼ်ႇ၊ မၢၵ်ႇၵိင်ႈလွႆ၊ ပၢင်ၶႅင်ႇမၢၵ်ႇၶင်ႇလႄႈ ပၢင်ၽၢႆႉၵူႈသႅၼ်းသႅၼ်း။ ပၢင်တေႃႇလွင်း ၼိုင်ႈၶူင်ႇၼႆႉ လႆႈပၼ်တီႈပေႃႈလဵင်ႉၵၼ်ႇထရႅၵ်ႈ ၼိုင်ႈလိူၼ် ဢေႇသုတ်း 600,000 ပျႃး။
ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းၼႂ်းပိုၼ်ႉတီႈတႄႉ ဢွၼ်ၵၼ်မႆႈၸႂ်ဝႃႈ သင်ပိုတ်ႇပၢင်တေႃႇလွင်း ၵႂႃႇၶၢဝ်းတၢင်းႁိုင် ၼႆၸိုင် ၵူဝ်ၵူၼ်းဢမ်ႇၶႂ်ႈၶတ်းၸႂ်ႁဵတ်းၵၢၼ်သေ မိုင်ႉၵၢၼ်တေႃႇလွင်း ဢမ်ႇထၢတ်ႇဢမ်ႇဝၢႆး။ ၸၢတ်ႈပၢၼ်ၵူၼ်းမိူင်း ၸိူဝ်းႁဵတ်းၵၢၼ်ႁႃၵိၼ်လဵင်ႉတွင်ႉၵႂႃႇဝၼ်းလႂ်ဝၼ်းၼၼ်ႉ ၸၢင်ႈလူႉသေဢမ်ႇၵႃး ၼႃႈႁိူၼ်း ဢၼ်ၵႆႉမီးလွင်ႈမူၼ်ႈ ၸႂ်၊ လွင်ႈဢုၼ်ႇၸႂ်ၼၼ်ႉၵေႃႈ ၸၢင်ႈတႅၵ်ႇယၢႆႈ – ဝႃႈၼႆ။
ဝၢႆးလင်ၽႅၼ်ယၼ်ႇသိုၵ်း 1027 တပ်ႉသိုၵ်းၵဝ်ႈၵၢင်ႉ ပိုၼ်ၽၢဝ်ႇ ၵုမ်းၵမ်မိူင်းသႅၼ်ဝီမႃးၶၢဝ်းတၢင်း ၼိုင်ႈပီပၢႆၼႆႉ မီးႁူင်းမိပ်ႇၼူတ်ႇလႄႈ KTV ၼမ်လိူင်ႇမႃးလိူဝ်ၵဝ်ႇသေ ၵူၼ်းၸိူဝ်းၵႂႃႇႁဵတ်းၵၢၼ်ၼၼ်ႉ လႆႈႁူႉဝႃႈ ပဵၼ်ၼၢင်းယိင်းၼုမ်ႇ သႅၼ်းႁုၼ်ႈမႂ်ႇ ဢႃယု 18 လႄႈ 20 ၶိုၼ်ႈၼိူဝ်၊ မီးလၢႆၸၢဝ်းၶိူဝ်း ပႃးၸဵမ် တႆး၊ လွႆ၊ မၢၼ်ႈ၊ ၶႄႇ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ