သိုၵ်းမၢၼ်ႈ ဝၢင်းၶိူင်ႈၸူး သိုၵ်းထၼုတီႈ ဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၽူႈမီးပုၼ်ႈၽွၼ်း ၾၢႆႇသိုၵ်းထၼု ဢၼ်ပႂ်ႉႁပ်ႉသမ်ႉပဵၼ်ၼွင်ႉၸၢႆး ဢွၵ်ႇဢွၵ်ႇသိုၵ်းမၢၼ်ႈၼၼ်ႉ သွင်ပီႈၼွင်ႉၽၢတ်ႇၵၼ်လႆႈ 10 ပီပၢႆ ၽိူဝ်ႇဝၢင်းၶိူင်ႈယွမ်းၵၢၼ်ႉတေႃႇၵၼ် ၸင်ႇထူပ်းၵၼ်ၶိုၼ်း ဝႃႈၼႆ။

ဝၼ်းတီႈ 04/02/2025 သိုၵ်းမၢၼ်ႈလႄႈ သိုၵ်းထၼု ပိုတ်းယိုဝ်းၵၼ်ႁၢဝ်ႈႁႅင်း တီႈဝၢၼ်ႈတွင်းၶမ်း ဝဵင်းၼွင်ၶဵဝ်၊ သိုၵ်းမၢၼ်ႈ 5 ၵေႃႉ တီႈတပ်ႉဢမျွၵ်ႈ 902 ဝၢင်းၶိူင်ႈၸူး ၸုမ်းသိုၵ်းထၼု၊ ၼႂ်းၼၼ်ႉ ပႃးမႃးၸၼ်ႉ ႁူဝ်ႁၢၼ်ၵေႃႉၼိုင်ႈ လိုၼ်းသုတ်း ၽိူဝ်ႇထၢမ်တူၺ်းလႆႈႁူႉဝႃႈ ပဵၼ်ပီႈဢၢႆႈ ၵူဝ်ႇၵျေႃႇယၢၼ်ႇ – သိုၵ်းႁၢၼ် ၵေႃႉၼိုင်ႈ ၼႂ်းတပ်ႉသိုၵ်းထၼု ၼၼ်ႉ။

သိုၵ်းမၢၼ်ႈ ၵေႃႉပဵၼ်ပီႈၼၼ်ႉ ဢႃယုမီး 38 ပီ သိုၵ်းထၼု ဢၼ်ပဵၼ်ၼွင်ႉၼၼ်ႉသမ်ႉ ဢႃယုမီး 27 ပီ။ သိုၵ်းမၢၼ်ႈ ၼၼ်ႉ လၢတ်ႈတီႈသိုၵ်းထၼုဝႃႈ – ၼႂ်းတပ်ႉၸႂ်ႉၵိၼ်ယႃႈ သူႇယႃႈမဝ်းၵမ် ယႃႈသူၼ်းၸႂ်သေ ၸင်ႇၶဝ်ႈပၢင်တိုၵ်း ပိုတ်းယိုဝ်းလူၺ်ႈဢမ်ႇၵူဝ်တၢႆၵူဝ်ႁႄသင် ဝႃႈၼႆ။

ၾၢႆႇသိုၵ်းထၼု လၢတ်ႈဝႃႈ-  ယၢမ်းလဵဝ် သိုၵ်းမၢၼ်ႈၼၼ်ႉ မိုင်ၵႂင်သေ မိူၼ်ၵူၼ်းၸႂ်ဢမ်ႇမၢၼ်ႇ ထၢမ်သင်ၵေႃႈဢမ်ႇလႆႈ။ မၼ်းလၢတ်ႈဝႃႈ ၵိၼ်ယႃႈဝႆႉၼမ်၊ ဢိုပ်းၶဝ်ႈဢိုပ်းၼမ်ႉ ဢမ်ႇလႆႈၼွၼ်း ဢမ်ႇလႆႈလပ်းႁိုင်ယဝ်ႉလႄႈ ဢမ်ႇတွင်းသင်ယဝ်ႉ – ဝႃႈၼႆ။

ၶၢဝ်းတၢင်း ယိုတ်းဢႃႇၼႃႇ ၸိုင်ႈမိူင်းမႃး 4 ပီၼႆႉ သိုၵ်းမၢၼ်ႈ လႆႈၸႂ်ႉႁႅင်းသိုၵ်း ပိုတ်းယိုဝ်းၸုမ်းယိပ်းၵွင်ႈၵၢင်ႇ ဢမ်ႇၵိုတ်းဢမ်ႇလိုဝ်ႈ။ ပၢင်တိုၵ်းၵႂၢင်ႈၶႂၢင်ပတ်းပိုၼ်ႉၸိုင်ႈမိူင်း။ တင်ႈတႄႇ ပီ 2023 မႃး ပၢင်တိုၵ်း ၸွတ်ႇတူဝ်ႈၸိုင်ႈမိူင်း၊ ၼိုင်ႈဝၼ်းသိုၵ်းမၢၼ်ႈတၢႆ ၼႂ်းပၢင်တိုၵ်း 100 ထိုင် 200 ၵေႃႉ – တၢႆၵူႈဝၼ်း။ ဢၼ်ပၢႆႈတပ်ႉၵေႃႈ မီးယူႇၵူႈဝၼ်း။ ၵွပ်ႈၼႆ ဢဵၼ်ႁႅင်းၵူၼ်း ဢမ်ႇၶႂ်ႈမီးယဝ်ႉလႄႈ ယၢမ်းလဵဝ် သိုၵ်းမၢၼ်ႈ လႆႈၸႂ် ယႂ်ႇၵွင်ႈလူင်လႄႈ ၶိူင်ႈမိၼ် ပိုတ်းယိုဝ်း ဢဝ်လွၼ်ႉလွၼ်ႉ။